ބަރަކާތްތެރި ރޯދަމަހު މުސްލިމުން ނަމާދު ކުރުމަށް ތިއްބާ އިސްރައީލު ސިފައިން އަލް އަގުސާ މިސްކިތަށް ވަދެ ދިން ހަމަލާތަކުގައި 12 މީހަކު ޒަޚަމްވުމައި ގުޅިގެން އަރަބި ލީގުގެ ކުއްލި ބައްދަލުވުމެއް ބޭއްވުމަށް ނިންމައިފިއެވެ.
އަދި އިސްރާއީލުގެ ބޮޑުވަޒީރު ނަތަންޔާހޫ ވިދާޅުވެފައިވަނީ މުސްލިމުންގެ މުގައްދަސް މި ބިނާގެ ހައިސިއްޔަތު މިހާރުވެސް އޮތް ގޮތުގައި ބޭއްވުމަށް މަސައްކަތް ކުރައްވަމުން ގެންދަވާ ކަމަށެވެ.
އިސްރާއީލުގެ ސިފައިންގެ ހަމަލާތަކަށްފަހު އަރަބި ލީގުގެ ޚާއްސަ ބައްދަލުވުމަކަށް ގޮވާލާފައިވަނީ އުރުދުންއާއި، މިސްރު އަދި ފަލަސްތީނުގެ އޮފިޝަލުންނެވެ.
މުސްލިމުން ބަރަކާތްތެރި ރަމަޟާންމަސް ފާހަގަ ކުރަމުންދަނިކޮށް އިސްރާއީލު ސިފައިން މި ހަފްތާގެ އަންގާރަދުވަހުގެ ރޭ، މުސްލިމުން މިސްކިތުގައި ނަމާދުކުރަން ތިއްބާ މިސްކިތަށް ހަމަލާ ދިނުމާއި ގުޅިގެން ޖެރޫސެލަމްގެ މަސްރަހު އަނެއްކާވެސް ވަނީ އިތުރަށް ހޫނު ވެފައެވެ.
އިސްރާއީލު ސިފައިން މިސްކިތުގައި ހިންގަމުންދިޔަ ހަމަނުޖެހުންތައް އަނެއްދުވަހުގެ ހެނދުނާއި ހަމައަށް ކުރިޔަށް ގޮސްފައިވެއެވެ. އަދި ވަނީ މިސްކިތުގައި ނަމާދުކުރަން ތިބި މުސްލުމުން މިސްކިތުން ނެރެ، އިސްރާއީލު ފުލުހުންގެ ހިމާޔަތުގައި އެގައުމުގެ ރައްޔިތުންނަށް މިސްކިތަށް ވަނުމުގެ ފުރުސަތު ދީފައެވެ.
އަރަބި ލީގުންވަނީ މި ހަމަނުޖެހުންތައް ކުށްވެރި ކުރައްވާފައެވެ. އަދި އަރަބި ލީގުގެ ސެކެޓްރީ ޖެނެރަލް ނެރުއްވި ބަޔާނެއްގައި ވިދާޅުވެފައިވަނީ، "އިސްރާއީލުގެ ސަރުކާރުގެ ހައްދުފަހަނަ އަޅާފައިވާ ސިޔާސަތުތަކަށް ނިމުން ނުގެނެސްފިނަމަ ފަލަސްތީނުގެ ރައްޔިތުންނާ އިސްރާއީލާ ދެމެދު ހިގަމުންދާ ހަމަނުޖެހުންތައް ދާނީ ފިޅާވަމުން،" ކަމުގައެވެ.
ފަލަސްތީނުގެ އޮފިޝަލުން ހާމަކޮށްފައިވާ ގޮތުގައި، މިހަމަނުޖެހުންތަކުގައި ފަލަސްތީނުގެ 400 މީހަކުން އިސްރާއީލު ސިފައިން ހައްޔަރު ކޮށްފައިވާ ކަމަށާއި، އެމީހުން އަދިވެސް ތިބީ ހައްޔަރުގައި ކަމަށެވެ.
އިސްރައީލު ސިފައިން މިސްކިތުގައި ނަމާދުކުރަން ތިބި މީހުންނަށް ދިން ހަމަލާތައް ފަލަސްތީނުގެ ހަނގުރާމަވެރި ޖަމާއަތްތަކުންވެސް ވަނީ ކުށްވެރި ކޮށްފައެވެ.
އިސްރާއީލު ސިފައިން ބުނެފައިވަނީ އެމީހުން މިސްކިތުގެ ތެރެއަށް ވަދެގަތީ މޫނު ނިވާ ކޮށްގެން ތިބި ބަޔަކު މިސްކިތުގެ ތެރެއަށް، ބަޑިބޭހާއި، ގަލާއި ލަޓިބުރިތައް ހިފައިގެން ވަދެގަނެ މިސްކިތް ތަޅުމާއި ގުޅިގެން ކަމަށެވެ.
