ކުރިޔަށް އޮތް ރިޔާސީ އިންތިޚާބަށް އެއް ކޯލިޝަނެއްގައި މަސައްކަތް ކުރުމަށް ޖުމުހޫރީ ޕާޓީން ދިން ދައުވަތު ލިބިފައިވާ ކަމަށާއި، ޖުމުހޫރީ ޕާޓީގެ ސިޓީއާއި ގުޅޭގޮތުން ޕާޓީގެ ކައުންސިލުން ވަރަށް އަވަހަށް ގޮތެއް ނިންމާނެކަމުގައި ކުރީގެ ނާއިބު ރައީސް އަހުމަދު އަދީބު ރައީސްކަން ކުރައްވާ ތާރޑްވޭ ޑިމޮކްރަޓިކް ޕާޓީ (އެމްޓީޑީ)އިން ބުނެފިއެވެ.

އެމްޓީޑީން ކުރި ޓުވީޓެއްގައި ބުނެފައިވަނީ، ޖޭޕީން ފޮނުވި ސިޓީ އެޕާޓީއަށް ލިބިފައިވާ ކަމަށާއި، ސިޓީއާއި ގުޅޭގޮތުން އެޕާޓީން ވަރަށް އަވަހަށް ގޮތެއް ނިންމާނޭ ކަމުގައެވެ.

ޖުމްހޫރީ ޕާޓީގެ ލީޑަރު @QasimIbrahim ގެ ފަރާތުން މޯލްޑިވްސް ތާޑް-ވޭ ޑިމޮކްރެޓްސް އާއި ކޯލިޝަން ހެދުމުގެ މަޝްވަރާ ފެށުމަށް ފޮނުއްވި ސިޓީފުޅެއް ވަނީ ލިބިފައިއެވެ.

މި ސިޓީ އާއި ގުޅިގެން އަމަލު ކުރާނެ ގޮތަކާއި މެދު މި ޕާޓީގެ ކައުންސިލުން މަޝްވަރާ ކުރުމަށް ވަނީ ހަމަޖެހިފައި އެވެ.

— Maldives Third-Way Democrats (@MTDSecretariat) April 7, 2023

ޖުމުހޫރީ ޕާޓީން ކޯލިޝަން ދައުވަތު އެމްޓީޑީއަަށް ފޮނުވުމާއެކު އެޕާޓީން ކޯލިޝަން ހެދުމަށް ދައުވަތުދިން ޕާޓީތަކުގެ އަދަދު މިހާރުވަނީ 6 އަށް އަރާފައެވެ. އެހެންނަމަވެސް މިހާތަނަށް، އެމްޑީޕީގެ ރައީސް މުހައްމަދު ނަޝީދުގެ ފިކުރެއްގެ ދިރުން ފިޔަވާ އެހެން އެއްވެސް ފަރާތަކުން ޖޭޕިއާއެކު ކޯލިޝަން ހެދުމަށް ނިންމާފައެއް ނުވެއެވެ.

މިގޮތުން ޖޭޕީން ދިން ކޯލިޝަންގެ ދައުވަތު އިދިކޮޅު ޕީޕީއެމްއާއި އަމިއްލަގޮތުން ވާދަކުރާ އުމަރު ނަސީރުގެ އިތުރުން ޑރ. މުނައްވަރު އަނބުރާ ރައްދު ކޮށްފައިވި ނަމަވެސް، ރައީސް މައުމޫންގެ އެމްއާރުއެމްއިންވަނީ ޖޭޕީއާއެކު ކޯލިޝަން ހެދުމުގެ މަޝްވަރާތައް ފެއްޓުމަށް ނިންމާފައެވެ.

ޖޭޕީން ރިޔާސީ އިންތިޚާބުގައި ވާދަކުރުމަށް ނިންމާ، ކޯލިޝަން ހެދުމަށް ޕާޓީތަކަށް ދައުވަތު ފޮނުވަމުން ގެންދާއިރު ރައީސް ސާލިހު މިހާރުވަނީ އަދާލަތު ޕާޓީގެ އިތުރުން އެމްޑީއޭއާއެކު ކޯލިޝަން ހަދާފައެވެ. އަދި ރައީސް ސަލިހުވަނީ އެމްއާރުއެމްއާއެކުވެސް މަޝްވަރާ ކުރައްވާފައެވެ.