އިއްޔެ ބޭއްވިގެންދިޔަ ގުރައިދޫ ދާއިރާގެ ބައި އިލެކްޝަންއަކީވެސް، ރައީސް ސާލިހުގެ ހިނގަމުންދާ ރިޔާސީ ދައުރުގައި މީގެ ކުރިން ބޭއްވިގެންދޔަ ބައި އިލެކްޝަންތަކެކޭ އެއްފަދައިން އެތައް ގޮތަކުން ޚާއްސަވެގެންދިޔަ ބައި އިލެކްޝަންއެކެވެ.

މިގޮތުން މި ބައި އިލެކްޝަންގައި އިދިކޮޅު ކެންޑިޑޭޓް ހުސައިން ރިޒާގެ މައްޗަށް އެމްޑީޕީގެ ކެނޑިޑޭޓް އިބުރާހިމް ޝާޒު ހޯއްދެވި ތާރީޚީ ކާމިޔާބީއަކީ އާ ގާނޫނުއަސާސީ ވުޖޫދު ވުމަށްފަހުވެސް، މިދާއިރާގެ ރައްޔިތުންގެ މަޖިލިހުގެ އިންތޚާބެއްގެ ނަތީޖާއިން އިދިކޮޅު ޕީޕީއެމްގެ ފިކުރުގެ މައްޗަށް ކުރި ހޯއްދެވުނު ފުރަތަމަފަހަރެވެ. މި ދާއިރާގެ ގޮނޑި ފާއިތުވި 14 އަހަރުގައި ފުރުއްވާފައިވަނީ، ފާއިތުވި ފެބްރުއަރީމަހު، ކެންސަރުގެ އާލާސްކަންފުޅަށް ފަރުވާ ހޯއްދަވަމުން ގެންދަވަނިކޮށް އަވަހާރަވި އިބުރާހިމް ރިޒާއެވެ.

ރިޒާގެ މުޅި ޕާލަމެންޓްރީ ހަޔާތް ހޭދަ ކުރައްވާފައިވަނީ، މިހާރު ވެރިކަން ކުރާ ކޯލިޝަންގެ އެންމެ ބޮޑު ޕާޓީ އެމްޑީޕީގެ ފިކުރާއި ދެކޮޅަށެވެ. އާގާނޫނު އަސާސީއަށްފަހު އެންމެ ފުރަތަމަ ރިޒާ މަޖިލިސް މެމްބަރުކަން ކުރެއްވީ އޭރުގެ ޑީއާރުޕީގެ މެމްބަރެއްގެ ގޮތުގައެވެ. އެއަށްފަހު ރައީސް މައުމޫނާއި ރައީސް ޔާމިންގެ "ބޮޑު ހައިޖާނަށްފަހު" ރިޒާ މަސައްކަތް ކުރައްވާފައިވަނީ ޕީޕީއެމްގެ ފިކުރާ އެއްކޮޅަށެވެ. 2019 ވަނަ އަހަރުގެ ރައްޔިތުންގެ މަޖިލިހުގެ އިންތިޚާބުގައިވެސް ރިޒާ ރައްޔިތުންގެ މަޖިލީހަށް އިންތިޚާބުވެ ވަޑައިގަތީ އިދިކޮޅު ޕީޕީއެމްގެ ސްލޮޓުގައެވެ.

އެހެންނަކަމުން މި ބައި އިލެކްޝަންގެ ކުރިންވެސް، އަދި އިންތިޚާބާއި ހަމައަށްވެސް ގިނަ ބަޔަކު ގަބޫލުކުރަމުން އައީ ގުރައިދޫ ދާއިރާއަކީ ދެގޮތެއް ނުވާނެ ޕީޕީއެމްގެ ދާއިރާއެއްގެ ގޮތުގައެވެ.

