މި ރަމަޟާންމަހުގެ ފުރަތަމަ 15 ދުވަހުގެ ފުލުހުންގެ އިދާރާއަށް ހުށަހަޅާފައިވާ ކުށުގެ މައްސަލަތަށް ބަލާއިރު އެންމެ ގިނައީ ޓްރެފިކް މައްސަލަތައް ކަމަށް އެއިދާރާއިން ހާމަކޮށްފިއެވެ.
ފުލުހުންގެ ތަފާސްހިސާބުތަކުން ދައްކާގޮތުގައި ރަމަޟާންމަހުގެ ފުރަތަމަ 15 ދުވަހު ހުށަހެޅުނު މައްސަލަތަކުގެ ތެރެއިން 175 މައްސަލައަކީ ޓްރެފިކް އެކްސިޑެންޓުތަކުގެ މައްސަލައެވެ. މީގެތެރެއިން 151 މައްސަލަ ރިޕޯޓްކޮށްފައިވަނީ މާލޭ ސަރަޙައްދުންނެވެ.
އެހެން މައްސަލަތަކަށް ބަލާއިރު، މަސްތުވާ ތަކެތީގެ 167 މައްސަލައާއި މީހުންނަށް ޙަމަލާދިނުމުގެ 77 މައްސަލައާއި ބިރުދެއްކުމުގެ 44 މައްސަލައާއި ގެވެށި އަނިޔާގެ 19 މައްސަލަ ހުށަހެޅިފައިވެއެވެ.
އަތޮޅުތަކުގެ ކުށުގެ ޙާލަތަށް ބަލާއިރު، ރަމަޟާން މަހުގެ ފުރަތަމަ 15 ދުވަހު އެންމެ ގިނައިން މައްސަލަ ރިޕޯޓްކުރީ އދ.އަތޮޅުންނެވެވެ. އެއީ ޖުމުލަ 21 މައްސަލައެވެ. ގިނައީ މަސްތުވާތަކެތީގެ މައްސަލަތަކެވެ.
ކޮންމެ އަހަރެއްގެވެސް ރަމަޟާންމަހަކީ ކުށްކުރުން އިތުރުވާ މަހެއްކަން ފުލުހުންގެ ތަފާސްހިސަބުތަކުން ދައްކައެވެ. ކުރީގެ އަހަރުތަކަށް ބަލާއިރު ޢާންމުގޮތެއްގައި އެންމެބޮޑަށް އިތުރުވަނީ ވައްކަމާއި މަސްތުވާތަކެތީގެ މައްސަލައެވެ.
