އިދިކޮޅު ޕީޕީއެމްގެ ރިޔާސީ ޓިކެޓަށް އެއްވެސް ޝައުގުވެރިކަމެއް ނެތްކަމުގައި، ފާއިތުވި ރިޔާސީ އިންތިޚާބުގައި ރައީސް ޔާމިންގެ ރަނިންމޭޓެއްގެ ގޮތުގައި ވާދަކުރެއްވި، ކުރީގެ އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ޑރ. ޝަހީމް މިހެން ވިދާޅުވެފައިވަނީ، އިދިކޮޅު ޕީޕީއެމްގެ ރިޔާސީ ޓިކެޓަށް ޝައުގުވެރިކަން ހުރި، އެ ޕާޓީގެ ލީޑަރޝިޕްގައި ހިމެނޭ ބައެއް ބޭފުޅުންގެ ތެރޭގައި ޝަހީމްގެ ނަންވެސް ހިމަނައިގެން އޮންލައިން ނޫހެއްގައި ލިޔެފައިވާ ލިޔުމާއި ގުޅޭގޮތުން ޕީޕީއެމް/ޕީއެންސީ ސެނެޓްގެ ވަޓްސްއަޕް ގުރޫޕަށް ފޮނުއްވި މެސެޖެއްގައެވެ.

ޕީޕީއެމް/ޕީއެންސީގެ ސެނެޓް ވަޓްސްއަޕް ގުރޫޕުގައި ޑރ. ޝަހީމް ވިދާޅުވެފައިވަނީ އޭނާގެ ނަން ޕީޕީއެމްގެ ރިޔާސީ ޓިކެޓާއި ގުޅުވައިގެން ނުދެއްކުމަށް އެދޭ ކަމަށެވެ. އެގޮތުން އެއްވެސް ރިޕޯޓެއްގައިވެސް، ދިރާސާއެއްގައިވެސް، އެހެން ގޮތަކުން ނަމަވެސް އޭނާގެ ނަން އެގޮތަށް ބޭނުން ނުކުރުމަށް ޝަހީމް އެދިފައި ވެއެވެ.

އަޅުގަޑު ވަރަށް ބޮޑަށް އެދެން އަޅުގަޑުގެ ނޭމް (ނަން) އެއްވެސް ފަރާތަކުން މިކަމުގައި ޔޫސް (ބޭނުން) ނުކުރުން. ރިޕޯޓެއްގަވެސް، ދިރާސާއެއްގަވެސް، އެހެން ގޮތަކުން ނަމަވެސް. އަޅުގަޑަކީ އެއްވެސް ވަރަކަށް އެކަމުގެ ތެރޭގައި (ރިޔާސީ ޓިކެޓަށް މަސައްކަތް ކުރާ މީހެއްގެ ގޮތުގައި) ނޭމް (ނަން) ހިމެނެން ބޭނުންވާ މީހެއް ނޫން. އަޅުގަޑު ފުރިހަމަ ތާއީދާއި ސަޕޯޓު ކުރިންވެސް މިހާރުވެސް އޮތީ ރައީސް ޔާމިނަށްކަން ކަށަވަރު ކަމާއެކު ދަންނަވަން.

ޝަހީމް ޕީޕީއެމް/ޕީއެންސީގެ ސެނެޓް ވަޓްސްއަޕް ގުރޫޕަށް ފޮނުއްވި މެސެޖުގައި ލިޔުއްވާފައި ވެއެވެ.

ޝަހީމް މި މޭރުމުން ސެނެޓް ގުރޫޕްގައި ލިޔުއްވާފައިވާއިރު، ޕީޕީއެމްގެ ނައިފަރު ދާއިރާގެ މެމްބަރު ޝިޔާމްއާއި މާލޭ ސިޓީގެ މޭޔަރު ޑރ. މުއިއްޒުގެ އިތުރުން ޑރ. ޝަހީމްގެ ނަންވެސް ހިމަނައިގެން އޮންލައިން ނޫހަކުން ލިޔެފައިވާ ސިޔާސީ ލިޔުމަކާިއ ގުޅޭގޮތުން ވާހަކަ ދައްކަކަމުން، ރައީސް ޔާމިންވެ ވެރިކަމުގައި މުލިއާގެ ޗީފް އޮފް ސްޓާފްކަން ކުރެއްވި އަހުމަދު މުސްތަފާ ވަނީ ކުރިޔަށް އޮތް ރިޔާސީ އިންތިޚާބަށް ޕީޕީއެމްގެ ޓިކެޓަށް ޝައުގުވެރިކަން އޮތްކަމަށް ވިދާޅުވެފައެވެ.

މުސްތަފާ ވަޓްސްއަޕް ގުރޫޕަށް ފޮނުވި މެސެޖުގައި ލިޔުއްވާފައިވަނީ، ޝިޔާމްއާއި ޑރ. މުއިއްޒު އަދި ޑރ. ޝަހީމްގެ ޝައުގުވެރިކަން ޓިކެޓަށް އޮތްކަމަށް ވާނަމަށް އެރޭހަށް އޭނާގެ ޝައުގުވެރިކަންވެސް އޮތް ކަމުގައެވެ.

މި ލިސްޓު މިހެން އޮތިއްޔާ އަޅުގަޑުގެ ޝައުގުވެރިކަންވެސް އެބަހުރި.

ޝިޔާމްއާއި، ޑރ. މުއިއްޒު އަދި ޑރ. ޝަހީމްއަކީ ރިޔާސީ އިންތިޚާބުގައި ވާދަކުރެއްވުމުގެ ޝައުގުވެރިކަން ހުރި ބޭފުޅުން ކަމަށްވާނަމަ އޭނާވެސް ޕީޕީއެމްގެ ރިޔާސީ ޕްރައިމަރީގައި ވާދަކުރުމުގެ ޝައުގުވެރިކަން ހުރިކަމަށް މޭރުން ކުރައްވަމުން މުސްތަފާ ވިދާޅުވެފައި ވެއެވެ.

އިދިކޮޅު ޕީޕީއެމްގެ ރިޔާސީ ޓިކެޓަށް ޝައުގުވެރިވާކަމަށް ކުރީގެ ޗީފް އޮފް ސްޓާފް އަހުމަދު މުސްތަފާ ވިދާޅުވުމުން އޭނާއަށް ތާއީދުކޮށް ސެނެޓް ވަޓްސްއަޕް ގުރޫޕުގައި، ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްލާއިލް ވާހަކަ ދައްކަވާފައި ވެއެވެ.