އެމްއެމްޕީއަރްސީގެ ހިޔާނާތުގައި ފައިސާ ލިބުނު ކަމަށް ތުހުމަތުކޮށް މިނިސްޓަރ އޮފް ޔޫތް އެންޑް ސްޕޯޓްސް އަހްމަދު މަހްލޫފްގެ މައްޗަށް ދައުލަތުން އުފުލާފައިވާ ރިޝްވަތު ހިފުމުގެ ދައުވާ އަނބުރާ ގެންނަން ޕްރޮސިކިއުޓާ ޖެނެރަލްގެ އޮފީސް (ޕީޖީ)ން ނިންމި ގޮތަށް ކުރީގެ ރައީސް ޔާމީން އަބްދުލްގައްޔޫމްގެ މައްސަލަވެސް އަބުރާ ގެންދިއުމަށް ޕީޕީއެމް ޕީއެންސީ ކޯލިޝަން ހިންގެވުމުގައި މި ވަގުތު އެންމެ އިސްކޮށް ހުންނެވި އަބްދުއްރަހީމް (އަދުރޭ) ގޮވާލައްވައިފިއެވެ.
ރޭ އިދިކޮޅުން ބޭއްވި ނޫސްވެރިންގެ ބައްދަލުވުމެއްގައި އަބްދުލްރަހީމް ވިދާޅުވީ އެމްއެމްޕީއާރުސީ މައްސަލާގައި ސަރުކާރުން ޔާމީނުގެ މައްސަލަތައް އެކަނި ބަލަނީ ކަނޑައެޅިގެން އެމަނިކުފާނަށް އަނިޔާކުރުމުގެ ބޭނުމުގައި ކަމަށެވެ. އަދި މިއީ މި މައްސަލާގައި އެކަކުގެ މައްޗަށް ކުރާ ދައުވާ ދައުލަތުން އަނބުރާ ގެންދާނަމަ ހުރިހާ އެންމެންގެ މައްޗަށް ކުރާ ދައުވާތައްވެސް ޕީޖީ އިން އަނބުރާ ގެންދަން ޖެހޭނެ ކަމަށް އޭނާ ވިދާޅުވިއެވެ.
މި މައްސަލައިގައި އަޅުގަނޑުމެނަށް އަޑުއިވިގެން ދިޔައީ އެމްއެމްޕީއާރްސީ މައްސަލައާއި ގުޅިގެން ދައުވާ ކުރަން ފޮނުވާފައި އޮތް މި ސަރުކާރުގެ ވަޒީރެއް ކަމަށް ޔޫތް މިނިސްޓަރު އަހުމަދު މަހްލޫފްގެ މައްސަލަ އަބުރާ މި ސަރުކާރުން ގެންދިޔަ ވާހަކަ.
– އަދުރޭ ވިދާޅުވިއެވެ.
އެމްއެމްޕީއާރުސީގެ ހިޔާނާތުގައި މި ސަރުކާރުގެ އިސް ބޭފުޅުން ހިމެނޭހެން 250 އެއްހާ މީހުން ބައިވެރިވި ކަމަށް ބުނާއިރު ހަމައެކަނި ޔާމީނުގެ މައްޗަށް ދައުވާކޮށް ހުކުމްކުރަނީ ނުފޫޒު ބޭނުންކޮށްގެން އެމަނިކުފާނަށް އަނިޔާކުރުމަށް ކުރާ ކަމެއް ކަމަށް އޭނާ ތުހުމަތުކުރެއްވިއެވެ. މިކަމުގެ މައިގަނޑު ބޭނުމަކީ މި ސެޕްޓެމްބަރު މަހު ބާއްވާ ރިޔާސީ އިންތިހާބުގައި ޔާމީނަށް ވާދަނުކުރެވޭގޮތް ހެދުން ކަމަށްވެސް އަބްދުލްރަހީމް ވިދާޅުވިއެވެ.
ގާނޫނީ އަސާސީގައި ބަޔާންކޮށްފައިވާ ރައީސުލްޖުމްހޫރިއްޔާއަށް ވުމުގެ އެއް ޝަރުތަކީ، ޖިނާއީ ކުށެއްކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވާން ޖެހެއެވެ.
މިއާއިއެކު ޔާމީނަށް ރިޔާސީ އިންތިހާބުގައި ވާދަކުރުމުގެ ފުރުސަތު މި ވަގުތަށް ވަނީ ބަންދުވެފައެވެ. އެމްއެމްޕީއާރުސީގެ ހިޔާނާތުގެ ތެރޭގައި ހިމެނޭ ވ. އާރަށް ކުއްޔަށް ދިން މައްސަލައިގައި ރިޝްވަތު ހިފުމާއި މަނީލޯންޑަރިންގެ ކުށް ސާބިތުވެ ޔާމީންގެ މައްޗަށް ކުރީ 11 އަހަރުގެ ޖަލު ހުކުމެކެވެ. އެ ހުކުމް ޔާމީންގެ މައްޗަށް އިއްވީ މިދިޔަ ޑިސެމްބަރު 25، 2022 ގައެވެ. މި މައްސަލަ މިހާރު ވަނީ ހައި ކޯޓުގައި އިސްތިއުނާފުކޮށްފައެވެ.
އަދުރޭ ވިދާޅުވީ އެމްއެމްޕީއާރްސީގެ މައްސަލައިގައި ވަކި ބޭފުޅެއްގެ މައްސަލަ އަބުރާ އެހެން ގެންދެވޭ ކަމަށްވަނީނަމަ އެކަމާއި ގުޅިގެން ދައުވާ ކުރާ ހުރިހާ އެންމެންގެ މައްސަލަ ގެންދަން ވާނެ ކަމަށެވެ. ހަމައެކަނި ރައީސް ޔާމީނަށް ދައުވާކޮށްފައި ދެން އެ މައްސަލައިގައި ހިމެނޭ އެހެން މީހުންގެ މައްސަލަތައް އަބުރާ ގެންދިއުން އެއީ އެއްވެސް ވަރަކަށް ބަލައިގަނެވޭނެ ކަމެއް ނޫން ކަމަށް އަދުރޭ ވިދާޅުވިއެވެ.
ރައީސް ސޯލިހްގެ އަމާޒު ހިފާފައި ހުރީ ރައީސް ޔާމީނަށް އަނިޔާކުރުމަށް ކަމަށްވެސް އަދުރޭ ވިދާޅުވިއެވެ. މިއީ މި ސަރުކާރުގެ އަނިޔާވެރިކަމުގައި ރައީސް ޔާމީން ޖަލުގައި ހޭދަކުރާ ތިންވަނަ ރޯދަ މަސް ކަން ފާހަގަކުރަމުން އަދުރޭ ވިދާޅުވީ ރައީސް ޔާމީން ޖަލަށް ގެންދެވި ހިސާބުން ފެށިގެން ތަކުރާރުކޮށް އެކި ގޮތްގޮތައް މަސައްކަތް ކުރަމުން ގެންދަނީ ރައީސް ޔާމީން ގޭ ބަންދަށް ބަދަލު ކުރުމަށް ކަމަށެވެ.
