މިނިވަން މުސްތަގިއްލު، ގައުމެއްގެ ގޮތުގައި ރާއްޖެ ދެމިއޮތީ ހަރުދަނާ ޚާރިޖީ ސިޔާސަތެއް އޮތުމުން: އަމީތު

މިނިވަން މުސްތަގިއްލު، ގައުމެއްގެ ގޮތުގައި ރާއްޖެ ދެމިއޮތީ ހަރުދަނާ ޚާރިޖީ ސިޔާސަތެއް އޮތުމުން ކަމުގައި ޖަޕާނަށް ރާއްޖެއިން ކަނޑައަޅުއްވާފައި ހުންނަވާ ސަފީރުގެ ނައިބު މުހައްމަދު އަމީތު ވިދާޅުވެއްޖެއެވެ.

ޚާރިޖީ ސިޔާސަތާއި ގުޅޭގޮތުން އަމީތު ވިދާޅުވީ ދުނިޔޭގެ ކޮންމެ ޤައުމެއް ކަމުގައި ވީނަމަވެސް އެޤައުމެއްގެ ކުރިއެރުމާއި ތަރައްޤީ ގުޅިފައިވަނީ ހަރުދަނާ ޚާރިޖީ ސިޔާސަތެއްގެ މައްޗަށް ކަމަށެވެ. ދުނިޔޭގެ ކޮންމެ ޤައުމަކަށް ބެލި ކަމުގައި ވީނަމަވެސް އެޤައުމަކުން ހޯދާފައިވާ ކާމިޔާބީގެ އެންމެ ބޮޑު ދައުރެއް އަދާކުރާނީ ޚާރިޖީ ސިޔާސަތު ގެންގުޅޭ ގޮތެއްގެ މައްޗަށްކަމަށް އަމީތު ވިދާޅުވިއެވެ.

އޭނާ ވިދާޅުވީ ހަރުދަނާ ޚާރިޖީ ސިޔާސަތުގެ މައިގަނޑު އަސާސަކީ ބައިނަލް އަޤުވާމީ ހަމަތަކާއި އުސޫލުތައް ބަލައި ގަތުންކަމަށެވެ. ރާއްޖޭގެ މިނިވަންކަމާއި ސިޔާދަތާއި އިސްތިޤުލާލުވެސް މިހާތަނަށް ދެމެހެއްޓިފައިވަނީ އެސިޔާސަތުތަކުގައި ސާބިތުކަމާއިއެކު ހިފެހެއްޓުމުންކަމަށް އަމީތު ވިދާޅުވިއެވެ.

ހަރުދަނާ ޚާރިޖީ ސިޔާސަތެއް ނެތި އަދުގެ ދުނިޔޭގަ އެއްވެސް ގައުމަކަށް ކުރިއެރުމެއް ނުހޯދޭނެ. ބައިނަލްއަގުވާމީ ހަމަތަކާއި އުސޫލުތައް ބަލައިގަތުމަކީ އެޚާރިޖީ ސިޔާސަތުގެ އަސާސް. މިނިވަން މުސްތަގިއްލު، ގައުމެއްގެ ގޮތުގައި ރާއްޖެ މި ދެމި އޮންނަނީ އެއަސާސްތައް ދަމަހައްޓާތީ.

– އަމީތު ވިދާޅުވިއެވެ.

އެއްވެސް ޤައުމަކަށް ބައިނަލްއަޤްވާމީ މުޖުތަމަޢުން އެކަހެރިވެގެން ނޫޅެވޭނެކަން ދުނިޔެއަށް ދައްކުވައިދިން އެންމެފަހުގެ މިސާލަކީ ނިމިދިޔަ ކޯވިޑްގެ ނުރައްކާތެރި ވަބާއެވެ. ދުނިޔެއާއި އެކަހެރިވެ ބިކަވެގެން ނުތިބެވޭނެކަން މިވަބާއިން ވަނީ ހާމަވެފައެވެ.

މިސަރުކާރުން ވެރިކަމާއި ހަވާލުވިއިރު ރާއްޖޭގެ ޚާރިޖީ ސިޔާސަތު އޮތީ ދުނިޔެއާއި ބީރައްޓެހި ދުނިޔޭގެ ބޮޑެތި ޖަމްއިއްޔާތަކުންވެސް ވަކިވެފައެވެ. މިގޮތުން ދިވެހިރާއްޖެއިން ކޮމަންވެލްތާއި ވަކިވެފައިވަނީ 2016 ވަނަ އަހަރުގެ އޮކްޓޯބަރ 13 ގައި ކުރީގެ ރައީސުލްޖުމްހޫރިއްޔާ ޔާމީން އަބްދުލްޤައްޔޫމްގެ ވެރިކަމުގައެވެ. އަދި އެނިންމުން ބަދަލުކޮށް ދިވެހިރާއްޖެއިން ކޮމަންވެލްތުގެ މެމްބަރަކަށް އަލުން ވުމަށް ސަރުކާރުން ހުށަހެޅީ 2018 ވަނަ އަހަރުގެ ޑިސެމްބަރު މަހުގެ 6 ވަނަ ދުވަހުއެވެ. ކޮމަންވެލްތުގެ ހުރިހާ ޤައުމެއްގެ ފުރިހަމަ ތާޢީދާއެކު ރަސްމީކޮށް ކޮމަންވެލްތުގެ މެންބަރެއްގެ ގޮތުގައި ރާއްޖެ އަލުން ކަނޑައަޅާފައިވަނީ 2020 ވަނަ އަހަރުގެ ފެބުރުއަރީ މަހުގެ ފުރަތަމަ ދުވަހުއެވެ.

