އަރަބިއްޔާ ސްކޫލުގެ އާ އިމާރާތް ނިމޭނީ އަންނަ އަހަރުގެ ދިރާސީ އަހަރަށް ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
މިނިސްޓަރު އެގޮތަށް ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި މަހިބަދޫ ދާއިރާގެ މެމްބަރު އަހުމަދު ތޯރިގު ކުރެއްވި ސުވާލަކަށް ޖަވާބު ދެއްވަމުންނެވެ. ތޯރިގު އެއްސެވީ އަރަބިއްޔާގެ އާ އިމާރާތުގެ މަސައްކަތްތައް މިހާރު ގޮސްފައިވާ ހިސާބާއި އެ އިމާރާތުގެ މަސައްކަތް ނިމޭނީ ކޮން ދުވަހަކުންތޯއެވެ.
އެ ސުވާލަށް ޖަވާބު ދެއްވައި މިނިސްޓަރު ވިދާޅުވީ އަރަބިއްޔާގެ އާ އިމާރާތް ބާ ޖަމާލުއްދީންގައި އަޅަން ހަވާލުކުރީ 168 މިލިއަން ރުފިޔާއަށް މިދިޔަ ސެޕްޓެމްބަރު މަހު އަމީން ކޮންސްޓްރަކްޝަންއާ ކަމަށެވެ.
ޑިޒައިން އެންޑް ބިލްޑް އުސޫލު އުސޫލުން އަމީންއާ އެ މަސައްކަތް ހަވާލުކޮށްފައިވާ އިރު ކޮންސެޕްޓް ކުރެހުން ފައިނަލް ކުރެވި މިހާރު ކުރިއަށް ދަނީ ޑީޓެއިލް ޑްރޯވިންގެ މަސައްކަތް ނިންމުމުގެ ކަންކަން ކަމަށް މިނިސްޓަރު ވިދާޅުވިއެވެ.
ޝެޑިއުލާ އެއްގޮތަށް ދަންޏާ ލަފާކުރެވެނީ 2024 ވަނަ އަހަރުގެ ދިރާސީ އާ އަހަރަށް ހުޅުވޭނެ ކަމަށް.
– މިނިސްޓަރ އައިޝަތު ވިދާޅުވިއެވެ.
އެޑިއުކޭޝަން މިނިސްޓްރީން މީގެ ކުރިން ބުނެފައި ވަނީ އަރަބިއްޔާ ސްކޫލުގެ މަސައްކަތް މި އަހަރުގެ ތެރޭގައި ނިންމާލެވޭނެ ކަމަށެވެ. މީގެ އަށް އަހަރު ކުރިން ބޭނުންކުރަން ފެށި އަރަބިއްޔާގެ އިމާރާތުގެ ތަނބުތަކުގައި ވަރަށް ބޮޑަށް ރެނދުލައި، ގެއްލުން ލިބިފައި ހުރުމުން މިދިޔަ އަހަރުން ފެށިގެން އެ ސްކޫލުގެ ކުދިން ވަގުތީ ގޮތުން ކިޔަވަނީ ފޮރިން މިނިސްޓްރީ ކުރިން ހިންގި އިމާރާތުގައެވެ.
އެކަމަކު، އެ ތަނުގެ ހާލަތު ރަނގަޅު ނޫން ކަމަށް ބުނެ ބެލެނިވެރިން އަންނަނީ ޝަކުވާ ކުރަމުންނެވެ.