އޭގެ ނަތީޖާއަކަށް ވެގެން ދިޔައީ، ނިމިދިޔަ ގުރައިދޫ ދާއިރާގެ ބައި އިލެކްޝަންގެ ނަތީޖާއަކީ ތާރީޚީ ނަތީޖާއަކަށް ވެގެން ދިއުމުގެ އިތުރުން، މި ނަތީޖާއިން ގުރައިދޫ ދާއިރާއާގައި އެތައް އަހަރެއްވަންދެން އިދިކޮޅު ޕީޕީއެމްއިން ކުރަމުންއައި "ރަސްކަމަށް" ނިމުން އައިސް އެމްޑީޕީގެ ތާރީޚުގައިވެސް އެޕާޓީއަށް ފުރަތަމަ ފަހަރަށް މިދާއިރާގެ މަޖިލިސް ގޮނޑި ކާމިޔާބު ކުރެވިގެން ދިއުމެވެ.

ނަތީޖާއެއްގެ ގޮތުން، ކުރިޔަށް އޮތް ރިޔާސީ އިންތިޚާބަށް 5 މަހަށް ވެފައިވަނިކޮށް، އިދިކޮޅު ޕީޕީއެމް ބަލިކޮށް، އެމްޑީޕީން މި ހޯދި ކާމިޔާބީއަކީ ހަގީގަތުގައިވެސް ބޮޑު ބަދަލެއްގެ ގޮތުގައި ސިފަކުރާން ޖެހެއެވެ. އަދި ރައްޔިތުންގެ މަޖިލިހުގެ ދެ ބައި އިލެކްޝަނެއްގައި އިދިކޮޅު ޕާޓީ ބަލިކޮށް، އެންމެ ފަހުން އެމްޑީޕީގެ ރައީސް މުހައްމަދު ނަޝީދުގެ އެހީތެރިކަމާވެސް ނުލާ ރައީސް ސާލިހު މިހޯއްދެވި ބޮޑު ކާމިޔާބީއަކީ ހަގީގަތުގައިވެސް އެތައް ގޮތަކުން ޚާއްސަވެގެންދިޔަ "ސިޔާސީ އިމްތިހާނެއް"ކަމީ ކަށަވަރުވެ ޔަގީންވާން އޮތް ކަމެކެވެ.

ނަޝީދުގެ އެހީތެރިކަމާ ނުލާ ރައީސް ސާލިހު ހޯއްދެވި ފުރަތަމަ ކާމިޔާބީ؟ ނަޝީދަކީ މާޒީ!

ރައީސް ސާލިހު ވެރިކަމަށް ވަޑައިގަތުމުގެ ކުރިންވެސް އަދި ޚުދު އެމަނިކުފާނު 2018ގެ ރިޔާސީ އިންތިޚާބު ކާމިޔާބު ކުރެއްވުމާއި ހަމައިންވެސް ގިނަ ބަޔަކު ގަބޫކުރާ އެއް ހަގީގަތަކަށް ވެފައި އޮތީ އެމްޑީޕީގެ ރައީސް މުހައްމަދު ނަޝީދުގެ އެހީތެރިކަމާ ނުލާ އެޕާޓީއަށް އާންމު އިންތިޚާބެއް ކާމިޔާބު ކުރުން އެއީ މުސްތަހީލު ކަމެއްގެ ގޮތުގައެވެ.

އަދި، ރައީސް ސާލިހުގެ ވެރިކަމުގެ މެދަކާ ހަމައިން ރައީސް ސާލިހާއި ނަޝީދާއި ދެބޭފުޅުންގެ މެދުގައި އުފެދެންފެށި ކޯޅުންތަކާއެކުވެސް ނަޝީދުވަނީ ފާއިތުވި 2022 ވަނަ އަހަރުގެ ފެބްރުއަރީމަހު ބޭއްވުނު ކޮމަންޑޫ ދާއިރާގެ ބައި އިލެކްޝަން އެމްޑީޕީއަށް ކާމިޔާބުކޮށްދިނުމަށް އެދާއިރާއަށް ވަޑައިގެން މަސައްކަތް ކޮށް ދެއްވާފައެވެ. އެހާތަނުންވެސް ގިނަބަޔަކު ގަބޫލުކުރަމުން އައި އެއްކަމަކަށް ވެގެން ދިޔައީ، ކޮމަންޑޫ ދާއިރާގެ ބައި އިލެކްޝަންވެސް އެމްޑީޕީއަށް ކާމިޔާބުވި އެއް ސަބަބެއްގެ ގޮތުގައި ނަޝީދު ބައި އިލެކްޝަންގެ ކެމްޕޭނަށް ނިކުންނެވި ނިކުންނެވުން ވެގެން ދިޔަކަމުގައެވެ.

