މަހާތީރު މެލޭޝިއާގެ ބޮޑުވަޒިރުކަން ކުރެއްވި ދުވަސްވަރު ދައުލަތުގެ ވަސީލަތްތަކުވެ ބޭނުން ނަހަމަ ގޮތުގައި ބޭނުންކޮށްގެން އަމިއްލަ އާއިލާއަށް މުއްސަދިކަން ހޯދާ ދީފައިވާކަމަށް އެގައުމުގެ މިހާރުގެ ބޮޑުވަޒީރު އަންވަރު އިބުރާހިމް ވިދާޅުވުމާއި ގުޅިގެން އަންވަރާއި ދެކޮޅަށް އަބުރުގެ ދައުވާ ކުރެއްވުމަށް މަހާތީރު ނިންމަވައިފިއެވެ.

ފާއިތުވެދިޔަމަހު އަންވަރުގެ ޕާޓީ ޕީއާރުކޭގެ ކޮންގްރެސްގައި ވާހަކަ ދައްކަވަމުން، މަހާތީރުގެ އާއިލާ އޭނާގެ ބޮޑުވަޒީރުކަމުގައި ދައުލަތުގެ ވަސީލަތްތައް ބޭނުންކޮށްގެން މުއްސަދިކަން ހޯދާފައިވާކަމަށް އަންވަރު ވިދާޅުވުމާއި ގުޅިގެން މަހާތީރުވަނީ އަންވަރު ކުރެއްވި މިތުހުމަތުތައް އަބުރާ ނުގެންދަވައިފިނަމަ އަބުރުގެ ދައުވާ ކުރައްވާނޭކަމުގެ އިންޒާރު ދެއްވާފައެވެ.

އެހެންނަމަވެސް މަހާތީރުގެ ޑިމާންޑަށް ޖަވާބު ދެއްވަމުން އަންވަރުގެ ލޯޔަރު ވިދާޅުވެފައިވަނީ މަހާތީރުގެ އަބުރުގެ ދައުވާއަށް ކޯޓުގައި ޖަވާބުދާރީ ވުމަށް އަންވަރު ތައްޔާރަށް ހުންނެވި ކަމުގައެވެ.

އަންވަރުގެ ޕީއާރުކޭ ޕާޓީގެ ކޮންގްރެސްގައި ވާހަކަ ދައްކަވަމުން އަންވަރު ވިދާޅުވެފައިވަނީ މަހާތީރުގެ އާއިލާއަށް މުއްސަދިކަން ހޯދާދައިދީފައިވަނީ މަހާތީރު ބޮޑުވަޒީރުކަން ކުރެއްވިއިރު ދައުލަތުގެ ވަސީލަތްތައް ނުހަމަ ގޮތުގައި ބޭނުން ކުރައްވައިގެން ކަމުގައެވެ.

މަހާތީރު މެލޭޝިއާގެ ބޮޑުވަޒީރުކަން ކުރައްވާފައިވަނީ 1981 އިން 2003 އަށް އަދި 2018 އިން 2020 އަށެވެ.

އަންވަރު މަހާތީރަށް ކުރެއްވި ތުހުމަތުތައް އަބުރާ ގެންދިއުމަށް ޑިމާންޑްކޮށް ސިޓީ ފޮނުވާފައިވަނީ ފާއިތުވި މާރޗްމަހުގެ 28ވަނަ ދުވަހުއެވެ. އަދި މަހާތީރުވަނީ، އަންވަރުގެ ތުހުމަތުތައް އަބުރާ ގެންގޮސް މާފަށް އެދުމަށް ދިން މުހުލަތު މިއަދަށް ހަމަވާކަން އަންވަރަށް ހަނދާން ކޮށްދީފައެވެ.

އަންވަރު ވިދާޅުވެފައިވަނީ ކޮންގްރެސްގައި ވާހަކަ ދައްކަވަމުން ކުރެއްވި ތުހުމަތުތައް ސާބިތު ކުރެވޭވަރުގެ އޭނާގެ އަތުގައި ހުރި ކަމަށެވެ.