ނިމިދިޔަ ގުރައިދޫ ދާއިރާގެ ބައި އިލެކްޝަން ވެގެން ދިޔައީ ވެރިކަން ކުރާ ކޯލިޝަންގައި ހިމެނޭ އެންމެ ބޮޑު ޕާޓީ އެމްޑީޕީއަށް އެތައް ގޮތަކުން ޚާއްސަ އިންތިޚާބަކަށެވެ.
މިގޮތުން، މިއީ ގުރައިދޫ ދާއިރާގައި އިދިކޮޅު ޕީޕީއެމްއިން ދިގު ޒަމާންތަކަކަށް ދަމަހައްޓަމުން އައި މެޖޯރިޓީއަށް ނިމުން ގެނުވި އިންތިޚާބަކަށް ވުމުގެ އިތުރުން މި އިންތިޚާބު ވެގެންދިޔައީ އެމްޑީޕީ ދެ ފެކްޝަނަކަށް ބެހި އެއްޕާޓީއެއްގެ އެތެރޭގައި ދެ ސިޔާސީ ހަރަކާތެއް ހިންގާން ފެށިފަހުން ބޭއްވިގެންދިޔަ ފުރަތަމަ އިންތިޚާބު ކަމުގައެވެ.
ހަމަ އެއާއެކު ނިމިދިޔަ ގުރައިދޫ ދާއިރާގެ ބައި އިލެކްޝަންއަކީ ރިޔާސީ އިންތިޚާބަށް އެންމެ 5 މަސްދުވަހަށް ވެފައިވަނިކޮށް ބޭއްވިގެންދިޔަ މަޖިލިސް ބައި އިލެކްޝަނަކަށް ވުމާވެސް އެކު، މި އިންތިޚާބު ވެގެން ދިޔައީ، ނަތީޖާ ނެރުން ރައީސް ސާލިހަށް ވަރަށްވެސް މުހިންމު އިންތިޚާބަކަށް ކަމުގައެވެ.
ސަބަބަކީ ރިޔާސީ އިންތިޚާބު ބޯމަތިވެފައި ވަނިކޮށް، ރައްޔިތުންގެ މަޖިލިހުގެ ބައި އިލެކްޝަންއަކުން އެމްޑީޕީ ބަލިވެއްޖެނަމަ، ކުރިޔަށް އޮތް ރިޔާސީ އިންތިޚާބު މި ސަރުކާރަށް ކާމިޔާބު ނުވާނެކަމަށް ބުނަމުން އަންނަ އަޑުތައް އިތުރަށް ވަރުގަދަވެގެން ދިއުމުގެ އިތުރުން، އެމްޑީޕީގެ އެތެރޭގައި އޮތް ސިޔާސީ ވާދަވެރިކަމުގެ ތެރެއިން ސަރުކާރާ ދެކޮޅަށް ކުރަމުންއަންނަ ސިޔާސީ މަސައްކަތްތަކަށްވެސް އިތުރު ހިތްވަރެއް ލިބި، ސިޔާސީ ގޮތުން ސަރުކާރު ބަލިކަށި ވެގެން ދިއުމުގެ ފުރުސަތު އިންތިހާއަށް އޮތުމެވެ.
އަދި މި ހުރިހާ ސަބަބުތަކުގެ އިތުރަށް، ގުރައިދޫ ދާއިރާގެ ބައި އިލެކްޝަން ވެގެންދިޔައީ، އެމްޑީޕީގެ އެތެރޭގައި އުފެދި ހުޅު ރޯވެފައިވާ ސިޔާސީ ފިތުނަވެރި ކަމުގައި، އެޕާޓީގެ ރައީސް މުހައްމަދު ނަޝީދުގެ ފެކްޝަންގެ އެހީތެރިކަމާ ނުލާ، ރައީސް ސާލިހު ގިނިކަންޏާ ނިކުންނަވާ އެމްޑީޕީއަށް ކާމިޔާބު ކޮށްދެއްވި ފުރަތަމަ ބޮޑު އިންތިޚާބުކަމުގައިވެސް މެއެވެ.
