ރާއްޖޭގެ މިލްކިއްޔާތުކުން ޒަރެއްގެ މިންވަރުވެސް އެހެންބަޔަކަށް ލިބޭކަށް ނުޖެހޭ ކަމުގައި އިދިކޮޅު ޕްރޮގްރެސިވް ކޯލިޝަނުން ބުނެފިއެވެ.
ރާއްޖޭގެ ދެކުނުން އީއީޒެޑް، ނުވަތަ ދިވެހިރާއްޖެއަށް ޚާއްޞަ އިޤްތިޞާދީ ސަރަޙައްދު ކަނޑައެޅިގެން ދިޔަ ގޮތާއި، ސަރުކާރުން އަމަލުކޮށްފައިވާ ގޮތާއި ގުޅޭގޮތުން ޕްރޮގްރެސިވް ކޯލިޝަނުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް ވިދާޅުވީ ރާއްޖޭގެ މިނިވަންކަމާއި ސިޔާސަތު ގެއްލޭގޮތަށް ސަރުކާރުން ނިންމާފައިވާ ނިންމުމަމީ އެކަމުގެ ޒިންމާ ސަރުކާރުން ނަގަންޖެހޭ ކަމެއްކަމަށެވެ.
ރާއްޖޭގެ ކަނޑުގެ ސަރަހައްދުން ބޮޑުބައެއް ރާއްޖެއަށް ލިބުނުކަމަށް ބުނެ ފަތުރަމުންދަނީ މިކަމުގެ ހަގީގަތް އޮޅުވާލުމުގެ ނިޔަތުގައި ކަމަށާއި، ރާއްޖޭގެ މިލްކިއްޔާތުން އެއްވެސް މިންވަރެއް އެހެން ބަޔަކަށް ދިނުމަކީ ދިވެހި ރައްޔިތުން ތާއީދު ކުރާނެ ކަމެއް ނޫންކަމަށް އަދުރޭ ވިދާޅުވިއެވެ. ރާއްޖޭގެ އިމުން ކުޑަ މިންވަރެއްވެސް ދޫކޮށްލާނަމަ އެކަން ކުރަންޖެހޭ ގޮތް ޤާނޫނު އަސަސީގައި ބަޔާންކޮށްފައިވާ ކަމަށާއި، ޤާނޫނު އަސާސީއާއި ޚިލާފަށް ނިންމޭ އެއްވެސް ނިންމުމެއް ބަލައި ގަންނަން ނުޖެހޭކަމަށް އަބްދުއްރަހީމް ވިދާޅުވިއެވެ.
ކޮންމެ ތާކުން ކޮންމެ ކޯޓަކުން ނިންމިޔަސް، ދިވެހި ރައްޔިތުންގެ ރުހުމަކާއި ނުލައި، އަދި މަޖިލީހުގެ ރުހުމެއްނެތި ރާއްޖޭގެ އިމުން ބައެއް ނުދެވޭނެ. އެއީ ކަނޑައެޅިގެން ޤާނޫނު އަސާސީއާއި ޚިލާފަށް ކުރިކަމެއް. އެކަމެއް އެގޮތަކަށް ނުކުރެވޭނެ. އަޅުގަނޑުމެން މިތިބީ ޤައުމުގެ މިނިވަންކަން ވިއްކާލައި ހަމަޖެހިލައިގެން ބައިތިއްބަން ޖާގަ ދޭގޮތަކަށް ނޫން.
– އަދުރޭ ވިދާޅުވިއެވެ.