އެހެންނަމަވެސް އޭރުވެސް ރައީސް ސާލިހާއި ނަޝީދުއާއި ދެބޭފުޅުންގެ މެދުގައި އުފެދިފައި އޮތް ސިޔާސީ ދެކޮޅުވެރިކަމާއި، ނުތަނަވަސްކަމާއެކު ދެބޭފުޅުން ޕާޓީއަށް ގޮނޑި ކާމިޔާބު ކުރުމަށް އެކީގައި ކެމްޕޭނަށް ނިކުންނެވި ނަމަވެސ،ް އެއިންތިޚާބުގެ ކާމިޔާބީއަށްފަހުވެސް ސިޔާސީ ޚިޔާލުތަފާތު ވުންތަކަށް ހައްލެއް ނުހޯދި، ދާދިފަހުން ބޭއްވިގެންދިޔަ އެމްޑީޕީގެ ރިޔާސީ ޕްރައިމަރީއަށްފަހު ނަޝީދުވަނީ ވަކި ސިޔާސީ ހަރާތެއް އެމްޑީޕީގެ އެތެރޭގައި ހިންގަވާން ފައްޓަވާފައެވެ.

އެއަށްފަހު ކުރިޔަށް އޮތް ރިޔާސީ އިންތިޚާބަށް ރައީސް ސާލިހާއި ދެކޮޅަށް، ޖުމުހޫރީ ޕާޓީއާއެކީ ވަކި ކޯލިޝަނެއް ހައްދަވާ، ނަޝީދު އެންމެ ފަހުން މަސައްކަތް ކުރައްވާފައިވަނީ ނިމިދިޔަ ގުރައިދޫ ދާއިރާގެ ބައި އިލެކްޝަންގެ ގޮނޑިވެސް އެމްޑީޕީއަށް ކާމިޔާބު ވިޔަ ނުދިނުމަށެވެ.

މިގޮތުން ނަޝީދުގެ ފަރާތުން އެމްޑީޕީގެ ކެނޑިޑޭޓަށް ވޯޓު މަދުކުރުމަށް މަސައްކަތް ކުރަމުންދާކަމުގެ ތުހުމަތުކޮށް، އެމްޑީޕީގެ ޗެއަރޕާސަން ފައްޔާޒު އިސްމާއިލް ވަނީ، "އެތަން ދެކެން މަޑުން ނުހުންނާނެ" ކަމުގެ އިންޒާރުވެސް އެންމެ ފަހުން ނަޝީދަށް ދެއްވާފައެވެ.

އެހެންކަމުން، ނިމިދިޔަ ބައި އިލެކްޝަން އެމްޑީޕީގެ ކެނޑިޑޭޓަށް ކާމިޔާބުވިޔަ ނުދިނުމަށް ނަޝީދު ހުރިހާ ގޮތަކުންވެސް އެންޓި ކެމްޕޭން ކޮށް، އޭގެ ސިޔާސީ މަންފާ ނެންގެވުމަށް ގަދައަޅާ މަސައްކަތް ކޮށްފައިވާކަމީ ކަށަވަރުވެ ޔަގީންވާން އޮތް ކަމެކެވެ.

