ކުރިޔަށް އޮތް ރިޔާސީ އިންތިޚާބަށް އިދިކޮށް ޕީޕީއެމްގެ ޓިކެޓްގައި ނިކުތުމަށް މާލޭ ސިޓީގެ ކައުސިލަރ އާދަމް ރަމީޒު މޭޔަރު މުއިއްޒުއަށް ކެމްޕޭން ކުރާކަމަށް ބުނާ މައްސަލާއި އޭނާއާއި ދެކޮޅަށް ހެކިބަސްދޭން ޝުޖާއާއި، ޝިޔާމް ސުލޫކު ކޮމެޓީއަށް ހާޒިރުވާން އަންގާފައި ނުވާކަމަށް ޕީޕީއެމްއިން ބުނެފިއެވެ.
މި މައްސަލާގައި ރަމީޒް ސުލޫކީ ކޮމިޓީއަށް މިއަދު މެންދުރު ހާޒިރުކޮށް ވަނީ ބަޔާންވެސް ނަގާފައެވެ. ޚަބަރު އޮންލައިނަށް މައުލޫމާތު ލިބިފައިވާ ގޮތުގައި، ޕީޕީއެމްގެ ރިޔާސީ ކެންޑިޑޭޓަކު ހުންނަވަނިކޮށް އެހެން ފަރާތަކަށް ކެމްޕޭން ނުކުރާކަމަށް ހެކިބަސް ދެއްކެވުމަށް ރަމީޒުވަނީ ޕީޕިއެމްގެ ބައެއް ސެނެޓަރުން ސުލޫކީ ކޮމިޓީއަށް ހުށަހަޅުއްވާފައެވެ.
އިދިކޮޅު ޕީޕީއެމް އަދި ޕީއެންސީގެ ލީޑަރޝިޕުން ސުލޫކީ ކޮމިޓީއަށް ހުށަހެޅުނު މިމައްސަލާގައި ސުލޫކީ ކޮމިޓީން ރަމީޒާއި ކޮށްފައިވާ ސުވާލަކީ ޔާމިންގެ ކެނޑިޑަސީއަށް އަސަރު ކުރާގޮތަށް ޕީޕީއެމްގެ ސެނެޓަރުންނާއި ވާހަކަ ދައްކާ އަދި އެކި ތަންތަނުގައި ވާހަކަ ދައްކާތޯއެވެ.
ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަހުމަދު ޝިޔާމާއި ޕީއެންސީގެ ނައިބު ރައީސް އަދި ސިޓީ ކައުންސިލްގެ މެމްބަރު އިބްރާހިމް ޝުޖާއު މިރޭ 9:30 އަށް ސުލޫކީ ކޮމިޓީ އަށް ހާޒިރު ކުރަން އެންގި ކަމަށް އަޑު ފެތުރުމުން މީޑިއާ އިން އެ ވާހަކަ ރިޕޯޓް ކުރުމާއެކު، ޕީޕީއެމްގެ ތަރުޖަމާން ހީނާ ވަލީދު އެކަން ދޮގުކުރެއްވިއެވެ.
މިކަމާއި ގުޅިގެން ޝުޖާ ވިދާޅުވީ މިޚަބަރު އެހީވެސް މީޑިއާއިން ކަމަށެވެ. އޭނާ ހުރީވެސް ރަށުގައި ކަމަށާއި، އަދި ޝިޔާމަށްވެސް މިރޭ ޕާޓީގެ އެއްވެސް ކޮމެޓީއަކަށް ހާޒިރުވާން އަންގާފައި ނުވާކަމަށެވެ. ޝުޖާ ވިދާޅުވީ ޕީޕީއެމްގެ ރިޔާސީ ކެނޑިޑޭޓަކީ ރައީސް ޔާމީންކަމަށެވެ. އަދި އެއީ ޕާޓީން ނިންމާފައި ނިންމުމެއްކަމަށާއި، އެނޫން ގޮތަކަށް ޕީޕީއެމްއިން ކަމެއް ނުނިންމާނެކަމަށެވެ.
ކުރިއަށް އޮތް ރިޔާސީ އިންތިޚާބުގައި ޕީޕީއެމްގެ ޓިކެޓް ދީފައިވަނީ ރައީސް ޔާމީނަށެވެ. ނަމަވެސް ރައީސް ޔާމީން މިވަގުތު ތަންފީޒު ކުރަމުންދާ 11 އަހަރުގެ ޖަލުހުކުމާއި އެކު އެމަނިކުފާނަށް އިންތިޚާބުގައި ވާދަކުރުމުގެ ފުރުސަތެއް ނެތެވެ. ރައީސް ޔާމީނަށް އިންތިޚާބުގައި ވާދަކުރުމުގެ ފުރުސަތު ލިބޭނީ ހައިި ކޯޓުން ނުވަތަ ސްޕްރީމް ކޯޓުން އެމަނިކުފާނުގެ ޖަލު ހުކުމް ބާތިލުކޮށްފި ކަމަށް ވާނަމައެވެ.
