މިދިޔަ އަހަރު ރާއްޖޭގެ ބައެއް ސަރަހައްދުތަކަށް އިހްސާސް ކުރެވުނު ހޫނުމިން ހުރީ 43 ޑިގްރީ ސެލްސިއަސްގައެވެ. މި އަހަރު އެ އަދަދު 45 އަށް ވަަނީ އަރައިފައެވެ. އެހެންކަމުން މިދިޔަ އަހަރަށް ވުރެ މި އަހަރު ހޫނު ކަން އިހްސާސް ކުރަން ޖެހޭ މިންވަރު ވަނީ މިދިޔަ އަހަރަށްވުރެ އިތުރު ވެފައެވެ.

މެޓް އޮފީހުން މިއަދު ވަނީ، އޭޕްރިލް މަހު އެންމެ ބޮަޑަށް އިހްސާސް ކުރެވުނު ފިނިހޫނު މިނުގެ ތަފްސީލުތައް ހާމަކޮށްފައެވެ.

އެގޮތުން އިހްސާސް ކުރެވޭ ފިނި ހޫނުމިން އެންމެ މައްްޗަށް ގޮސްފައި ވަނީ އޭޕްރިލް މަހުގެ 27 ވަނަ ދުވަހު މާލެ ސިޓީއަށެވެ. އެއީ 45.5 ޑިގްރީ ސެލްސިއަސްއެވެ. ދެވަނައަށް އެންމެ މައްޗަށް ގޮސްފައި ވަނީ ހދ. ހަނިމާދޫ އާއި ލ. ކައްދޫއަށެވެ. އެއީ 45.0 ޑިގްރީ ސެލްސިއަސްއަށެވެ. ތިން ވަނަ އަށް އެންމެ މައްޗަށް ގޮސްފައި ވަނީ އައްޑޫ ސިޓީ ގަމަށެވެ. އެއީ 43.4 ޑިގްރީ ސެލްސިއަސްއަށެވެ. އަދި ގދ. ކާޑެއްދޫއަށް 43.1 ޑިގްރީ ސެލްސިއަސްއަށް އިހުސާސް ކުރެވުނު ފިނި ހޫނުމިން މައްޗަށް ގޮސްފައި ވެއެވެ.