ރ. ފުއްގިރި ކުއްޔަށް ދިނުމުގައި ރިޝްވަތު ހިފާ، އަދި މަނީ ލޯންޑަރ ކޮށްފައިވާކަމަށް ބުނެ ދައުލަތުން ކުރީގެ ރައީސް ޔާމިންގެ މައްޗަށް ކޮށްފައިވާ ދައުވާގައި، އަދީބުއާއި ޒިޔަތުގެ ހެކިބަސް ބަލައިގަންނަން ދަށުކޯޓުން ނިންމާފައިވާ ނިންމުމަށް ހައި ކޯޓުން ތާއީދު ކޮށްފިއެވެ.

ރ. ފުއްގިރި މައްސަލާގައި ޔާމިންގެ ފަރާތުން ހައި ކޯޓުގައި އިސްތިއުނާފް ކޮށްފައިވަނީ، ޝަރީއަތުގެ މަރުހަލާގައި ޔާމިންގެ ފަރާތުން ހުށަހެޅި ހުށަހެޅުންތަކާއި ގުޅޭގޮތުން ދަށުކޯޓުން ނިންމި ނިންމުން ބާތިލް ކުރަންޖެހޭކަމަށް ބުނެއެވެ.

އޭގެ ތެރޭގައި ހިމެނެނީ، ކުރީގެ ނާއިބު ރައީސް އަހުމަދު އަދީބާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރ އަބުދުﷲ ޒިޔަތުގެ ހެކިބަސް ބަލައި ނުގަތުމުގެ އިތުރުން، ބައެއް ލިޔެކިޔުންތައް ހޯދުމަށް ޔާމިންގެ ވަކީލުން ހުށަހެޅި ހުށަހެޅުންތަކާއި ގުޅޭގޮތުން ދަށު ކޯޓުން ނިންމާފައިވާ ނިންމުމެވެ.

ދައުލަތުން ހުށަހެޅި ހެކިތައް ޝަރީއަތަށް ބަލައިނުގަތުމަށް ޔާމީންގެ ފަރާތުން ހުށަހެޅީ ޝަރީއަތުގެ ކުރިން ހުށަހަޅާ ހުށަހެޅުމެއްގެ ގޮތުގައެވެ. ސަބަބެއްގެ ގޮތުގައި ޔާމީންގެ ފަރާތުން ފާހަގަ ކޮށްފައިވާ ނުކުތާއަކީ، ހެކި ހުށަހެޅި ސަބަބުތަކާއި އެ ހެކި މެދުވެރިކޮށް ސާބިތުކުރާން އޮތް ކަންކަމާއި ދައުވާތަކާ ގުޅުމެއް ނެތް ކަމެވެ.

ކްރިމިނަލް ކޯޓުގައި މައްސަލަ ބައްލަވާ ގާޒީ އަލީ ނަދީމް ނިންމެވީ އެ ހެކިތައް ބަލައިނުގަންނަން ޖެހޭ ވަރުގެ ޝަރުއީ އަދި ގާނޫނީ ސަބަބެއް ނެތް ކަމަށެވެ. ޔާމީންގެ ފަރާތުން އެ ނިންމުން ހައި ކޯޓުގައި އިސްތިއުނާފު ކުރުމުން، އެ މައްސަލާގައި މިއަދު ކުރި ހުކުމުގައި ވަނީ ދަށު ކޯޓުގެ ނިންމުން ބަދަލުކުރަން ޖެހޭ ވަރުގެ ގާނޫނީ އަދި ޝަރުއީ ސަބަބެއް ޔާމީންގެ ފަރާތުން ފާހަގަ ކުރެވިފައި ނުވާ ކަމަށެވެ.

ހައި ކޯޓުން މިއަދު އިއްވި ހުކުމް ނެރުއްވާފައި 3 ފަނޑިޔާރުންގެ ބެންޗުގެ ދެ ފަނޑިޔާރުންގެ އަޢުލަބިއްޔަތުންނެވެ. އެއީ ފަނޑިޔާރު ދީބަނާޒު ފަހުމީއާއި ފަނޑިޔާރު މުހައްމަދު ފައިސަލްއެވެ. އެ މައްސަލާގައި ތަފާތު ރަޢުޔެއް ނެރުއްވާފައިވަނީ ފަނޑިޔާރު ހަސަން ޝަފީޢުއެވެ. އޭނާގެ ރަޢުޔުގައި ވިދާޅުވެފައިވަނީ، އަދީބާއި ޒިޔަތުގެ ހެކިބަސް ބަލައިގަތުމާމެދު ކުރިމިނަލް ކޯޓުން އަލުން ގޮތެއް ނިންމަން ޖެހޭނެ ކަމުގައެވެ.

އެހެންނަމަވެސް ލިޔުންތައް ހޯދަން އެދުނު މައްސަލާގައި ދަށުކޯޓުގެ ނިންމުން ދެމެހެއްޓުމަށް އޭނާވެސް ތާއީދު ކުރައްވާފައި ވެއެވެ.

ފުއްގިރި މައްސަލާގައި ޔާމިންގެ ފަރާތުން ހައިކޯޓުގައި ކުރި އިސްތިއުނާފްގެ މައްސަލަ ނިމެންދެން، ދަށުކޯޓުގައި މައްސަލާއިގެ ޝަރީއަތް ކުރިޔަށް ނުގެންގޮސް މަޑު ޖައްސަލާމަށް ހައިކޯޓުން ވަނީ އަމުކޮށްފައެވެ. އެހެންނަމަވެސް ހައި ކޯޓުގެ މިއަދު ހުކުމާއެކު މިމައްސަލައިގެ ޝަރީއަތް ދަށު ކޯޓުގައި ކުރިޔަށް ގެންދިއުމަށް މިހާރު އެއްވެސް ހުރަހެއް ނެތެވެ.

ޝަރީއަތުގެ މަރުހަލާގައި އަދީބާއި ޒިޔަތުގެ ހެކިބަސް ބަލައިގަނެވޭނެކަމަށް ހައި ކޯޓުން ނިންމާފައިވާއިރު، އާރަށް މައްސަލާގައި ޔާމިންގެ މައްޗަށް ކޮށްފައިވަނީ "ހަރާމް ހުކުމެއް" ކަމަށް ޔާމިނަށް ތާއީދު ކުރާ ފަރާތްތަކުން ބުނަމުންދާ އެއް ސަބަބަކީވެސް، އެޝަރީއަތުގެ މަރުހަލާގައި އަދީބާއި ޒިޔަތުގެ ހެކިބަސް ބަލައި ބަލައިގެންފައިވާތީއެވެ.