މިހާރު ޒަމާނީ ފެންވަރަށް ތަރައްޤީކުރަމުން އަންނަ އަމީނީ މަގުގައި ހުރި ބިޔަ ގަސްތައް ކަނޑައި ނަގާތީ ޝައިޚް އާދަމް ނިޝާން ނުރުހުން ފާޅުކުރައްވައިފިއެވެ.

މިފަދަ ކަންކަމުގައި އަބަދުވެސް ސަރުކާރަށް ފާޑުވިދާޅުވާ ޝައިޚް ނިޝާން ކުރެއްވި ޓްވިޓެއްގައި ވަނީ އަމީނީ މަގުގެ ގަސްތައް ކަނޑަމުންދިޔަ މަންޒަރުގެ ވިޑިއޯ ޙިއްސާކުރައްވާފައެވެ. އަދި ވިދާޅުވެފައިވަނީ މިއީ ހާދަހާވާ ހިތްދަތި މަންޒަރުތަކެއްކަމަށެވެ.

"ރޮމުން ކަރުނަ އަޅަމުންދަނީ ލޮލެއް ނޫނެވެ، ހިތެވެ. އެހެން ނުވާނީ ކީއްވެތޯއެވެ. ހިޔާބޮޑު މިގަސްތަކަކީ އަޅުގަނޑުމެންގެ މަދުރަސީ ދައުރު ނިމުނު އިރު ކުޑަކުޑަކޮށް ހުރި ގަސްތަކެކެވެ. މިވަރަށް ހެދި ބޮޑުވެ ހިޔާލިބިފައި މިވަނީ 20-15 އަހަރުންނެވެ." ޝައިޚް ނިޝާން ވިދާޅުވެފައިވެއެވެ.

އަދި މިއަދު މިގަސްތައް ކަނޑާފައި އަލުން ގަސް އިންދި ނަމަވެސް، އެގަސްތައް ބޮޑުވެ ހިޔާލިބޭއިރު އަޅުގަނޑުމެން ތިބޭނީ ދުނިޔޭގައި ތިބިނަމަ މުސްކުޅިވެފައިކަމަށާ، މިފަދަ ކޮންކްރީޓް ތަރައްޤީއެއް ބޭނުމެއް ނޫންކަމުގައިވެސް ޝައިޚް ނިޝާން ވިދާޅުވެފައިވެއެވެ.

ހާދަހާވާ ހިތްދަތި މަންޒަރުތަކެކެވެ. ރޮމުން ކަރުނަ އަޅަމުންދަނީ ލޮލެއް ނޫނެވެ، ހިތެވެ.
އެހެން ނުވާނީ ކީއްވެތޯއެވެ. ހިޔާބޮޑު މިގަސްތަކަކީ އަޅުގަނޑުމެންގެ މަދުރަސީ ދައުރު ނިމުނު އިރު ކުޑަކުޑަކޮށް ހުރި ގަސްތަކެކެވެ. މިވަރަށް ހެދި ބޮޑުވެ ހިޔާލިބިފައި މިވަނީ 20-15 އަހަރުންނެވެ.
👇 pic.twitter.com/NnULNvQlsa

— Adam Nishan Ibn Ali Adam (@adamnishanali) April 13, 2023

އަދި މިގަސްތައް ކެނޑުމާއި ރުހިޤަބޫލުވާ ހަމައެކަކާއިވެސް މިހާތަނަށް ދިމާނުވާކަމަށް ޝައިޚް ވިދާޅުވިއެވެ. މިފަދަ ކަންކަމުގައި އީޕީއޭއާއި ދެންވެސް ހުރި އިދާރާތައް ކޮބައިތޯ ސުވާލުކުރައްވައި ޝައިޚް ވިދާޅުވީ މީހަކު ވެލައެއްހިފައިފި ނަމަ ނުވަތަ ވެލާ ބިސްކޮޅެއް ނަގައިފިނަމަ މިފަދަ ހުރިހާ އިދާރާއެއް މުއައްސަސާތަކެއް "ދުނިޔެ ރަންވެ، ފުންމައިގެން ތެދުވާތަން" ފެންނަކަމަށެވެ.