ޗާގޯސް މައްސަލައިިގައި ސަރުކާރަށް ލިބުނު ބޮޑު ކާމިޔާބީގައި ބަންޑާރަނައިބް އިބްރާހިމް ރިއްފަތުގެ ކަރުގައި އަޅުވަންވީ މާފައްޗެއް ކަމުގައި ޔޫތު މިނިސްޓަރ އަހުމަދު މަހުލޫފް ވިދާޅުވެއްޖެއެވެ.

އޭނާ މިހެން ވިދާޅުވީ ރާއްޖެ އާއި ޗާގޮސްއާ ދެމެދުގައިވާ ކަނޑުގެ ފުށުއަރާ ސަރަހައްދުގެ މައްސަލާގައި ބަންޑާރަ ނައިބަށް އެކި ތުހުމަތުކުރައްވައި އިދިކޮޅު ފަރާތްތަކުން މަޖިލީހަށް ހުށަހަޅާފައިވާ އިތުބާރު ނެތްކަމުގެ މައްސަލަ އާއި ގުޅޭގޮތުން ކުރި ޓުވީޓުގައެވެ. މަހުލޫފް ވިދާޅުވީ މިމައްސަލާގައި ރާއްޖެއަށް ލިބުނީ ބޮޑު ކާމިޔާބީއެއް ކަމަށެވެ. މިމައްސަލާގައި ސަރުކާރުން ކުރި މަސައްކަތުގެ އެންމެ ބޮޑު ދައުރެއް އަދާކުރީ ރިއްފަތުކަން ފާހަގަކޮށް މަހުލޫފްވަނީ އޭނާގެ ކަރުގައި މާފައްޗެއް އަޅުވަންޖެހޭކަމަށް ވިދާޅުވެފައެވެ.

ހަގީގަތް އޮޅުވާނުލާށެވެ. ޗާގޯސް މައްސަލައިގަ ރާއްޖެއަށް ލިބުނީ ބޮޑު ކާމިޔާބެއް، ލިބުނީ ބޮޑު ބައެއް. މޮރިޝަސްގެ މައްޗަށް ގަދަވީ މިކުޑަކުޑަ ދިވެހި ރާއްޖެ. ހަގީގަތުގައި އެޓާނީ ޖެނެރަލް އިބްރާހިމް ރިއްފަތުގެ ކަރުގައި އަޅުވަންވީ މާފައްޗެއް.

– މަހުލޫފް ވިދާޅުވިއެވެ.

މަހުލޫފް ވިދާޅުވީ މަޖިލީހުގެ އައުލަބިއްޔަތެއްނެތި މިފަދަ މައްސަލަތައް މަޖިލީހަށް ވައްދަނީ ކޮން މަގުސަދެއްކަން ރައްޔިތުންނަށް ސާފުވާކަމަށެވެ. ފޯޅަވަހި މައްސަލާގައި އެކުލަވާލާފައިވާ ކޯލިޝަނުން މިހާރު ވަނީ އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމުގެ މައްސަލަ މަޖިލީހަށް ވައްދައިފައެވެ.

ރައްޔިތުންގެ މަޖިލީހުގެ އަގުލަބިއްޔަތު ނެތި، މަޖިލީހަށް އިތުބާރު ނެތްކަމުގެ މައްސަލައެއް ވެއްދުމަކީ ޗާގޯސް މައްސަލައިގަ ކުޅެނީ ޑްރާމާއެއްކަން އިތުރަށް ރައްޔިތުންނަށް ޔަގީންވާކަމެއް. ތިޔަ އިތުބާރު ނެތްކަމުގެ މައްސަލައާއި ޖަމަލު ފޮޑިއަކާ އެއްވެސް ތަފާތެއްނެތް.

– މަހުލޫފް ވިދާޅުވިއެވެ.

ގައުމީ މަސްލަހަތާ ގުޅިފައިވާ މައްސަލައެއް އިޓްލޮސް އިން ނިންމި ގޮތުގެ ހަގީގަތް ދިވެހި ރައްޔިތުންނަށް ހާމައަށް ފެންނަން އޮއްވައި, ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތް ކަމުގެ ވޯޓު ނަގަން ކުރާ މަސައްކަތް އެމްޑީޕީން ކާމިޔާބުވިޔަ ނުދެއްވާނެ ކަމަށް އެމްޑީޕީންވަނީ ބުނެފައެވެ. އަދި ގައުމުގެ މިނިވަންކަމާއި އިސްތިގުލާލު ދިފާއުކުރައްވައި ބަންޑާރަ ނައިބު ކުރެއްވި މަސައްކަތްޕުޅާ ގުޅުވައި ނަގަން އުޅޭ އިތުބާރު ނެތް ކަމުގެ ވޯޓާ ދެކޮޅަށް, ބަންޑާރަ ނައިބު އިބްރާހިމް ރިފްއަތުއާ އެކުގައި ރައްޔިތުންގެ މަޖިލީހުގެ އެމްޑީޕީ ޕާލިމަންޓަރީ ގްރޫޕް އޮތްކަމުގެ ޔަގީންކަން ވަނީ ދީފައެވެ.

އައްޑިހަ ހަތް މެމްބަރުންގެ މަޖިލީހުގެ ތިން ބައިކުޅަ އެއްބަޔަކީ 29 މެމްބަރުންނެވެ. ފޯޅަވަހި ކޯލިޝަންގައި ހިމެނެނީ ފިކުރެއްގެ ދިރުމުގެ 14 މެމްބަރުން، ޖޭޕީގެ ދެ މެމްބަރުން، ޕީޕީއެމްގެ ފަސް މެމްބަރުން، ޕީއެންސީގެ ތިން މެމްބަރުން އަދި އެމްއެންޕީގެ ތިން މެމްބަރުންނާއެކު ޖުމުލަ 27 މެމްބަރުންނެވެ. އެއީ ނަޝީދު އާއި ޖޭޕީގެ ލީޑަރު ގާސިމް ވެސް ހިމަނައިގެންނެވެ.