މިހާރު ރާއްޖެއަށް ކުރަމުންދާ ވިއްސާރާގައި ރެއާއި މިއަދު ހެނދުނު މާލެއަށް ބޯކޮށް ވާރޭވެހި މަގުތަކުގައި ވަރަށްބޮޑަށް ފެންބޮޑުވެއްޖެއެވެ.
ފެންބޮޑުވުމުގެ ސަބަބުން ހިނގާބިނގާވެ އުޅުމަށާއި އެއްގަމު އުޅަނދު ދިއްވުމަށް ދަތިތަކާ ކުރިމަތިވިއެވެ. މިއާއެކު ސިފައިންވަނީ މަގުތަކުން ފެން ހިއްކުމުގެ މަސައްކަތް ފަށާފައެވެ.
އެމްއެންޑީއެފުން ވިދާޅުވީ ބޯކޮށް ވާރޭވެހި މާލޭގެ މަގުތަކުގައި ފެން ބޮޑުވުމާއި ގުޅިގެން އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ސިފައިން ޕަންޕު ބޭނުންކޮށްގެން ފެން ހިއްކުމުގެ މަސައްކަތް ކުރަމުންދާކަމަށެވެ.
އެެގޮތުން މިއަދު ހެނދުނު 06:08 ހާއިރު ފެން ހިއްކުމުގެ މަސައްކަތްފަށާފައިވާއިރު، މިހާތަނަށް މާލޭގެ ތިން ސަރަހައްދެއްގައި (ގިޔާސުއްދީން ސުކޫލު،އައިޖީއެމްއެޗް އަދި ދިރާގު ހެޑް އޮފީސް) ޕަންޕު ބޭނުންކޮށްގެން ފެން ހިއްކުމުގެ މަސައްކަތް ދަނީ ކުރަމުންނެވެ.
ރެއިން ފެށިގެން މާލެއަށް ދަނީ ވާރޭވެހެމުންނެވެ. ފަތިހުންފެށިގެން އިރުއެރުމާހަމައަށް ވަރަށްބޯކޮށް ވާރޭވެހުނެވެ. މިއާއެކު މާލޭގެ ބައެއް މަގުތަކުގައިވަނީ ހިނގާބިނގާވެ އުޅެން ދަތިވާވަރަށް ފެންބޮޑުވެފައެވެ. އާންމުގޮތެއްގައިވެސް މާލޭގެ ބައެއް މަގުތަކަކީ ވާރޭވެހުމުން ވަރަށް އަވަހަށް ފެންބޮޑުވާ މަގުތަކެކެވެ. ގިނަ އިރުތަކެއްވަންދެން ބޯކޮށް ވާރޭ ވެހިއްޖެނަމަ މިމައްސަލަ ވަރަށްބޮޑުވެއެވެ.
ކުރިއަށް އޮތް 24 ގަޑިއިރުވެސް ރާއްޖޭގެ ބޮޑުބަޔަކަށް ވިއްސާރަ ކުރާނެކަމަށް މޫސުމާ ބެހޭ ޤައުމީ އިދާރާ (މެޓް) އޮފީހުން ލާފާކުރެއެވެ. މިއަދު 12:00 ޖެހުމާ ހަމައަށް ލ.އަތޮޅާއި އައްޑޫ ސިޓީއާ ދެމެދަށް އަދި ކ.އަތޮޅުން ފެށިގެން ވ.އަތޮޅަށް މެޓް އޮފީހުން ވަނީ ރީނދޫ ސަމާލު ނެރެފައެވެ.
