ރާއްޖެއަށް މިހާރު ކުރަމުން އަންނަ ހުޅަނގު މޫސުމުގެ ވިއްސާރައިގައި ވޭތުވެދިޔަ 24 ގަޑިއިރު އެންމެ ގިނައިން ވާރޭ ވެހިފައި ވަނީ އައްޑޫ ސިޓީ ގަމާއި، ހުޅުމީދޫއަށް ކަމުގައި މޫސުމާބެހޭ ޤައުމީ އިދާރާއިން ބުނެފިއެވެ.
ވޭތުވެދިޔަ 24 ގަޑިއިރުގެ ތެރޭގައި އެންމެ ގިނައިން ވާރެވެހުނުކަމަށް މޫސުމާބެހޭ ޤައުމީ އިދާރާއިން ރެކޯޑްކޮށްފައި ވަނީ އައްޑޫ ސިޓީ ގަމާއި ހުޅުމީދޫއަށެވެ. އެގޮތުން ގަމަށް 120 މިލިމީޓަރުގެ ވާރޭ ވެހިފައިވާއިރު، ހުޅުމީދުއަށް 113 މިލިމީޓަރުގެ ވާރޭ ވަނީ ވެހިފައެވެ.
24 hours accumulated Rainfall from 4th May 2023, 08:00 to 5th May 2023, 08:00. pic.twitter.com/M3iODBHIYm
— Maldives Meteorology (@MetMaldives) May 5, 2023
ދެކުނަށް ކުރަމުންދާ ވިއްސާރައިގައި އައްޑޫ ސިޓީ ހިތަދުއާއި ފޭދޫގެ ގެތަކަށް ފެންވަދެ ވަނީ ގެއްލުންތަކެއްވެސް ލިބިފައެވެ. ޑިޒާސްޓަރ މެނޭޖްމަންޓް އޮތޯރިޓީން ބުނީ ހިތަދޫއަށް ބޯކޮށް ވާރޭވެހި ފެންބޮޑުވެ 16 ގެއަކަށާއި، 7 ގެއެއްގެ ދަނޑު ބިންތަކަށް އެކި ވަރުގެ ގެއްލުންތައް ލިބިފައިވާކަމަށެވެ. މީގެއިތުރުން ސ.ފޭދޫގެ 8 ގެއަކަށްވެސް ފެންވަދެ ގެއްލުންވެގެންވެސް ވަނީ ރިޕޯޓްކޮށްފައެވެ. ނަމަވެސް، އެހީ ފޯރުކޮށްދެންޖެހޭ ޙާލަތަށް އެއްވެސްކަމެއް ގޮސްފައިނުވާކަމަށެވެ.
މިހާރު ރާއްޖެއަށް ކުރަމުންދާ ވިއްސާރައަކީ ހުޅަނގު މޫސުން ފެށި ކުރަމުންދާ ވިއްސާރައެވެ. ރާއްޖޭގެ މޫސުން ވަރަށް ބޮޑަށް ގޯސްވެ، މުޅި ރާއްޖޭގެ ހުރިހާ ސަރަޙައްދުތަކަށްވެސް ދަނީ ވިއްސާރަކުރަމުންނެވެ. ޚާއްސަކޮށް މެދުރާއްޖެތެރެއާ ދެކުނުގެ މޫސުން ގޯހެވެ.
މޫސުމާ ބެހޭ ގައުމީ އިދާރާއިން ދަނީ، މޫސުން ގޯސްވާނެކަމަށް ލަފާކޮށް، ވައިޓް އަދި ޔެލޯ އެލަރޓްތައްވެސް ނެރެމުންނެވެ. އެގޮތުން ރޭ ދަނވަރު ޔެލޯ އެލަރޓް ނެރެފައިވާއިރު، މިއަދު ހެނދުނު ވަނީ ބޮޑު ސަރަޙައްދަކަަށް ވައިޓް އެލަރޓް ނެރެފައެވެ. އަދި ކުރިއަށް އޮތް 24 ގަޑިއިރުވެސް ދެކުނާ މެދުރާއްޖޭގެ އަތޮޅުތަކަށް ގުގުރުމާއެކު ބޯކޮށް ވާރޭވެހޭނަކަމަށް މެޓުން ވަނީ ލަފާކުރައްވާފައެވެ. ވައިޖެހެމުންދަނީ 15މޭލާ 25 މެލާ މެދުގެ ބާރުމިނުގައެވެ. އަދި ވިލާގަނޑުގައި ގަޑިއަކު 45 މޭލަށް ވައި ގަދަވާނެއެވެ.
މުޅި ރާއްޖެއަށްވެސް ކަނޑުތައް ގަދަވާނެކަމަށް ލަފާކޮށްފައިވާއިރު، ރާޅުގެ އުސްމިން ހުންނާނީ 4 ފޫޓާއި 7 ފޫޓާއި ދެމެދުގައެވެ. އެހެންކަމުން މޫސުމަށް ޚާއްސަ ސަމާލުކަމެއްދިނުމަށް ކަމާއި ގުޅުންހުރި ފަރާތްތަކުން އަންނަނީ އިލްތިމާސްކުރައްވަމުންނެވެ. އެގޮތުން މޫސުން ގޯސްވެ ކަނޑުމަތީގެ ބައެއް ހާދިސާތައްވެސް ވޭތުވެދިޔަ ދެތިންދުވަހު ވަނީ ހިނގާފައެވެ.
މޫސުމާއިބެހޭ ޤައުމީ އިދާރާއިން ލަފާކޮށްފައިވާ ގޮތުގައި ރާއްޖޭގެ މޫސުން ރަނގަޅުވާނެކަމަށް ލަފާކުރެވެނީ އަންނަ އަންގާރަދުވަހުއެވެ.