އަބްދުއްރަހީމް ވިދާޅުވީ ރޭގެ ޕްރެސް ކޮންފަރެންސުގައި ރާއްޖޭގެ ކަނޑުގެ ސަރަހައްދުން އައްޑޫ އިން ފެށިގެން ބޭރަށް މަސްވެރިން ނިކުންނަމީ 12 މޭލަށް ކަމަށް މިނިސްޓަރ ފައްޔާޒު ވިދާޅުވި ވިދާޅުވުމަކީ އެއްވެސް ހަގީގަތެއް ބޮޑު އޮޅުވާލުމެއްކަމަށެވެ. ރާއްޖޭގެ ދެކުނުން މަސްވެރިން މިހާރުވެސް 200 އެއްހާ މޭލަށް މަސްވެރިކަން ނިކުންނައިރު، މަސްވެރިންނަށްވެސް އޮޅުވާލި އޮޅުވާލުމަކީ ބަލައި ގަނެވޭނެ ކަމެއް ނޫންކަމަށް އަދުރޭ ވިދާޅުވިއެވެ.
އަބްދުރަހީމް ވިދާޅުވީ މިމައްސަލާގައި ރައީސް އޮފީހާއި، މޮރިޝަސްއާއި އަދި އެނޫން ފަރާތްތަކާއިއެކުވެސް ކުރެވިފައިވާ މުއާމަލާތްތަކުގެ ތަފްސީލް ރައީސް އޮފީސް ތެރެއިން ލިބިފައިވާކަމަށެވެ. އެކަންކަމުގެ މައުލޫމާތު ދިވެހި ރައްޔިތުންނާއި ހަމައަށް ހިއްސާ ކުރަމުންދާނެކަމަށް އޭނާ ވިދާޅުވިއެވެ.
ކޮސޯވޯ އަކީ މިނިވަން ގައުމެއްކަމަށް ބަލައިގަންނަން ދިވެހި ސަރުކާރުން ވޯޓް ދިނީ ރައީސް މުހައްމަދު ނަޝީދުގެ ވެރިކަމުގައެވެ. އެވޯޓް ދިވެހި ސަރުކާރުން ނެގީ ކޮސޯވޯގެ ސިޔާސީ ލީޑަރުންގެ އަތުން ފައިސާ ނަގައިގެން ކަމަށް ތުހުމަތުކޮށް އެދުވަސްވަރު އެމައްސަލަ ރައްޔިތުންގެ މަޖިލީހަށް ވެސް ހުށަހެޅިއެވެ. ނަމަވެސް މިފަހަރު މަޖިލީހަށް މިމައްސަލާގައި އެއްވެސް ކަމެއް ހިއްސާކޮށްފައި ނުވެއެވެ.
ރޭ ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ ރައްޔިތުން މަޖިލީހުގެ ލަފާ ހޯދަން ޖެހޭ ކަންކަން ގާނޫނު އަސާސީގައި ލިޔެފައި އެބައޮތް ކަމަށެވެ. "ކުރީގެ ސަރުކާރުތަކުން ކުރި ކަންތައްތަކުގެ ވާހަކަ ވެރިޔަކަށް ހުރެ ދެއްކުމަކީ ރަނގަޅު ކަމެއް ނޫން. ވެރިޔަކަށް ހުރެ ކަންކަން ނިންމާއިރު ވަރަށް ގިނަ ކަންކަމަށް ބެލުމަށްފަހު ކަންކަން ނިންމާނީ. އެހެންނަމަވެސް ބައްލަވާ ކޮސޯވޯގެ މައްސަލަ. ރާއްޖެ އިން ކޮސޯވޯ އަކީ މިނިވަން ގައުމެއް ކަމަށް ވޯޓް ދިނީ. އެއްވެސް ތަނެއްގައި ނެތް މަޝްވަރާ ކޮށްފައެއް. ވަޒީރުންގެ މަޖިލީހުގައި ވެސް (މަޝްވަރާކޮށްފައި) ނެތް. ރައްޔިތުން މަޖިލީހުގައި ވެސް ނެތް. އޭގެ ފަހުން 2017 ގައި (ޗާގޯސް މައްސަލައިގައި) ވޯޓް ދޭން ވެސް ލަފައެއް ނުހޯދާ." ރައީސް ވިދާޅުވިއެވެ.