އެހެންނަމަވެސް، ވާދަވެރިކޮށް ކުރިޔަށްދިޔަ ބައި އިލެކްޝަންގެ ވޯޓުލުން ނިމި، ނަތީޖާ އިއުލާން ކުރެވިގެންދިޔަ ހިސާބުން، މި ދާއިރާގައި އިދިކޮޅު ޕީޕީއެމްއިން ކުރަމުން އައި "ރަސްކަން" ނިމުމަކަށް ގެނެސް، އެމްޑީޕީން ހޯދި ތާރީޚި ކާމިޔާބީ ވެގެންދިޔައީ، ނަޝީދުގެ އެހީތެރިކަމާ ނުލާ އިންތިޚާބަކަށް ނިކުމެ އެމްޑީޕީ ހޯދި ފުރަތަމަ ކާމިޔާބީ ކަމުގައެވެ.

އަދި އެމްޑީޕީގެ އެތެރޭގައި އަދިވެސް އޮތް ދެކޮޅުވެރިކަމާއެކު، އޭގެ އިތުރުން ރައީސް ސާލިހާއި ދެކޮޅަށް ނަޝީދުގެ ފެކްޝަނުން ކުރަމުން އައި ގިނަގުނަ މަސައްކަތްތަކާއެކުވެސް ރައީސް ސާލިހު މި ހޯއްދެއްދެވި ކާމިޔާބީއިން، ނަޝީދާ ނުލާ އެމްޑީޕީއަށް އިންތިޚާބުތައް ކާމިޔާބު ނުކުރެވޭނެކަމަށް ހީކުރެވިފައިވާ ހީކުރުންތައް މާޒީއާއެކުވެ، އެޕާޓީގައި އާއި އާންމުގެ މެދުގައިވެސް ނަޝީދަށް އޮތް ތާއީދުވެސް އަބަދަށްޓަކާ މާޒިވެ ދިޔައީ ކަމުގައި ގަބޫލުކުރާން މިއަދު މިވަނީ މަޖުބޫރު ވެފައެވެ.

ޕީޕީއެމް ދެ ބަލިކޮށް، ރިޔާސީ އިންތިޚާބަށް އޮތް ޔަގީންކަން!

ކުރިޔަށް އޮތް ރިޔާސީ އިންތިޚާބަށް އެންމެ 5 މަހަށް ވެފައިވަނިކޮށް ބޭއްވިގެންދިޔަ ގުރައިދޫ ދާއިރާގެ ބައި އިލެކްޝަން އެމްޑީޕީން ކާމިޔާބު ކޮށްފައިވާއިރު، ރިޔާސީ އިންތިޚާބުގެ ކުރިން ދެން މިވަރުގެ ބޮޑު އިންތިޚާބެއް އަންނާކަށް ނެތެވެ.

އެހެންކަމުން، ކޮންމެ އާންމު އިންތިޚާބަކީވެސް ސިޔާސީ ޕާޓީތަކާއި ޕާޓީތަކުގެ ލީޑަރުންގެ ސިޔާސީ ހަކަތަ ވަޒަންކޮށް ދިނުމަށް ލިބިގެންދާ ރަނުގެ ފުރުސަތަކަށް ވެގެންދާ ބީދައިން، ބެއްވިގެން މިދިޔަ މި ބައި އިލެކްޝަންއަކީ އިންތިޚާބުގައި ވާދަކުރި ޕާޓީތަކާއި އެޕާޓީތަކުގެ ލީޑަރުންގެ ސިޔާސީ ހަކަތައާއި އޮތް ތާއީދު ވަޒަންކޮށްލުމަށް ލިބިގެންދިޔަ ފުރުސަތެއްގެ ގޮތުގައި މޭރުން ކުރާން ޖެހެއެވެ.

ހަމައެއާއެކު މި ބައި އިލެކްޝަންގައި ވާދަކުރި 3 ޕާޓީ ކަމުގައިވާ އެމްޑީޕީއާއި، ޕީޕީއެމް އަދި އެންއެންޕީއަކީވެސް ކުރިޔަށްއޮތް ރިޔާސީ އިންތިޚާބުގައި ވާދަކުރާނޭކަން އިއުލާން ކޮށްފައިވާ 3 ޕާޓީއަށް ވުމާއެކު، މިއިންތިޚާބުންވެސް، ވާދަކުރި ޕާޓީތަކުގެ ލީޑަރުންގެ ސިޔާސީ ހަކަތަ ވަޒަންކުރުމަށް ފުރުސަތު ލިބިގެން ގޮސްފައިވާކަމުގައިވެސް ދަންނަވާން ޖެހެއެވެ.

