ރައީސް ޞާލިޙް ފިޔަވައި ރާއްޖޭގެ ސުލްހަ މަސަލަސްކަން ހިފަހައްޓާނެ އިތުރު ވެރިޔަކު ނެތްކަމުގައި އެމްޑީއޭގެ ނައިބު ރައީސް އަލީ މައުރޫފް ވިދާޅުވެއްޖެއެވެ.

އެމްޑީއޭއިން ވަނީ ކުރިއަށް އޮތް ރިޔާސީ އިންތިޚާބުގައި ރައީސް އިބްރާހިމް މުހައްމަދު ޞާލިހަށް ތާއީދުކޮށް، ރައީސް ޞާލިހު ވެރިކަމަށް ގެނައުމަށް ބައިއަތު ހިފާފައެވެ. އެމްޑީއޭއިން ދަނީ ރައީސް ޞާލިހަށް އިންތިޚާބު ކާމިޔާބު ކުރުމަށް ކެމްޕެއިންނ ހަރަކާތްތައް ރާއްޖޭގެ އެކި ރަށްތަކުގައި ހިންގަމުންނެވެ.

އެގޮތުން ރޭ ފުވައްމުލަކުގަިއ ބޭއްވި ޖަލްސާގައި ވާހަކަ ދައްކަމުން މައުރޫފް ވިދާޅުވީ އެމްޑީއޭގެ ލީޑަރު އަހުމަދު ސިޔާމް ރައީސް އިބްރާހިމް މުހައްމަދު ޞާލިހަށް ތާއީދުކޮށް ބައިއަތު ހިފީ ރާއްޖޭގެ ރައްޔިތުންގެ ހަމަޖެހުމާއި ސަލާމަތަށްޓަކައި ކަމަށެވެ. ރައީސް ޞާލިހުގެ ވެރިކަމަކީ ރާއްޖޭގެ ތަރީހުގައިވެސް އެންމެ ބޮޑަށް ހަމަޖެހުން އޮތް އަދި އެކަން ދެމިއޮތުމަށްވެސް އެންމެ މަސައްކަތް ކުރެވުނު ވެރިކަން ކަމަށް މައުރޫފް ވިދާޅުވިއެވެ.

އޭނާ ވިދާޅުވި ކުރިއަށް އޮތް ރިޔާސީ އިންތިޚާބު އެމްޑީޕީގެ ރިޔާސީ ކެނޑިޑޭޓް ރައީސް އިބްރާހިމް މުހައްމަދު ޞާލިހު ކާމިޔާބު ކުރައްވާނީ އެމްޑީއޭގެ ބޮޑު ތާއީދަކާއިއެކުގައި ކަމަށެވެ. ރައީސް ޞާލިހަށް ވެރިކަން ހޯދައި ދިނުމަށް ކުރަންޖެހޭ ކޮންމެ ކަމެއް ކުރުމަށް އެމްޑީއޭއިން ތައްޔާރަށް އޮތްކަމަމަށް އޭނާ ވިދާޅުވިއެވެ.

މައުރޫފް ވިދާޅުވީ ރައީސް ޞާލިހު ވަނީ ޤައުމުގެ ހަމަޖެހުމާއި ތަރައްޤީ ނެގެހެއްޓުމުގައި ނަމޫނާ ދައްކަވާފައިކަމަށެވެ. އެގޮތުން ފަހުގެ ތާރީހެއްގައި ދިމާވި އެންމެ ބޮޑު ކާރިސާ ކޯވިޑުން އަރައިގެން ރާއްޖެ މިއަދު މިދެކޭ ދުވަސްތަކާއި ހަމައަށް ގެނައުމުގައި ރައީސް ޞާލިހު އެޅުއްވި ހަރުދަނާ ފިޔަވަޅުތަކަކީ އެމަނިކުފާނަށް ދެވަނަ ދައުރެއް ދޭން ހައްގު ކަމެއްކަމަށް މައުރޫފް ވިދާޅުވިއެވެ.