އއ.އުކުޅަހަށް ބަނގުރާ ވިއްކާ ކަމަށް އެ ރަށު މީހުން ތުހުމަތުކުރާ ސަފާރީ އެ ރަށު ފަޅުތެރެއިން ނެރެން އެ ރަށު މެޖިސްޓްރޭޓް ކޯޓުން އަމުރުކޮށްފިއެވެ.
އުކުޅަހު ކޯޓުން ރޭ އެފަދަ އަމުރެއް ނެރުނީ އެކަމަށް އެ ރަށު ކައުންސިލުން އެދުމުންނެވެ. 24 ގަޑިއިރަށް ނެރުނު އެ އަމުރުގެ ގަޑި ހަމަވާނީ މިރޭ 22:00 ގައެވެ.
އުކުޅަހަށް ބަނގުރާ ބާލައި ވިއްކާ ކަމަށް އެ ރަށު މީހުން ތުހުމަތުކުރަނީ ޒެޑް ކްރޫޒް ނަމަކަށް ކިޔާ ސަފާރީއަށެވެ.
އުކުޅަހު ބަނދަރުގައި އެ ސަފާރީ އެޅުމުގެ ހުއްދަ އެ ރަށު ކައުންސިލުން ދީފައިވަނީ މި މަހުގެ ދެވަނަ ދުވަހުއެވެ. އެ ހުއްދަދިނީ ސަފާރީ މަރާމާތުކުރަން ބޭނުންވެގެން ކައުންސިލަށް ހުށަހެޅުމުންނެވެ.
އުކުޅަހު ރައްޔިތުން ވަނީ އެ ސަފާރީން ރަށަށް ބަނގުރާ ބާލައި ވިއްކާ ކަމަށް ބުނެ މުޒާހަރާ ވެސް ކޮށްފައެވެ. ރަށުތެރެއިން ބަޔަކު ނުކުމެ މުޒާހަރާ ކުރީ ސަފާރީން ރާ ވިއްކާ ކަމަށް ތުހުމަތުވެ އެކަން ހައްލުކުރަން އެދުމުން ކައުންސިލުން އަޅައިނުލާކަމަށް ބުނެއެވެ.
ސަފާރީން ރާ ވިއްކާ ކަމުގެ ތުހުމަތުކުރެވުމާއެކު ކޯޓު އަމުރެއްގެ ދަށުން މިދިޔަ ހޯމަ ދުވަހު ފުލުހުން ވަނީ އެ ސަފާރީ ބަލައި ފާސްކޮށްފައެވެ. ނަމަވެސް އެކަމާ ގުޅޭ މައުލޫމާތެއް ފުލުހުން ހާމައެއް ނުކުރެއެވެ.
