ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަންދިން ޓެރަރިސްޓު ހަމަލާގައި ބައިވެރިވި ކަމަށް ތުހުމަތުކޮށް ދައުވާ އުފުލާފައިވާ މީހުންގެ މައްޗަށް ހިންގާ ޝަރީއަތުގެ ހުކުމް އަންނަ އޮގަސްޓު މަހުގެ 31 ވަނަ ދުވަހު ކުރާ ގޮތަށް، ޝަރީއަތް ކުރިއަށް ގެންދާނެ ގޮތުގެ ތާވަލެއް އަރުވައިފިއެވެ.
މެއި 6، 2021ގައި ނަޝީދަށް އަމާޒުކޮށް ބޮމެއް ގޮއްވާލި މައްސަލާގައި ދައުވާކުރަނީ ގއ. ކޮނޑޭ ފޮޅޭމާ ތަހުމީން އަހުމަދާއި، މއ. ފޭރުގޭ މުޖާޒް އަހުމަދާއި، ނ. މަނަދޫ ނޫރީގޭ އަލީ ހައިޝަމާއި، ގއ. ވިލިނގިލީ ހުދުރުވާގޭ ފަހުމީ އަލީއާއި، މ. ކުދެހިގޭ އިސްހާގު އަދި އއ. މާޅޮސް، އަސަރީގޭ މުހައްމަދު ނާޒިމްގެ މައްޗަށެވެ.
މިދިޔަ އަހަރުގެ މެދު ތެރޭގައި ޝަރީއަތުގެ އަޑުއެހުންތަކެއް ބާއްވާފައި، ގާތްގަނޑަކަށް އަށް މަހެއްހާ ދުވަހު އަޑުއެހުމެއް ނުބޭއްވި ދިޔުމަށް ފަހު މިއަދު ބޭއްވި އަޑުއެހުމުގައި ކުރިއަށް ގެންދިޔައީ ކޮންމެ ހަސްމަކު ވެސް އިފްތިތާހީ ބަޔާން ހުށަހެޅުމެވެ. އެންމެ ފުރަތަމަ ދައުލަތުން ވަނީ އިފްތިތާހީ ބަޔާން ހުށައަޅުއްވާފައެވެ. ދައުލަތުގެ ވަކީލު ވަނީ މި މައްސަލައިގެ ޙާދިސާއާއި، ދައުވާ އުފުލާފައިވާ ފަރާތްތަކާއި އެމީހުންގެ މައްޗަށް ދައުވާކުރި ސަބަބުތަކަށް އަލިއަޅުވާލައްވާފައެވެ.
އެއަށްފަހު ދައުވާލިބޭ ފަރާތްތަކުން ވަނީ އިފްތިތާޙީ ބަޔާން އިއްވާފައެވެ. އެގޮތުން ދައުވާއަށް އިންކާރު ކުރާކަމާއި ދިފާއު ބިނާ ކުރާނެ ގޮތް ބަޔާން ކުރައްވައި ދައުވާލިބޭ ފަރާތްތަކުން ވަނީ އިފްތިތާޙީ ބަޔާން އިއްވާފައެވެ.
ގާޒީ ވަނީ ކުރިއަށް ހުރި ޝަރީއަތުގެ އަޑުއެހުންތައް ކުރިއަށް ގެންދާނެ ގޮތުގެ ތާވަލު ހިއްސާ ކުރައްވާފައެވެ. އެ ތާވަލާ އެއްގޮތަށް ކުރިއަށްދާނަމަ 31 އޯގަސްޓު 2023 ގައި މައްސަލައިގެ ޙުކުމް ކުރެވޭނެކަމަށް ލަފާ ކުރައްވާ ކަމަށް ގާޒީ ވިދާޅުވިއެވެ.
ނަމަވެސް ދިފާއީ ހެކިންގެ ހެކިބަސް ނަގަން އޮތް ފަހު އަޑުއެހުމާއި ހުލާސާ ބަޔާން އިއްވަން ތާވަލުގައި އޮތް އަޑުއެހުމާ ދެމެދު އެންމެ 16 ދުވަސް އޮތުމުން ހުލާސާ ބަޔާން އިއްވަން އޮތް ތާރީހު ފަސްކޮށްދޭން ބައެއް ދިފާއީ ވަކީލުން އެދުނެވެ. އެކަމާ ގުޅިގެން ގާޒީ ސޮފްއަތު ވިދާޅުވީ އެ ކަމަށް ޝަރީއަތުން ފަހުން ރިއާޔަތްކުރައްވާނެ ކަމަށެވެ. އަދި އެ ތާރީހު ފަސްކުރާނަމަ، ހުކުމް ކުރަން ތާވަލުގައި މިހާރު އޮތް ތާރީހު ވެސް އެއަށް ވުރެ ފަސްވާނެ ކަން ގާޒީ ފާހަގަ ކުރެއްވިއެވެ.
ބޮމުގެ ހަމަލާއާ ގުޅިގެން ޖުމްލަ ނުވަ މީހަކު ހައްޔަރުކުރިއެވެ. އޭގެ ތެރޭގައި ބޮން ގޮއްވާލަން ރިމޯޓަށް ފިއްތާލި އަދުހަމް އަހުމަދު ވަނީ އޭނާއާ ދެކޮޅަށް ކުރި ދައުވާތަކަށް އިއުތިރާފްވެފައެވެ. އޭނާގެ މައްޗަށް ކޯޓުން ވަނީ 23 އަހަރުގެ ޖަލު ހުކުމެއް އިއްވާފައެވެ.