އެހެންކަމުން ގުރައިދޫ ދާއިރާގެ ބައި އިލެކްޝަންއިން އިދިކޮޅު ޕީޕީއެމްގެ މައްޗަށް އެމްޑީޕީން ހޯދި ކާމިޔާބީ ފާހަގަވެގެން ދަނީ އެޕާޓީން ހަމައެކަނި އިދިކޮޅު ޕާޓީގެ މައްޗަށް ހޯދި ކާމިޔާބީއެއްގެ ގޮތުގައެއް ނޫނެވެ. އޭގެ އިތުރަށް މި ނަތީޖާއަކީ އެމްޑީޕގީގެ އެތެރޭގަ އޮތް ސިޔާސީ ވާދަވެރިކަމުގެ މައްޗަށްވެސް ރައީސް ސާލިހު ހޯއްދެވި ފަތަހައެއްގެ ގޮތުގައިވެސް މި ކާމިޔާބީ މޭރުންކުރާންޖެހޭ ސަބަބުތައް ވަރަށްވެސް ގިނައެވެ.
ނަޝީދާ ނުލާ އެމްޑީޕީއަށް އިންތިޚާބުތައް ކާމިޔާބު ނުވާނެކަމަށް ކުރެވޭ ހީތަށް ބިލާހަކަށް!
އެމްޑީޕީއަކީ އެޕާޓީގެ ތާރީޚަށް ނަޒަރެއް ހިންގާލާއިރު އިންތިޚާބުތަކަށް ފަރިތަ ޕާޓީއެއްކަމުގައި ދަންނަވާން ޖެހެއެވެ. އެއީ ފާއިތުވެދިޔަ ރިޔާސީ އިންތިޚާބުތަކާއި ރައްޔިތުންގެ މަޖިލިހުގެ އިންތިޚާބުތަކުތަކުގައި އެޕާޓީން ވާދަކޮށް ބައެއް އިންތިޚާބުތައް އެޕާޓީއަށް ނާކާމިޔާބު ވެފައިވި ނަމަވެސް، މި އިންތިޚާބުތަކުގައި އެޕާޓީން ދައްކާފައިވާ ހިތްވަރާއި ކޮށްފައިވާ ކެމްޕޭންތައް ތަފާތު ކަމުގައި ގަބޫލުކުރާން ޖެހޭތީއެވެ.
ހަމައެއާއެކު އިސްވެ ދެންނެވުނު ގިނަ އިންތިޚާބުތަކުގައި ވާދަވެރި ކެމްޕޭންތައްކޮށް، އެމްޑީޕީން ތަފާތު ދައްކާފައިވާއިރު، މި ތަފާތުތަކާއެކު ދެއްކި ހިތްވަރުގެ "ކުރެޑިޓް" ނުވަތަ އޭގެ "ސިޔާސީ މަންފާ" ފާއިތިވެދިޔަ ދިގު މާޒީގައި ނަންގަވާފައި ވަނީ އެޕާޓީގެ އެންމެ ބޭފުޅެއް ކަމުގައިވެސް ގަބޫލުކުރާން ޖެހެއެވެ.
އެމްޑީޕީން ކާމިޔާބުކޮށްފައިވާ އިންތިޚާބުތައް ފައިތުވި ތަނުގައި ކާމިޔާބު ކޮށްފައިވަނީ ޕާޓީގެ ރައީސްކަމުގެ މަގާމް ފާއިތުވި ދިގު މުއްދަތުގައި ފުރުއްވަމުން ގެންދަވާ އެޕާޓީގެ މިހާރުގެވެސް ރައީސް މުހައްމަދު ނަޝީދުގެ ކުޅަދާނަކަމުން އެކަނިކަމަށް މޭރުންކޮށް، ނަޝީދާ ނުލާ އެމްޑީޕީ ބޮޑު އިންތުޚާބަކަށް ނުކުމެގެން ވާނީ ނާކާމިޔާބުކަމަށް މޭރުންކުރެވި، ފާއިތުވެދި މުއްދަތުގައި އެ ހީކުރުންތައް ވަނީ ވަރަށްވެސް ރަގަޅަށް އެމްޑީޕީގެ މެމްބަރުންގެ ވިސްނުމުގައި ބިންވަޅު ނަގާފައި ކަމުގައި ދަންނަވާން ޖެހެއެވެ.
މިގޮތުން، ރައީސް ސާލިހު ވެރިކަމަށް ވަޑައިގަތުމުގެ ކުރިންވެސް އަދި ޚުދު އެމަނިކުފާނު 2018ގެ ރިޔާސީ އިންތިޚާބު ކާމިޔާބު ކުރެއްވުމާއި ހަމައިންވެސް ގިނަ ބަޔަކު ގަބޫކުރާ އެއް ހަގީގަތެއްގެ ގޮތުގައި އޮތީ އެމްޑީޕީގެ ރައީސް މުހައްމަދު ނަޝީދުގެ އެހީތެރިކަމާ ނުލާ އެޕާޓީއަށް އާންމު އިންތިޚާބެއް ކާމިޔާބު ކުރުން އެއީ މުސްތަހީލު ކަމެއްގެ ގޮތުގައެވެ.
