އއ.އުކުޅަހަށް ބަނގުރާ ވިއްކާ ކަމަށް ތުހުމަތުކުރެވޭ ސަފާރީ 24 ގަޑިއިރު ތެރޭގައި އެ ރަށު ފަޅުތެރެއިން ނެރެން އެ ރަށު މެޖިސްޓްރޭޓް ކޯޓުން އަމުރުކުރުމާއި އެކު މިއަދު މެންދުރުގެ ވަގުތެއްގައި ސަފާރީ ފަޅުން ނެރެފައިވާކަމަށް މަޢުލޫމާތުލިބިއްޖެއެވެ.
”ޒެޑް ކްރޫޒް“ ނަމަކަށް ކިޔާ ސަފާރީން އުކުޅަހަށް ބަނގުރާ ބާލައި އެ ތަކެތި ވިއްކާ ކަމަށް ބުނެ އެކަން ހައްލުކޮށްދިނުމަށް ރައްޔިތުން ކައުންސިލުގައި އެދުނު ނަމަވެސް ކައުންސިލުން އެކަމާ އަޅައިނުލާކަމަށް ބުނެ ރައްޔިތުންގެ ތެރެއިން ބަޔަކު މިދިޔަ ހަފުތާގައި ވަނީ މުޒާހަރާކޮށްފައެވެ.
މައުލޫމާތު ލިބިފައިވާ ގޮތުން އުކުޅަހު ބަނދަރުގައި ސަފާރީ އެޅުމުގެ ހުއްދަ އެ ރަށު ކައުންސިލުން ދީފައިވަނީ މި މަހުގެ 2 ވަނަ ދުވަހުއެވެ. އެއީ ސަފާރީ މަރާމާތުކުރަން ބޭނުންވެގެން ކައުންސިލަށް ހުށަހެޅި ހުށަހެޅުމާއި ގުޅިގެންނެވެ.
ނަމަވެސް މިދިޔަ ހޮނިހިރު ދުވަހުގެރޭ އުކުޅަހު ކޯޓުން ވަނީ 24 ގަޑިއިރުތެރޭ ސަފާރީ ރަށުގެ ފަޅުތެރެއިން ނެރެން އަމުރުކޮށްފައެވެ. އަމުރުގެ ގަޑި ރޭ 22:00 އަށް ވަނީ ހަމަވާނެއެވެ.
އުކުޅަހުން މަޢުލޫމާތުދީން ފަރާތަކުން ހާމަކޮށްފައިވާ ގޮތުގައި ފުލުހުން ސަފާރި ބަލައި ފާސްކުރި އިރު އޭގެން ބަނގުރާ ފެނިފައިވާ ނުވާކަމަށާއި، ނަމަވެސް މީގެ ކުރިން މި ސަފާރީއިން އެރަށަަށް ބަނގުރާ ވިއްކާފައިވާތީ އެ ސަފާރީ ރަށުގެ ފަޅުގައި އޮތުމުން ރައްޔިތުން އެކަމާއި ކަންބޮޑުވެގެން ވަނީ މުޒާހިރާކޮށްފައިވާކަމަށް މަޢުލޫމާތިލިބިފައިވެއެވެ.
