ދިވެހި އަސްކަރިއްޔާއަކީ ދިވެހި ރައްޔިތުންނާއި، ދިވެހި ދައުލަތުގެ ދިފާއީ އައްޑަނަ ކަމަށް ޖުމްހޫރީ ޕާޓީ ރިޔާސީ ކެނޑިޑޭޓް އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހީމް ވިދާޅުވެއްޖެއެވެ.
ސިފައިންގެ އަހަރީ ދުވަހުގެ މުނާސަބަތާއި ގުޅިގެން ގާސިމް ކުރެއްވި ޓްވީޓެއްގައި ވިދާޅުވީ ދިވެހި ސިފައިންގެ 131 ވަނަ އަހަރީ ދުވަހުގެ ތަހްނިޔާ ސިފައިންގެ އެންމެހާ ވެރިންނަށާއި، އެންމެހާ ސިފައިންގެ ބޭކަލުންނާއި، ސިފައިންގެ ލޮބުވެތި އާއިލާތަކަށް އަރިސް ކުރާ ކަމަށެވެ.
މީގެއިތުރުން، ދިވެހި ސިފައިންނަކީ ކެރޭ، ހިތްވަރުގަދަ، ޢަޒުމު ނުގުޑާ އަދި އެންމެ ފަހު ނޭވާއާ ޖެހެންދެންވެސް، ޤައުމުގެ ޙައްޤުގައި ޤުރްބާންވާން ތައްޔާރަށް ތިއްބެވި ބައެއްކަމަށް ވެސް ޤާސިމް ވިދާޅުވިއެވެ.
ދިވެހިސިފައިންގެ 131 ވަނަ އަހަރީދުވަހުގެ ތަޙްނިޔާ ސިފައިންގެ އެންމެހާ ވެރިންނަށާއި، އެންމެހާ ސިފައިންގެ ބޭކަލުންނާއި، ސިފައިންގެ ލޮބުވެތި ޢާއިލާތަކަށް އަރިސް ކުރަން. ޝައްކެތްނެތް ގޮތުގައި ދިވެހި ޢަސްކަރިއްޔާއަކީ ދިވެހި ރައްޔިތުންނާ ދިވެހި ދައުލަތުގެ ދިފާޢީ އައްޑަނަ. ތާރީޚް ކަށަވަރުކޮށްދެނީ، ދިވެހިސިފައިންނަކީ ކެރޭ، ހިތްވަރުގަދަ، ޢަޒުމުނުގުޑާ އަދި އެންމެ ފަހު ނޭވާއާ ޖެހެންދެންވެސް، ޤައުމުގެ ޙައްޤުގައި ޤުރްބާންވާން ތައްޔާރަށް ތިއްބެވި ބައެއްކަމެވެ. ތިޔައީ ދިވެހީންގެ ފަޚުރުވެރި ދިފާޢީ ބާރެވެ.
– ޤާސިމް ވިދާޅުވިއެވެ.
ރާއްޖޭގެ މިނިވަންކަމާއި ސިޔާދަތާއި އިސްތިޤުލާލު ޙިމާޔަތްކުރުމުގެ އެންމެ އިސްވާޖިބު އަދާކުރަނީ ދިވެހި ސިފައިންނެވެ. ރާއްޖޭގައި ސަލާމަތީ ބާރެއްގޮތުގައި ރަސްމީކޮށް ދިވެހި ސިފައިންގެ ޚިދުމަތް ދޭން ފަށާފައިވަނީ މީލާދީން 1892 ވަނަ އަހަރުގެ އޭޕްރީލް މަހުގެ 21 ދުވަހުއެވެ. މިއަދަކީ ދިވެރާއްޖޭގެ ސިފައިންގެ ޚިދުމަތަށް 131 އަހަރު ފުރުނު ދުވަހެވެ.
ސިފައިންގެ ޚިދުމަތުގެ މާޒީގެ ދިގު ތާރީޚުގައި ޤައުމަށް ދިމާވި ޢުދުވާނީ ޙަމަލާތަކާއި، ކާރިޘާތަކާއި، އަދި އުފާވެރިކަމުގެ އެތައް ކަމެއްގައި އެންމެ ކުރީސަފުގައި އަބަދުވެސް ޙަރަކާތްތެރިވަނީ ދިވެހި ސިފައިންނެވެ. ދިވެހި ސިފައިންގެ ޚިދުމަތަށް 131 އަހަރު ފުރުން ފާހަގަކުރަމުންދާއިރު، ސިފައިންގެ ޚިދުމަތް ޤާއިމުކުރެވުނު ދުވަހުން ފެށިގެން މިއަދާ ހަމައަށްވަނީ ބޮޑެތި ކުރިއެރުންތައް ލިބިފައެވެ. ދުނިޔޭގެ އެންމެ މަތީ ފެންވަރުގެ ޢަސްކަރީ ތަމްރީން ލިބިފައިވާ އަންހެން އަދި ފިރިހެން ސިފައިން، ސިފައިންގެ ތެރޭގައި ހިމެނޭކަން ފާހަގަކުރެވެއެވެ.
ސިފައިން އަބަދުވެސް ތިބެނީ އަސްކަރީ އަޚްލާޤާއި ސުލޫކީ މިންގަނޑުގެ މަތީގައި ސާބިތުވެ، އެމީހުންގެ ހުވަޔާ އެއްގޮތަށް، ޤާނޫނު އަސާސީގެ ޙިމާޔަތުގައި ހަށިގަނޑާއި ފުރާނައިން، ޤައުމަށްޓަކައި ޤުރުބާންވާން ތައްޔާރަށެވެ.