އޭގެ އެއް ހެއްކަކީ، ޕާޓީގެ އެތެރޭގައި އޮތް ސިޔާސީ ވާދަވެރިކަމާއި އަދި ފިތުނަވެރިކަމާއެކުވެސް، ފާއިތުވެދިޔަ އަހަރުގެ ފެބްރުއަރީމަހު ބޭއްވުނު ކޮމަންޑޫ ދާއިރާގެ ވާދަވެރި ބައިލެކްޝަން ކާމިޔާބު ކޮށްދިނުމަށް، ރައީސް ސާލިހާއެކީ ނަޝީދު ކެމްޕޭނަށް ނިކުމެވަޑައިގެންނެވުމެވެ. އެހާތަނުންވެސް ގިނަބަޔަކު ގަބޫލުކުރަމުން އައި އެއްކަމަކަށް ވެގެން ދިޔައީ، ކޮމަންޑޫ ދާއިރާގެ ބައި އިލެކްޝަންވެސް އެމްޑީޕީއަށް ކާމިޔާބުވި އެއް ސަބަބެއްގެ ގޮތުގައި ނަޝީދު ބައި އިލެކްޝަންގެ ކެމްޕޭނަށް ނިކުންނެވި ނިކުންނެވުން ވެގެން ދިޔަކަމުގައެވެ.
އެހެންނަމަވެސް ދުވަސްތައް މާޒީއާއެކުވެ، އެމްޑީޕީގެ އެތެރޭގައި އުފެދުނު ސިޔާސީ ކޯޅުންތަކަށް ހައްލެއް ނުހޯދި، ފާއިތުވި ރިޔާސީ ޕްރައިމަރީއަށްފަހު ނަޝީދުވަނީ ސިޔާސީ ވަކި ހަރަކާތެއް އެމްޑީޕީގެ އެތެރޭގައި ހިންގަވާން ފައްޓަވާފައެވެ. އަދި ފާއިތުވި ގުރައިދޫ ދާއިރާގެ ބައި-އިލެކްޝަން ވެގެން ދިޔައީ ނަޝީދުގެ އެހީތެރިކަން ނުލިބުނުތާ، ނަޝީދުގެ ފެކްޝަނުން އެމްޑީޕީގެ ކެނޑިޑޭޓާއި ދެކޮޅަށް އެންޓި ކެމްޕޭން ކުރަމުން ދަނިކޮށް، ރައީސް ސާލިހުގެ ފެކްޝަނުން ނިކުމެ ކާމިޔާބު ކުރި އިންތިޚާބެއް ކަމުގައެވެ. މިއީ އެމްޑީޕީގެ ތާރީޚުގައި ނަޝީދުގެ އެހީތެރިކަމާ ނުލާ އެޕާޓީން ކާމިޔާބުކުރި ފުރަތަމަ އިންތިޚާބުވެސްމެއެވެ.
އެމްޑީޕީ ބަދަލު ވެއްޖެ! ނަަޝީދު އެއީ މާޒީ!
ފާއިތުވި ގުރައިދޫ ދާއިރާގެ ބައި-އިލެކްޝްންގައި އެމްޑީޕީގެ ކެނޑިޑޭޓަށް ވޯޓު މަދުކުރުމަށް ނަޝީދުގެ ފަރާތުން މަސައްކަތް ކުރަމުންދާކަމުގެ ތުހުމަތުކޮށް، އެމްޑީޕީގެ ޗެއަރޕާސަން ފައްޔާޒު އިސްމާއިލް ވަނީ، "އެތަން ދެކެން މަޑުން ނުހުންނާނެ" ކަމުގެ އިންޒާރުވެސް އެންމެ ފަހުން ނަޝީދަށް ދެއްވާފައެވެ.
އަދި ވޯޓުލުން ކުރިޔަށް ދިޔައިރުވެސް، ނަޝީދަށް ތާއީދުކުރާ ސޯޝަލް މީޑިއާ ހޭންޑްލްތަކުން ގެންދިޔައީ އިދިކޮޅު ކެނޑިޑޭޓަށް ވޯޓު ދިނުމަށް އިލްތިމާސްކޮށް ކެމްޕޭންވެސް ކުރަމުންނެވެ.
