ސޫދާންގައި ހަނގުރާމަ ކުރަމުންދާ ދެ ފެކްޝަނުން 72 ގަޑިއިރަށް ހަނގުރާމަ ހުއްޓާލުމަށް އެއްބަސް ވެެއްޖެކްނަ އެމެރިކާގެ ސެކެޓްރީ އޮފް ސްޓޭޓް އެންތަނީ ބްލިންކަން އިއުލާން ކުރައްވައިފިއެވެ.
އެންތަނީ ބްލިންކަން ހޯމަދުވަހު ވިދާޅުވެފައިވަނީ، ސޫދާންގެ އަސްކަރިއްޔާއިންނާއި އަދި ޕަރަމިލިޓަރީ ރެޕިޑް ސަޕޯޓު ފޯރސްއިން 72 ގަޑިއިރަށް ހަނގުރާމަ ހުއްޓާލާނެކަމުގެ ޔަގީންކަން ދީފައިވާ ކަމުގައެވެ.
"މި މުއްދަތުގައި، ހަނގުރާމަ ހުއްޓާލުމަށް ވީ އެއްބަސްވުން ދެމެހެއްޓުމަށް ދެފަރާތަށްވެސް އެމެރިކާއިން ގޮވާލަން،" ބްލިންކަން ނެރުއްވި ބަޔާނެއްގައި ވިދާޅުވެފައި ވެއެވެ.
އޭނާ އިތުރަށް ވިދާޅުވެފައިވާ ގޮތުގައި، ސަރަހައްދީ ބާރުތަކާއި، ބައިނަލްއަގުވާމީ ފަރާތްތަކާއި އަދި އޭގެ އިތުރުން ސޫދާން މަދަނީ ފަރާތްތަކާއި ގުޅިގެން ދާއިމީ ސުލްހައަކާއި ހަމައަށް ދިއުމަށް އެމެރިކާއިން އިސްނަގައިގެން މަސައްކަތް ކުރާނެކަމަށެވެ.
"ސޫދާންގެ ފަރާތްތަކާއި އަދި ބައިނަލްއަގުވާމީ އެކުވެރި ފަރާތްތައް ގުޅިގެން، ސޫދާންގައި ހުރިހާ މަސްލަހަތެއް ހިމާޔަތްކުރެވޭ މަދަނީ ސަރުކާރެއް އެކުލަވާލުމުގެ މަސައްކަތް އަހަރެމެން ކުރިޔަށް ގެންދާނަން،" ބްލިންކަން ވިދާޅުވެފައި ވެއެވެ.
މީގެ ކުރިން ބައެެއް މީޑިއާތަކުން ރިޕޯޓު ކޮށްފައިވާ ގޮތުގައި، ސޫދާންގައި ހަނގުރާމަ ކުރަމުންދާ ދެ ފެކްޝަން ސުލްހަ ކުރެވޭތޯ އިސްރާއީލުންވެސް ދަނީ މަސައްކަތް ކުރަމުންނެވެ.
ސޫދާންގައި ހަނގުރާމަ ކުރަމުން ދަނީ، އެގައުމުގެ އަސްކަރިއްޔާގެ އެންމެ އިސް ޖެނެރަލް އަބުދުލް ފައްތާހު އަލް ބުރުހާންއަށް ވަފާތެރި ސިފައިންނާއި، އޭނޭގެ ކުރީގެ ޑެޕިއުޓީ، އަދި އެގައުމުގެ ސަރުކާރުގެ ރެޕިޑް ސަޕޯޓު ފޯރސްގެ އިސް ޖެނެރަލް މުހައްމަދު ހަމްދާން ޑަލްގީއަށް ވަފާތެރި ސިފައިންނާ ދެމެދުއެވެ.
މި ދެ ޖެނެރަލުންނަކީ، ސޫދާންގައި 30 އަހަރުގެ ދިގުވެރިކަމެއް ކުރި އުމަރު އަލް ބަޝީރުގެ ވެރިކަން، 2021 ވަނަ އަަހަރު ބަޢާވާތަކުން ވާއްޓާލުމުގެ އެންމެ އިސް ދެ މޭސްތިރިންނެވެ. އެހެންނަމަވެސް ވެރިކަމުގެ ބާރުތައް ބަހާނެ ގޮތަކާމެދު ދެ ޖެނެރަލުންގެ މެދުގައި އުފެދިފައިވާ ޚިޔާލުތަފާތުވުމުގައި ފެށިގެންދިޔަ ހަނގުރާމާގައި މިހާރުވަނީ ސޫދާންގެ ވެރިރަށް ޚަރުތޫމުގައި 400 އަށްވުރެ ގިނަ މީހުން މަރުވެފައެވެ.
