ޗާގޮސް އަތޮޅުތަކުގެ ސިޔާދަތީ ބާރު ރާއްޖެއިން ދޫކޮށްލުމުގެ ސަބަބުން ރާއްޖޭގެ ކަނޑުގެ ސަރަހައްދުން ބައެއް ގެއްލިފައިވާ ކަމަށާއި، ރާއްޖެއަށް އެންމެ ރަގަޅު ގޮތަކީ މި ނިންމުން ބަަލައި ނުގަތުން ކަމުގައި، ރައްޔިތުންގެ މަޖިލިހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މި މޭރުމުން ޓުވީޓު ކުރައްވާފައި މިވަނީ، މޮރިޝަސްގެ ފަރާތުން ދިވެހިރާއްޖެއާއި ޗާގޮސްއާ ދެމެދު އޮތް ކަނޑުގެ ސަރަހައްދުގެ ތެެރއިން ފުށުއަރާ ސަރަހައްދާއި ގުޅޭގޮތުން ޔުނައިޓެޑް ނޭޝަންސް ކޮންވެންޝަން އޮން ދަ ލޯ އޮފް ދަ ސީ (މުޢާހަދާ)ގެ ދަށުން 23 އޮގަސްޓު 2019 ގައި ހުށަހެޅި މައްސަލާގައި މިއަދު އިންޓަރނޭޝަނަލް ޓްރައިބިއުނަލް ފޮރ ދަ ލޯ އިފް ދަ ސީ (ޓްރައިބިއުނަލުން) ކުރި ހުކުމުގައި، ދެގައުމުގެ މެރިޓައިމް ބައުންޑަރީގައި ފުށުއަރާ 92،563 އަކަ ކިލޯ މީޓަރުގެ ސަރަހައްދުން ރާއްޖެއަށް ލިބިފައިވަނީ 47،232 އަކަ ކިލޯ މީޓަރުގެ ސަރަހައްދެއް ކަމަށާއި، އަދި މޮރިޝަސްއަށް ދޭން ކޯޓުން ހުކުމް ކޮށްފައިވަނީ 45،331 ގެ ސަރަހައްދެއް ކަމުގައި ނިންމާފައި ވަނިކޮށެވެ.
ރާއްޖެއާއި މޮރިޝަސްއާއި ޚިޔާލު ތަފާތުވެފައިވާ މެރިޓައިމް ބައުންޑަރީގެ މައްސަލާގައި މިއަދު އިޓްލޮސްއިން ކުރި ހުކުމަށްފަހު އޭޖީ އޮފީހުން ނެރުނު ބަޔާނުގައި ވިދާޅުވެފައިވަނީ، ޓްރައިބިއުނަލްއިން މިގޮތަށް ނިންމާފައިވަނީ ދިވެހިރާއްޖެއިން ހުށަހެޅި ގޮތަށް ކަމުގައެވެ. އޭޖީ އޮފީހުން އިތުރަށް ވިދާޅުވެފައިވަނީ، "ބެލްންހެމް ރީފް" ގައި ބޭސް ޕޮއިންޓް ނުހިމެނޭނެކަމަށް ކަނޑައަޅައިގެން، އަދި އުތުރު ޗާގޮސް އައުޓަރ ކޮންޓިނެންޓަލް ޝެލްފް މޮރިޝަސްއަށް ހައްގުވާކަމަށް ސާބިތު ކޮށްދީފައި ނުވާތީ، މޮރިޝަސްއިން އެދިފައިވާ ގޮތަށް، ރާއްޖެއާއި މޮރިޝަސްއާ ދެމެދުގައިވާ އައުޓަރ ކޮންޓިނެންޓަލް ޝެލްފް ޑީލިމިޓް ނުކުރުމަށްވެސް ޓްރައިބިއުނަލްގެ ފަނޑިޔާރުންގެ އިއްތިފާގުން ނިންމާފައިވާކަމުގައެވެ.
މި ނިންމުން ބަލައި ނުގަތުމަށް ނަޝީދު ގޮވާލައްވާފައިވި ނަމަވެސް، ނަޝީދުގެ ވެރިކަމުގައި މޮރިޝަސްއަށް ކުރެއްވި ދަތުރު ފުޅުގައި ޗާގޮސްއަކީ މޮރިޝަސްގެ ބައެއްކަމަށް އޭރުގެ ސަރުކާރުން އެއްބަސްވާކަމަށާއި، އެ އަތޮޅުގެ މައްޗަށް އޮތް އިނގިރޭސިންގެ އިސްތިއުމާރާ ދެކޮޅަށް ނަޝީދު ވާހަކަ ދައްކަވާފައިވާކަން އެ ދަތުރުފުޅުތަކުގެ ޔައުމިއްޔާތަކުން އެގެން އެބަހުއްޓެެވެ. އަދި ނަޝީދުގެ ވެރިކަމުގައި ޗާގޮސްގެ މިލްކުވެރިކަމާމެދު އެއްވެސް ވަރަކަށް އަޑުއުފުލާ، އަދި މިލްކުވިރިކަން ހޯދުމަށް ރާއްޖެއިން ވަކާލާތު ކޮށްފައެއްވެސް ނުވެއެވެ.
ގިނަ ބަޔަކު ދެކޭ ގޮތުގައި މިމައްސަލާގައި މިސަރުކާރާ ތަފާތު ވިސްނުމެއް ނަޝީދު ގެންގުޅުއްވަނީ، ރައީސް ސާލިހާމެދު އޮތް ސިޔާސީ ވާދެވެރިކަމެއްގެ ސަބަބުންނެވެ.
