ކަނޑުގެ ޤާނޫނުގެ ބައިނަލްއަޤުވާމީ ޓްރައިބިއުނަލް (އިޓްލޮސް) ގައި މިހާރު ކުރިއަށްދާ މައްސަލާގައި ދިވެހި ސަރުކާރުން ނަގާފައިވާ ގާނޫނީ ސްޓޭންޑްގެ ސަބަބުން ދިވެހިރާއްޖޭގެ ޙާއްސަ އިގްތިސާދީ ސަރަހައްދުން ބައެއް އުނިވުމުގެ ކަންބޮޑުވުން އޮތުމާ ގުޅިގެން، މިމައްސަލާގައި ދިވެހި ދައުލަތާއި ރައްޔިތުންގެ ހައްގުތައް އެންމެ ފުރިހަމައަށް ހިމާޔަތްކުރުމަށް ކުރެވޭ މަސައްކަތަށް ޓްރައިބިއުނަލްގައި އޮތް މައްސަލަ ނިންމުމުގެ ކުރިން، އިތުރަށް ވަގުތު ދިނުމުގެ ގޮތުން، މައްސައާއިމެދު ކޯޓުން ވަކިގޮތެއް ނުނިންމާ މަޑުޖައްސާ ދިނުމަށް އެމްއެންޕީން އިޓޮލްގައި އެދިއްޖެއެވެ.
އެމްއެންޕީގެ ފަރާތުން އެޕާޓީގެ ރައީސް ކާނަލް ނާޒިމް ސޮއި ކުރައްވާ އިޓޮލްސްގެ ރައީސް، އަދި ފަނޑިޔާރު އަލްބާރޓް ޖޭ. ހޮފްމަންއަށް އެޑްރެސްކޮސް ފޮނުވި ސިޓީގައިވަނީ އެ ޕާޓީގެ ކަންބޮޑުވުމުގެ ގޮތުގައި ތިންކަމެއް ފާހަގަ ކޮށްފައެވެ.
އޭގެ ތެރޭގައި، އިޓޮލްސްގެ ނިންމުމުން، ބައިނަލް އަގުވާމީ ގާނޫނުތަކުން ރާއްޖެއަށް ލިބޭ ޚާއްސަ އިކޮނޮމިކް ޒޯންގެ 200 މޭލު ހިމެނޭ ސަރަހައްދުން ބައެއް ގެއްލިގެން ދިއުމުގެ ފުރުސަތު އޮތުން ހިމެނެއެވެ. އަދި މިމައްސަލާގައި ރާއްޖޭގެ ބަންޑާރނައިބު ވަކި ސްޓޭންޑެއް ނަގާފައިވަނީ، ރާއްޖޭގެ ގާނޫނު އާސީގައި ބަޔާކުރާ އުސޫލުގެ މަތިން ނޫންކަމަށް ފާހަގަކޮށް، މިމައްސަލާގައި ގާނޫނު އަސާސީގައި ބަޔާންކުރާ އުސޫލުތަކާއި އެއްގޮތަށް، ރައްޔިތުންގެ މަޖިލިހުގެ ރުހުން ހޯއްދަވާފައި ނުވާކަމަށް ވިދާޅުވެފައި ވެއެވެ. އަދި މިމައްސަލާގައި ސަރުކާރުން އާންމު ރައްޔިތުނަށް ޖަވާބުދާރީ ވެފައި ނުވާއިރު، ރައްޔިތުންގެ މަޖިލިހުން މިމައްސަލާގައި ސަރުކާރު ޖަވާބުދާރީވުމަށް ކުރި މަސައްކަތްތަކަށް ހުރަސްއަޅާފައި ވާކަމަށްވެސް ވިދާޅުވެފައި ވެއެވެ.
އޭގެ އިތުރަށް އެމްއެންޕީގެ ސިޓީގައި ވަނީ، ރައީސް ސާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީން ޔޫއެންގައި މީގެކުރިން ރާއްޖެއިން ނަގާފައިވާ ސްޓޭންޑްތައް ބަދަލު ކޮށްފައިވާއިރު، މިސިޓީ ދިވެހިރައްޔިތުންނަށް ސިއްރު ކޮށްފައިވާކަމަށް ވިދާޅުވެފައެއެވެ. އަދި މޮރިޝަސްއިން މި މައްސަލަ ކޯޓުގައި ކާމިޔާބު ކުރުމަށް، އިސްވެ ދެންނެވުނު ސިޓީ ބޭނުން ކޮށްފައިވާކަންވެސް ފާހަގަ ކޮށްފައި ވެއެވެ.
އެމްއެންޕީން އޮޓޮލްސްގެ ރައީސަށް އެޑްރެސްކޮށް ފޮނުވާފައިވާ ސިޓީގައި 3 ވަނަ ނުކުތާއެއްގެ ގޮތުގައި ފާހަގަކޮށްފައިވަނީ، ރާއްޖެއިން ޔޫއެންގައި މީގެކުރިން ނަގާފައިވާ ސްޓޭންޑަށް ބަދަލު ގެނެސް، ޗާގޮސްއަކީ މޮރިޝަސްގެ ބައެއްކަމަށް މި ސަރުކާރުން ބަލައިގަތުމާއި ގުޅިގެން، ދިވެހިރާއްޖޭގެ ސްޕެޝަލް އިކޮނޮމިކް ޒޯންއިން ބައެއް ގެއްލުމުގެ ފުރުސަތު އޮތްކަމަށާއި، އެއީ ރާއްޖޭގެ އިސްތިގުލާލު ގުރުބާންވެގެން ހިގައިދާނޭކަމެއްކަމެއް ކަމުގައެވެ.