އެހެންކަމުން، ނިމިދިޔަ ބައި އިލެކްޝަން އެމްޑީޕީގެ ކެނޑިޑޭޓަށް ކާމިޔާބުވިޔަ ނުދިނުމަށް ނަޝީދު ހުރިހާ ގޮތަކުންވެސް އެންޓި ކެމްޕޭން ކޮށް، އޭގެ ސިޔާސީ މަންފާ ނެންގެވުމަށް ގަދައަޅާ މަސައްކަތް ކޮށްފައިވާކަމީ ކަށަވަރުވެ ޔަގީންވާން އޮތް ކަމެކެވެ.
އެހެންނަމަވެސް، ވާދަވެރިކޮށް ކުރިޔަށްދިޔަ ބައި-އިލެކްޝަންގެ ވޯޓުލުން ނިމި، ނަތީޖާ އިއުލާން ކުރެވިގެންދިޔަ ހިސާބުން، މި ދާއިރާގައި އިދިކޮޅު ޕީޕީއެމްއިން ކުރަމުން އައި "ރަސްކަން" ނިމުމަކަށް ގެނެސް، އެމްޑީޕީން ހޯދި ތާރީޚި ކާމިޔާބީ ވެގެންދިޔައީ، ނަޝީދުގެ އެހީތެރިކަމާ ނުލާ އިންތިޚާބަކަށް ނިކުމެ އެމްޑީޕީ ހޯދި ފުރަތަމަ ކާމިޔާބީ ކަމުގައެވެ.
އަދި އެމްޑީޕީގެ އެތެރޭގައި އަދިވެސް އޮތް ސިޔާސީ ދެކޮޅުވެރިކަމާއެކު، އޭގެ އިތުރުން ރައީސް ސާލިހާއި ދެކޮޅަށް ނަޝީދުގެ ފެކްޝަނުން ކުރަމުން އައި ގިނަގުނަ މަސައްކަތްތަކާއެކުވެސް ރައީސް ސާލިހު މި ހޯއްދެއްދެވި ކާމިޔާބީއިން، ނަޝީދާ ނުލާ އެމްޑީޕީއަށް އިންތިޚާބުތައް ކާމިޔާބު ނުކުރެވޭނެކަމަށް ހީކުރެވިފައިވާ ހީކުރުންތައް މާޒީއާއެކުވެ، އެޕާޓީގައި އާއި އާންމުގެ މެދުގައިވެސް ނަޝީދަށް އޮތް ތާއީދުވެސް އަބަދަށްޓަކާ މާޒިވެ ދިޔައީ ކަމުގައި ގަބޫލުކުރާން މިއަދު މިވަނީ މަޖުބޫރު ވެފައެވެ.
އަދި މި އިންތިޚާބު ވެގެން ދިޔައީ، ނަޝީދާ ނުލާ އެމްޑީޕީ ނޯނާނެ ކަމަށް ބުނާ ބުނުންތަކާއި މިބީދައިން ހީކުރެވެމުންދާ ހީކުރުންތައް ބިލާކަށް ވެ، އެމްޑީޕީގައި ނަޝީދަށް އޮތްކަމަބުނާ ތާއީދުވެސް މާޒީއާއެކުވެ ދިޔައީ ކަމުގައި ގަބޫކުރާން މަޖުބޫރުކުރުވި އިންތިޚާބެއް ކަމުގައެވެ.
One Response
ބަޔަކަށް ނަޝީދު އައި ނުލާ ވޯޓެއް ނުލިބޭނެ ކަމަށް ހީވަނީއެވެ. އަސްލު ނަޝީދު ނެތުމުން އެމްޑީޕީ އަށް މާގިނަ ވޯޓް ލިބޭނެއެވެ. ނަޝީދުގެ އެހުންނަ ދީނާއި ދެކޮޅު ސިޔާސަތުގެ ސަބަބުން އޭނައާއި ވައި ނޭޅެން ތިބޭ މީހުން މާގިނައެވެ. ހަމަ ގައިމުވެސް އަޅުގަޑާއި އާއިލާ ނަޝީދު ހުރި ކޮޅަކަށް ނާރާނަމެވެ. މިކަން މިގޮތަށް ކުރާނެ ކިތަންމެ ބަޔަކު ދަންނަމެވެ. ޖުމްހޫރީ ޕާރޓީއިން ދުރަށް ދާ އެންމެންނަކީ ވެސް އަެގެ މީހުނެވެ. އާންމު ދިވެހިންނަކީ އިސްލާމްދީން ދެކެ ލޯބިވާ މީހުންނެވެ.