ބޯކޮށްވާރޭވެހި އައްޑޫ ސިޓީ ހިތަދޫ އަދި ފޭދޫގައި ފެންބޮޑުވުމުން ފެންހިންދުމުގެ މަސައްކަތުގައި އެމްއެންޑީއެފް ސަދަން އޭރިއާ ކޮމާންޑުގެ ސިފައިންނާއި ހިތަދޫ ފަޔަރ ސްޓޭޝަނުގެ ފަޔަރފައިޓަރުން އެހީތެރިކަން ފޯރުކޮށްދީފިއެވެ.
ރޭއްސުރެން ކުރަމުންދާ މި މަސައްކަތުގައި، މިހާތަނަށް އައްޑޫސިޓީ ހިތަދޫ އަދި ފޭދޫގައި ގާތްގަނޑަކަށް ޖުމުލަ 22 ގެއެއްގެ ފެންހިއްކުމާއި ވެލިބަސްތާޖަހާ ދިނުމުގައި އެމްއެންޑީއެފް ސަދަން އޭރިއާ ކޮމާންޑްގެ ސިފައިންނާއި ހިތަދޫ ފަޔަރ ސްޓޭޝަނުގެ ފަޔަރފައިޓަރުން ދަނީ އެހީތެރިކަން ފޯރުކޮށްދެމުންނެވެ.
ފެންބޮޑުވެފައިވާ ބައެއް މަގުތަކުގައި ކޯރު ކެނޑުމުގެ މަސައްކަތް މިހާރު ކުރަމުންދާއިރު، އެރަށްތަކުގެ މަގުތަކުގައި ހެދިފައިވާ ފެންގަނޑު ހިއްކުމުގެ މަސައްކަތް ޕަންޕުގެ އެހީގައި ސިފައިން ދަނީ ކުރަމުންނެވެ.
މިމަސައްކަތަށް އެހީތެރިކަން ފޯރުކޮށްދިނުމަށް ހުއްޓުމެއްނެތި އެމްއެންޑީއެފް ސަދަން އޭރިއާ ކޮމާންޑުގެ ސިފައިން އަންނަނީ ހަރަކާތްތެރިވަމުންނެވެ.
ބޯކޮށްވާރޭވެހި އައްޑޫ ސިޓީ ހިތަދޫ އަދި ފޭދޫގައި ފެންބޮޑުވުމުން ފެންހިންދުމުގެ މަސައްކަތުގައި އެމްއެންޑީއެފް ސަދަން އޭރިއާ ކޮމާންޑުން ކުރަމުން އަންނަ މަސައްކަތްތަކުގެ ތެރެއިންhttps://t.co/gYDhX34USu pic.twitter.com/n1KgBibN5D
— Maldives National Defence Force (@MNDF_Official) May 5, 2023
މޫސުމާ ބެހޭ ގައުމީ އިދާރާއިން ދަނީ، މޫސުން ގޯސްވާނެކަމަށް ލަފާކޮށް، ވައިޓް އަދި ޔެލޯ އެލަރޓްތައްވެސް ނެރެމުންނެވެ. އެގޮތުން ރޭ ދަނވަރު ޔެލޯ އެލަރޓް ނެރެފައިވާއިރު، މިއަދު ހެނދުނު ވަނީ ބޮޑު ސަރަޙައްދަކަަށް ވައިޓް އެލަރޓް ނެރެފައެވެ. އަދި ކުރިއަށް އޮތް 24 ގަޑިއިރުވެސް ދެކުނާ މެދުރާއްޖޭގެ އަތޮޅުތަކަށް ގުގުރުމާއެކު ބޯކޮށް ވާރޭވެހޭނަކަމަށް މެޓުން ވަނީ ލަފާކުރައްވާފައެވެ. ވައިޖެހެމުންދަނީ 15މޭލާ 25 މެލާ މެދުގެ ބާރުމިނުގައެވެ. އަދި ވިލާގަނޑުގައި ގަޑިއަކު 45 މޭލަށް ވައި ގަދަވާނެއެވެ.
މުޅި ރާއްޖެއަށްވެސް ކަނޑުތައް ގަދަވާނެކަމަށް ލަފާކޮށްފައިވާއިރު، ރާޅުގެ އުސްމިން ހުންނާނީ 4 ފޫޓާއި 7 ފޫޓާއި ދެމެދުގައެވެ. އެހެންކަމުން މޫސުމަށް ޚާއްސަ ސަމާލުކަމެއްދިނުމަށް ކަމާއި ގުޅުންހުރި ފަރާތްތަކުން އަންނަނީ އިލްތިމާސްކުރައްވަމުންނެވެ. އެގޮތުން މޫސުން ގޯސްވެ ކަނޑުމަތީގެ ބައެއް ހާދިސާތައްވެސް ވޭތުވެދިޔަ ދެތިންދުވަހު ވަނީ ހިނގާފައެވެ.