އެހެންކަމުން، ނިމިދިޔަ ގުރައިދޫ ދާއިރާގެ ބައި އިލެކްޝަންގެ ނަތީޖާއިން އިދިކޮޅު ޕީޕިއެމް ބަލިވެ، އެމްޑީޕީއަށް ލިބިގެން ދިޔަ ކާމިޔާބީ ހަގީގަތުގައިވެސް ސިފަކުރާން ޖެހެނީ، ރިޔާސީ އިންތިޚާބު ކާމިޔާބު ކުރުމަށް ރައީސް ސާލިހަށް އޮތް ޔަގީންކަން އިތުރުކޮށްދީ، އިދިކޮޅު ޕީޕީއެމް އިތުރަށް މާޔޫސް ކޮށްދޭނެ ނަތީޖާއެއްގެ ގޮތުގައެވެ.

އޭގެ އެންމެ ބޮޑު އެއް ސަބަބަކީ، އެޕާޓީން ރިޔާސީ އިންތިޚާބުގައި ވާދަކުރާނޭ ކެނޑިޑޭޓެއްގެ ގޮތުގައި މިހާރު ޖަލުގައި އޮންނެވި ކުރީގެ ރައީސް ޔާމިން އަދިވެސް ހުންނަވާ، ޕާޓީން އިތުރު ބޭފުޅަކު ވާދަކުރައްވަން އަދިވެސް ޔާމިން ފުރުސަތު ދެއްވާފައި ނުވުމެވެ. ރިޔާސީ އިންތިޚާބުގެ ވަގުތު ކުޑަތަންވެ، ޔާމީނަށް ވާދަ ކުރެއްވޭނެކަމުގެ އުއްމީދުތައް އޭގެ އިންތިހާއަށް ފަނޑުވަމުން ދާއިރުވެސް، ޔާމިން ނޫން އެހެން ބޭފުޅަކު ޕާޓީގެ ފަރާތުން ރިޔާސީ އިންތިޚާބުގައި ވާދަކުރުމަށް އޮތް ފުރުސަތުގައި އެމަނިކްފާނު އަތް އަޅުއްވައިގެން ހުންނެވިކަމަށް ޚުދު ޕީޕީއެމްގެ ލީޑަރޝިޕް ގިނަބަޔަކުވެސް ދަނީ ތުހުމަތު ކުރަމުންނެވެ.

ނަތީޖާއެއްގެ ގޮތުން، ގުރައިދޫ ދާއިރާގެ ބައި އިލެކްޝަންގެ ނަތީޖާއިން ހަގީގަތުގައި ރިޔާސީ އިންތިޚާބާމެދު އިދިކޮޅަށް އޮތް ޔަގީންކަން އެތައް ގުނައަކުން ކުޑަވެ، ހަނިވެގެންދާނެކަމީ ކުޑަވެސް ޝައްކެއް އޮތް ކަމެއް ނޫނެވެ.

ނިމިދިޔަ ގުރައިދޫ ދާއިރާގެ ބައި އިލެކްޝަންއިން ހަގީގަތުގައިވެސް ޔަގީންކޮށް ކޮށްދިނީ، ނަޝީދު މާޒީވެއްޖެ ކަމުގެ އިތުރުން، އިދިކޮޅު ޕީޕީއެމްއަށް އޮތްކަމަށް ބުނާ ތާއީދަކީ، "ޓެސްޓު ކުރެވިފައި ނެތް" ބޮޑު ކުށްހީއެއް ކަމުގައި ވެގެންދިއުމުގެ ފުރުސަތު ވަރަށްވެސް ބޮޑުކޮށް އޮތް ކަމެވެ.