އިދިކޮޅު ފަރާތްތަކުން ޗާގޯސް މައްސަލާގައި ސަރުކާރާއި ދެކޮޅަށް ދުއްވި ދެބޯގިރި ދިޔައީ ޗޮކުންކަމަށް ޓުވަރިޒަމް މިނިސްޓަރ ޑރ.މައުސޫމް ވިދާޅުވެއްޖެއެވެ.
މައުސޫމް މިހެން ވިދާޅުވީ ރާއްޖެއާއި މޮރިޝަސްގެ ކަނޑުގެ ސަރަޙަދުން ފުށުއަރާ ސަރަޙައްދުގެ އިން ވަކި ކުރުމުގެ މައްސަލަ، ރާއްޖެއަށް ބޮޑު ބައި ލިބޭގޮތަށް، ރާއްޖެއިން ހުށައެޅިގޮތަށް، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސްއިން)އިން ނިންމުމާއި ގުޅިގެން ކުރެއްވި ޓުވީޓުގައެވެ.
މިމައްސަލާގައި ސަރުކާރަށް ތާއީދުކުރާ އެކި މަޤާމުތަކުގައި ތިއްބެވި ބޭފުޅުން ގެންދަވަނީ މިއީ ސަރުކާރަށް ލިބުނު ބޮޑު ކާމިޔާބީއެއް ކަމަށްބުނެ ޓުވީޓް ކުރައްވަމުންނެވެ. މައުސޫމް ވިދާޅުވި މިއީ އިދިކޮޅު ފަރާތްތަކުން ސަރުކާރާއި ދެކޮޅަށް ދުއްވި ދެބޯގިރި ފަނުފުލުން ދިޔަ ކަމެއްކަމަށެވެ. އަދި އިންތިޚާބު މިހާ ކައިރިވެފައި އޮތްވައި އެހެން ދެބޯގިރިއެއް ހޯދުމަށް މައުސޫމް އިދިކޮޅު ފަރާތްތަކަށް ގޮވާލާފައެވެ.
ޗަގޯސް ދެބޯގެރި ޗޮކުން! ސެޕްޓެމްބަރު 9 މިހާރު ވަރަށް ކައިރިވެއްޖެ! އަވަހަށް އެހެން ދެބޯގެރިއެއް ހޯދާ!
– ޑރ.މައުސޫމް ވިދާޅުވިއެވެ.
މައުސޫމް މިހެން ވިދާޅުވިއިރު އިދިކޮޅު ޕްރޮގްރެސިވް ކޯލިޝަން ވަނީ ޗަ ގޯސް ގެ ނަމުގައި މިރޭ އާރޓްފިޝަލް ބީޗުގައި ބޮޑު ޖަލްސާއެއް ބޭއްވުމަށް ނިންމާފައެވެ. އިދިކޮޅު ފަރާތްތަކުން މިހުކުމަށްފަހުވެސް ބުނަމުން ދަނީ މިއީ ރާއްޖޭގެ ރައްޔިތުންނަށް ގެއްލުންވާގޮތަށް ސަރުކާރަށް ފައިދާ ވާގޮތަށް ނިންމާފައި ނިންމުމެއްކަމަށެވެ.
އަދި މިނިންމުމުގެ ސަބަބުން ރާއްޖޭގެ ކަނޑުގެ ބޮޑު ސަރަހައްދެއް ގެއްލި މަސްވެރިންނަށް އެކަމުގެ ގެއްލުން ކުރާނެކަމަށެވެ.