އެހެންކަމުން އެމްއެންޕީން އެދިފައިވަނީ، މިމައްސަލާގައި މިއަދު ކޯޓުން ގޮތެއް ނުނިންމާ، މިމައްސަލާއަށް ހައްލު ހޯދުމުގެ ފުރުސަތު ދިވެހި ރައްޔިތުންނަށާއި އަދި ބައިނަލްއަގުވާމީ ފަރަތާތްތަކަށްވެސް ދިނުމަށެވެ.
އެހެންނަމަވެސް، އެއީ ކޮން ހައްލުތަކެއްކަމެއް މިސިޓީގައި ފާހަގަ ކޮށްފައެއް ނުވެއެވެ.
ޗާގޮސްގެ މައްސަލާގައި ރާއްޖޭގެ ޚާއްސަ އިގްތިސާދީ ސަރަހައްދުން ބައެއް ދޫކޮށްލުމަށް ދިވެހި ސަރުކާރުން އެއްބަސްވެފައިވާ ކަމަށާއި، އަދި އެއީ ރާއްޖޭގެ ގާނޫނު އަސާސީއާއި ޚިލާފަށް، ރައްޔިތުންގެ މަޖިލިހުގެ ރުހުމާނުލާ ދިވެހި ސަރުކާރުން ނިންމާފައިވާ ނިންމުމެއް ކަމަށް ބުނެ، އިދިކޮޅު ޕީޕީއެމްއިންވެސް ވަނީ އިންޓަރނޭޝަނަލް ޓްރައިބިއުނަލް ފޮރ ދަ ލޯ އޮފް ދަ ސީ (އިޓޮލްސް)ގެ ރެޖިސްޓްރަށް މިމަހުގެ 26ވަނަ ދުވަހު ސިޓީއެއް ފޮނުވާފައެވެ.
މިމައްސަލާގައި އިދިކޮޅު ފަރާތްތަކުން ފާޅުކުރަމުންދާ ކަންބޮޑުވުންތަކަށް ރައްދު ދެމުން ސަރުކާރުން ވަނީ، ޗާގޮސްއާއި ރާއްޖެއާދެމެދު ޚިޔާލުތަފާތު ވެފައިވާ މެރިޓައިމް ބައުންޑަރީގެ މައްސަލާގައި ރައީސުލްޖުމްހޫރިއްޔާ ޢަމަލުކުރައްވާފައި ވަނީ އެމަނިކުފާނަށް ޤާނޫނު އަސާސީން ދީފައިވާ ބާރުތަކުގެ ބޭރުންކަމަށް ޕްރޮގްރެސިވް ކޮންގްރެސް ކޯލިޝަނުން ކޮށްފައިވާ ތުހުމަތުތައް ދޮގުކޮށްފައެވެ.
އިދިކޮޅު ފަރާތްތަކުން ކުރަމުންދާ ތުހުމަތުތަކަށް ރައްދު ދީ ސަރުކާރުން ނެރެފައިވާ ބަޔާނުގައި ވިދާޅުވެފައިވަނީ، މި ސަރަޙައްދުގެ އިމަކީ މިހާތަނަށް އައި އިރު، ބައިނަލްއަޤުވާމީ ކަނޑާބެހޭ މުޢާހަދާގެ ދަށުން ކަނޑައެޅިފައިވާ ސަރަޙައްދެއް ނޫންކަމުގައެވެ. ހަމަ އެއާއެކު، ރާއްޖޭގެ ޤާނޫނުތަކާއި ބައިނަލްއަޤުވާމީ ޤާނޫނުތަކުގެ ދަށުން، ރާއްޖޭގެ ޚާއްޞަ އިޤްތިޞާދީ ސަރަޙައްދުގެ އިން ކަނޑައެޅުމަކީ ދިވެހި ސަރުކާރަށް ޤާނޫނު އަސާސީން ލިއްބައިދީފައިވާ ބާރަކަށްވީހިނދު އެ މަސްއޫލިއްޔަތު ދިވެހި ސަރުކާރުން ފުރިހަމައަށް ކަށަވަރުކުރާނެކަމަށްވެސް މިބަޔާނުގައި ވިދާޅުވެފައި ވެއެވެ.
އަދި މޮރިޝަސްއިން އިޓްލޮސްއަށް މިމައްސަލަ ހުށައެޅުމާއެކު، އިޓްލޮސް މެދުވެރިކޮށް މިމައްސަލައަށް ޙައްލުހޯދައި ރާއްޖޭގެ އެންމެ މަތީ މަސްލަހަތު ހިމާޔަތްކުރުމަށް ދިވެހިރާއްޖޭގެ ސަރުކާރުން ނިންމެވީ ވަޒީރުންގެ މަޖީލީހުން އެކަމާއި ގުޅޭގޮތުން މަޝްވަރާކުރެއްވުމަށް ފަހުގައި ކަމަށްވެސް ބަޔާނުގައި ސަރުކާރުން ވިދާޅުވެފައި ވެއެވެ.
މި ބަޔާނުގައި، ސަރުކާރުން ވަނީ، އިދިކޮޅު ޕީޕީއެމްއިން ދައުވާ ކުރާގޮތަށް، ޗާގޮސްގެ މައްޗަށް ރާއްޖޭގެ ސިޔާދަތީ ބާރު ހިގާކަމަށް އެއްވެސް އިރަކު ރާއްޖެއިން ދައުވާ ކޮށްފައި ނުވާކަންވެސް ފާހަގަ ކޮށްފައެވެ.