ވެރިކަމާއި ހަވާލުވުމަށްފަހު ރައީސް ޞާލިހުވަނީ ޤައުމުތަކާ އެކު ޚާރިޖީ ގުޅުން ހަރުދަނާކުރަނީ ރާއްޖޭގެ އަމިއްލަ މިނިވަންކަމާއި ސިޔާދަތު ފުރިހަމައަށް ރައްކާތެރިކުރުމާއެކު އެ ގުޅުންތަކުގެ ސަބަބުން، ރައްޔިތުންނަށް ފައިދާއާއި ލާބަ ލިބޭނެކަން ކަށަވަރު ކޮށްގެންކަމަށް ވިދާޅުވެފައެވެ.

މިއާއެކު ޚާރިޖީ ގޮތުން ދުނިޔެއާއި ބީރައްޓިހި ޤައުމެއްގެ ގޮތުގައި އޮތް އޮތުން ނިމުމަކަށް ގެނެސް، މީގެ ކުރިން ދުނިޔޭގެ އެތައް ގައުމަކާއި ކެޑިފައި އޮތް ގުޅުން އިޔާދަކޮށް ރާއްޖެވަނީ އދ.ގެ މެންބަރު 191 ޤައުމުގެ ތެރެއިން 143 ޤައުމުގެ ވޯޓާއިއެކު އދ.ގެ އާންމު މަޖިލީހުގެ ރައީސްކަން ހޯދާފައެވެ. މިއީ ރާއްޖޭގެ ތާރީޚުގައިވެސް ޚާރިޖީ ގޮތުން ލިބިގެންދިޔަ އެންމެ ބޮޑު ކާމިޔާބެވެ.

މީގެ އިތުރުން ހަތް އަހަރު ފަހުން ރާއްޖޭގެ ރައީސުލްޖުމްހޫރިއްޔާގެ މަޤާމުގައި ހުންނެވި ބޭފުޅަކު 2019 ވަނަ އަހަރު ރާއްޖެއިން ވަނީ އދ.ގެ ޢާންމު މަޖިލީހުގައި ތަޤްރީރުކުރައްވާފައެވެ. އދ.ގައި ތަޤްރީރްކުރެއްވި ރާއްޖޭގެ ވެރިންގެ ތެރޭގައި ހިމެނިވަޑައިގަންނަވަނީކުރީގެ ރައީސް މައުމޫން ޢަބްދުލް ޤައްޔޫމާއި، ކުރީގެ ރައީސް މުޙައްމަދު ނަޝީދާއި، ކުރީގެ ރައީސް ޑރ.މުޙައްމަދު ވަޙީދު ޙަސަން މަނިކު އާއި މިހާރުގެ ރައީސް އިބްރާހީމް މުޙައްމަދު ޞާލިޙެވެ. ފާއިތުވި ދައުރުގައި ރާއްޖޭގެ ރައީސަކަށް ހުންނެވި ރައީސް ޔާމީން އދ.ގައި ތަޤްރީރްކުރައްވާފައެއްނުވެއެވެ.

ރާއްޖެއަކީ ކުޑަ ޤައުމެއް ކަމުގައިވީނަމަވެސް ހޯދާ ކާމިޔާބީތަކާއި، ޚާރިޖީ ދާއިރާގައި ރާއްޖޭގެ އަޑަކީ މިއަދު ދުނިޔޭގައި ނުފޫޒު ގަދަ އަޑަކަށް ވަނީ ވެފައެވެ. މިކަން ހާސިްލ ކުރެވުނީ ގިނަ މަސައްކަތްތަކެއް ކޮށްގެންނެވެ. ޚާރިޖީ ގޮތުން ދުނިޔެއާއި އެކަހެރި ވެފައި އޮތް އޮތުން ރާއްޖެ ވަނީ ނިމުމަކަށް ގެނެސް ޤައުމުތަކުން ބަލައި ގަންނަ ދުނިޔޭގެ އިޚްތިރާމް ލިބިފައިވާ ޤައުމަކަށްވެފައެވެ.