އިނގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑާއި ޓޮޓްނަމް ހޮޓްސްޕާ ބައްދަލުކުރި މެޗު އެއްވަރުވެއްޖެއެވެ.
ސްޕަރސްގެ ދަނޑުގައި ރޭ ކުޅުނު މިމެޗް ނިމުނީ ދެލަނޑު ދެލަނޑުން ދެޓީމް އެއްވަރުވެގެންނެވެ. ޔުނައިޓެޑުން ގިނައިރު ބޯޅަ ގެންގުޅުނު މިމެޗްގައި ދެޓީމަށްވެސް ހަމަލާ އުފެއްދިފައިވަނީ ދާދި ހަމަހަމަކޮށެވެ. މިމެޗްގެ ފުރަތަމަ ހާފްގައި ޔުނައިޓެޑުން މޮޅަށް ކުޅުނު އިރު ދެވަނަ ހާފްގައި ފެނިގެންދިޔައީ ސްޕަރސްގެ މޮޅު ކުޅުމެވެ. މިމެޗްގެ ފުރަތަމަ ލަނޑު މެޗްގެ 7 ވަނަ މިނެޓްގައި ޔުނައިޓެޑުން ކާމިޔާބު ކުރުމާއެކު އަނެއްކާވެސް މިއީ ސްޕަރސް ތަފާތު ބޮޑު ނަތީޖާ އަކުން ބަލިވެދާނެ މެޗެއްކަމަށް ބެލެވިގެންދިޔައެވެ. މިލަނޑު ޔުނައިޓެޑަށް ކާމިޔާބުކޮށްދިނީ ޖޭޑަން ސަންޗޯއެވެ.
ލީގުގައި މީގެ ކުރިން ނިއުކާސަލާ ދެކޮޅަށް ކުޅުނު މެޗްގައިވެސް ފެނިގެންދިޔަ ގޮތަށް މިމެޗްގެ ފުރަތަމަ ހާފްގައިވެސް ސްޕަރސް ފެނިގެންދިޔައީ އާދައިގެ ގޮތަކަށެވެ. އަދި ޔުނައިޓެޑަށް ވަނީ މިހާފްގައި ލީޑު ފުޅާކުރާނެ ގިނަ ފުރުސަތުތަކެއްވެސް ލިބިގެންގޮސްފައެވެ. އެގޮތުން މެޗްގެ 44 ވަނަ މިނެޓްގައި މާކަސް ރަޝްފަޑް ވަނީ ޔުނައިޓެޑުގެ ދެވަނަ ލަނޑު ޖަހައިދީފައެވެ.
މިމެޗްގައި ސްޕަރސްގެ ފުރަތަމަ ލަނޑު މެޗްގެ 56 ވަނަ މިނެޓްގައި ކާމިޔާބުކޮށްދިނީ ޕެޑްރޯ ޕޯރޯއެވެ. މިއާއެކު ސްޕަރސްއިން މެޗްގެ ނަތީޖާ ހަމަހަމަ ކުރެވޭތޯ ކުރަމުންދިޔަ މަސައްކަތް އިތުރު ކުރިތަން ފެނިގެންދިޔައެވެ. މިގޮތުން ސްޕަރސްއަށް މި ހާފްގައި ވަނީ ގިނަ ފުރުސަތުތަކެއް ލިބިގެން ގޮސްފައެވެ. އޭގެތެރޭގައި ސޮން ހެއުން-މިން އާއި އެރިކް ޑައަރއަށް ލިބިގެންދިޔަ ދެ ފުރުސަތު ފާހަގަކޮށްލެވެއެވެ. މިމެޗްގައި ސްޕަރސްއަށް ނަތީޖާ ހަމަހަމަކޮށްދިނީ މެޗްގެ 79 ވަނަ މިނެޓްގައި ސޮންއެވެ.
މިމެޗް އެއްވަރު ވުމުން ޔުނައިޓެޑް މިހާރު ވަނީ ތާވަލްގެ ހަތަރުވަނައަށް ފަހަތަށް ޖެހިލާފައެވެ. އެއީ ކުޅުނު 31 މެޗުން ލިބިފައިވާ 60 ޕޮއިންޓާއެކުއެެވެ. އަދި ގަދަ ހަތަރަކުން ޖާގައެއް ހޯދުމަށް މަސައްކަތް ކުރަމުންދާ ސްޕަރސް އުޅެނީ 33 މެޗުން ލިބިފައިވާ 54 ޕޮއިންޓާއެކު ތާވަލްގެ ފަސްވަނައިގައެވެ.
