ކުރިޔަށް އޮތް ރިޔާސީ އިންތިޚާބުގައި ވަދަކުރާނޭކަން އިއުލާން ކޮށްފައިވާ، ޖުމުހޫރީ ޕާޓީގެ ރިޔާސީ ކެނޑިޑޭޓް ގާސިމް އިބުރާހީމަށް ތާއީދުކުރާކަން ހާމަކޮށް، އެމްޑީޕީގެ ރައީސް މުހައްމަދު ނަޝީދުގެ ކުރީގެ ގިނަ ސިޔާސީ ވާދަވެރިންނާއި އެމަނިކުފާނު އެއް ޕްލެޓްފޯމަކުން މިއަދު ބައްދަލު ކޮށްފިއެވެ.
މިގޮތުން ސަން އައިލެންޑަށް އެމްޑީޕީގެ ރައީސް މުހައްމަދު ނަޝީދު މިއަދު ވަޑައިގެން ވަނީ އެމަނިކުފާނުގެ ކުރީގެ ގިނަ ވާދަވެރިންނާއެކީ ނަގާފައިވާ ފޮޓޯތަކެއް ޝޯޝަލް މީޑިއާއަށް ދޫކޮށްލައްވާފައެވެ. މީގެ ތެރޭގައި، އިދިކޮޅު ޕީޕީއެމްގައި ތިއްބަވައިގެން ނަޝީދަށް ކުރިން އެންމެ ބޮޑަށް ފާޑު ވިދާޅުވީ ބައެއް ބޭފުޅުންވެސް ހިމެނެއެވެ.
މިގޮތުން ސޯޝަލް މީޑިއާގައި މިހާރު އާންމުވެފައިވާ ފޮޓޯތަކުން ފެންނަ ގޮތުގައި މި ބޭފުޅުންގެ ތެރޭގައި، ރައްޔިތުންގެ މަޖިލިހުގެ ކުރީގެ މެމްބަރު، ޕީޕީއެމްގައި އިސްކޮށް މަސައްކަތް ކުރި އަލީ އާރިފާއި، އިދިކޮޅު ޕީޕީއެމްގައި އިސްކޮށް މަސައްކަތް ކޮށްފައިވާ، ރައްޔިތުންގެ މަޖިލިހުގެ ކުރީގެ މެމްބަރު އަހުމަދު ނިހާން ހުސެއިންމަނިކުވެސް ހިމެނެއެވެ.
އަދި އޭގެ އިތުރުންވެސް ރައީސް ސާލިހުގެ ކެބިނެޓްގައި މަސައްކަތް ކުރެއްވި، ކުރީގެ ހެލްތު މިނިސްޓަރ އަބުދުﷲ އަމީންއާއި، ނަޝީދަށް މީގެ ކުރިން އެންމެ ބޮޑަށް ފާޑު ވިދާޅުވެފައިވާ، ރައްޔިތުންގެ މަޖިލިހުގެ ވިލިފުށީ ދާއިރާގެ ކުރީގެ މެމްބަރު ރިޔާޒު ރަޝީދުވެސް ނަޝީދުގެ މިއަދު ސަން އައިލެންޑުގައި ބައްދަލު ކުރެއްވި ޓީމުގައި ހިމެނިވަޑައިގަންނަވައެވެ.
ނަޝީދު މިއަދު ސަން އައިލެންޑުގައި ގާސިމްއާއި ބައްދަލު ކުރައްވާއިރު ފިކުރެއްގެ ދިރުމުންވަނީ ކުރިޔަށް އޮތް ރިޔާސީ އިންތިޚާބަށް ޖުމުހޫރީ ޕާޓީއާޢެކު ކޯލިޝަން ހެދުމަށް ނިންމާފައެވެ. އަދި، ރިޔާސީ އިންތިޚާބުގެ މެނިފެސްޓޯ ހެދުމަށް ދެފަރާތުން މިހާރުވަނީ 3 ފަހަރެއްގެ މަތިން ބައްދަލުވެސް ކޮށްފައެވެ.
