ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޖިލީހުގެ މެމްބަރުންނަށާއި، މަޖިލީހުގެ އިދާރީ މުވައްޒިފުންނަށް ދެއްވި ތަރާވީހަށް، ރައީސް ޞާލިހަށް ތާއީދުކުރާ ގިނަ މެމްބަރުން ވަޑައިނުގެން ބޮއިކޮޓް ކުރައްވައިފިއެވެ.
ކޮންމެ ރޯދަމަހެއްގައިވެސް މަޖިލިސް ރައީސް މަޖިލީހުގެ މެމްބަރުންނަށާއި، މަޖިލީހުގެ މުވައްޒިފުންނަށް ތަރީވީހެއް ދެއްވައެވެ. މިރޯދަމަހު މަޖިލިސް މެމްބަރުންނަށާއި، މުވައްޒިފުންނަށް މަޖިލިސް ރައީސް ދެއްވި ތަރާވީސް އޮތީ ރޭގައެވެ. ރޭ މަޖިލިސް އިދާރާގެ ގޯތި ތެރޭގައި އޮތް ތަރާވީހަށް މަޖިލީހުގެ މެމްބަރުންގެ ތެރެއިން ވަޑައިގެންނެވީ މަދު މެމްބަރެކެވެ.
ތަރާހީވަށް ވަޑައިގެންފައިވަނީ މަޖިލީހުގައި ހިމެނޭ މެމްބަރުންގެ ތެރެއިން ރައީސް ނަޝީދަށް ތާއީދުކުރާ ފިކުރެއްގެ ދިރުމުގެ މެމްބަރުންނާއި، އިދިކޮޅު ޕީޕީއެމް ޕީއެންސީގެ މެމްބަރުންގެ އިތުރުން މިނިވަން މެމްބަރުންނެވެ. މިއީ މަޖިލިސް ރައީސް ދެއްވި ތަރާވީހަކަށް މިހާ މަދު މެމްބަރުން ދިޔަ ފުރަތަމަ ފަހަރެވެ.
ރައްޔިތުންގެ މަޖިލީހުގެ މެންބަރުންނަށާއި މުވައްޒަފުންނަށް، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ދެއްވި ޚާއްސަ ތަރާވީޙުގެ ތެރެއިން pic.twitter.com/Xxcw2wJVOy
— People's Majlis (@mvpeoplesmajlis) April 5, 2023
ރޭގެ ތަރާވީހަށް ގިނަ އަދަދެއްގެ މެމްބަރުން ނުދިޔަ ސަބަބާއި ގުޅޭގޮތުން ރައީސް ޞާލިހަށް ތާއީދުކުރާ މެމްބަރަކު ވިދާޅުވީ މެމްބަރުން ތަރާވީހަށް ނުދިޔައީ ދުރާލައި ރާވައިގެން ތަރާވީ ބޮއިކޮޓް ކުރުމުގެ ނިޔަތުގައި ނޫންކަމަށެވެ. ނަމަވެސް ރައީސް ނަޝީދު މަޖިލިސް ރައީސް ކަމުގައާއި، ސިޔާސީ ގޮތުން މިހާރު މަސައްކަތް ކުރައްވާ ގޮތުން މެމްބަރުންނަށް މިފަދަ ކަންކަމުގައި ބައިވެރިވުމަކީ އެހާ ރަނގަޅު ކަމަކަށް ނުވާތީ ބައިވެރި ނުވީކަމަށް އޭނާ ވިދާޅުވިއެވެ.
ސިޔާސީ ގޮތުން ރައީސް ނަޝީދާއި، ރައީސް ޞާލިހުގެ ޚިޔާލްތަފާތުވެ، ދެބޭފުޅުންނަށް އެކީގައި މަސައްކަތް ނުކުރެވޭ ވަރަށް ވަނީ ގުޅުން ގޯސްވެފައެވެ. ރައީސް ނަޝީދު ގެންދަވަނީ އެމްޑީޕީގެ ޕާލިމަންޓްރީ ގްރޫޕުގައިވެސް ވަކި މެމްބަރުން ތަކަކާއިއެކު ޕާލިމަންޓްރީ ގްރޫޕެއް ހިންގަމުންނެވެ. މިމައްސަލާގައި އެމެމްބަރުންނަށް ފިޔަވަޅު އެޅުމަށް އެމްޑީޕީ ޕީޖީ ގްރޫޕަށް ހުށަހެޅި މަޝްވަރާވެސް ކުރެވުނެވެ. ނަމަވެސް މިހާތަނަށް އަދި އެއްވެސް މެމްބަރަކާއިމެދު ފިޔަވަޅު އަޅާފައި ނުވެއެވެ.
