އިނގިރޭސި ޕްރިމިއާ ލީގުގައި ބްރެންޓްފަޑް ބަލިކޮށް ތާވަލުގެ ހަތަރުވަނައަށް މެންޗެސްޓާ ޔުނައިޓެޑް ޖެހިލައިފިއެވެ.
ޔުނައިޓެޑްގެ ދަނޑުގައި ރޭ ކުޅުނު މިމެޗް އެޓީމުން ކާމިޔާބުކުރީ އެއްލަނޑު ސުންލަނޑުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި މޮޅަށް ކުޅެފައިވަނީ ޔުނައިޓެޑުންނެވެ. މިގޮތުން ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީވެސް ޔުނައިޓެޑެވެ. މިމެޗްގައި ޔުނައިޓެޑުން ކާމިޔާބުކުރި ހަމައެކަނި ލަނޑު މެޗްގެ 27 ވަނަ މިނެޓްގައި ޖަހާދިނީ އެޓީމުން އުފެއްދި ހަމަލާއެއްގައި މާކަސް ރަޝްފަޑްއެެވެ. މިއީ މިފަހަރުގެ ސީޒަންގައި ޕްރިމިއަރ ލީގުގައި ރަޝްފަޑް ކާމިޔާބުކުރި 15 ވަނަ ލަނޑެވެ. އަދި ސީޒަންގައި ހުރިހާ މުބާރާތްތަކަށް ބަލާލައިރު ކާމިޔާބުކުރި 28 ވަނަ ލަނޑެވެ.
މިމެޗްގެ ފުރަތަމަ ހާފްގައި ބްރެންޓްފަޑްގެ ފަރާތުން މާރަނގަޅު ކުޅުމެއް ފެނިގެން ނުދިޔަ ނަމަވެސް ދެވަނަ ހާފްގައި އެޓީމުންވަނީ ކުޅުން ރަނގަޅުކޮށް ޔުނައިޓެޑްގެ ގޯލަށް ނުރައްކާކޮށްފައެވެ. މިގޮތުން ބަދަލު ކުޅުންތެރިޔާ ކެވިން ޝޭޑްއަށް މެޗްގެ ނަތީޖާ ހަމަހަމަ ކުރާނެ ރަނގަޅު ފުރުސަތެއް ލިބިގެންދިޔަކަން ފާހަގަ ކޮށްލެވެއެވެ. ނަމަވެސް ޔުނައިޓެޑްގެ ކީޕަރ ޑެވިޑް ޑެ ގެއަރގެ ހުޝިޔާރު ކަމާއެކު އޭނާވަނީ އެހަމަލާ ދިފާއުކޮށްފައެވެ.
މިކާމިޔާބީއާއެކު ޔުނައިޓެޑް މިހާރު ވަނީ ހަތަރު ވަނައިގާ ކުރިން އޮތް ޓޮޓްނަމް ހޮޓްސްޕަރ ފަހަތަށް ޖައްސާލާ ހަތަރުވަނަ އަށް ކުރިއަށް ޖެހިލާފައެވެ. އެއީ ކުޅުނު 28 މެޗުން ލިބިފައިވާ 53 ޕޮއިންޓާއެކުއެވެ. އަދި ޔުނައިޓެޑް އެއް މެޗް މަދުން ކުޅެފައިވުމުން 50 ޕޮއިންޓާއެކު އޮތް ސްޕަރސް އާއި ދެމެދުގައިވާ ތަފާތު އިތުރު ކުރުމުގެ ފުރުސަތު ޔުނައިޓެޑަށް ލިބިގެންވެއެވެ.
މިމެޗުން ބަލިވި ބްރެންޓްފަޑް މިއީ އެޓީމް އެންމެފަހުން ލީގުގައި ކުޅުނު 17 މެޗްގެ ތެރެއިން ބަލިވި ދެވަނަ މެޗެވެ. އަދި މިވަގުތު އުޅެނީ 43 ޕޮއިންޓާއެކު ތާވަލްގެ 9 ވަނައިގައެވެ.
