އަންނަ ރިޔާސީ އިންތިޚާބުގައި ވާދަކުރައްވާނެކަން އިއުލާންކުރައްވައި މިހާރު ޖުމްހޫރީ ޕާޓީގެ ރިޔާސީ ޓިކެޓުވެސް ހޯއްދަވާފައިވާ އެޕާޓީގެ ލިޑަރ ޤާސިމް އިބްރާހީމް ދެއްވި ކޯލިޝަން ހެދުމުގެ ދަޢުވަތަށް އިދިކޮޅު ޕީޕީއެމް/ޕީއެންސީ ކޯލިޝަން ހިންގެވުމާ މިވަގުތު ޙަވާލުވެ ހުންނެވި ޕީއެންސީގެ ރައީސް ޢަބްދުއްރަޙީމް ޢަބްދުﷲ (އަދުރޭ) ޖަވާބުދެއްވައިފިއެވެ.
އިދިކޮޅު ރިޔާސީ ކެންޑިޑޭޓު ރައީސް ޔާމީންގެ އަރިސް ބޭފުޅެއްކަމަށްވާ، ރައްޔިތުންގެ މަޖިލީހުގެ ފޮނަދޫ ދާއިރާގެ ކުރީގެ މެމްބަރު އަދުރޭ ވިދާޅުވީ ޕީޕީއެމް/ޕީ.އެން.ސީ ކޯލިޝަނަކުން އެހެން އެއްވެސް ޕާޓީއެއްގެ ރިޔާސީ ކެންޑިޑޭޓަކަށް ތާއީދެއް ނުކުރާނެކަމަށެވެ. އަދި އެ ކޯލިޝަންގެ ރިޔާސީ ކެންޑިޑޭޓަކީ ރައީސް ޔާމީންކަމަށް އަދުރޭ ވިދާޅުވިއެވެ.
ޕީ.ޕީ.އެމް/ޕީ.އެން.ސީ ކޯލިޝަނަކުން އެހެން އެއްވެސް ޕާޓީ އެއްގެ ރިޔާސީ ކެނޑިޑޭޓަކަށް ތާއީދެއް ނުކުރާނެ.މިކޯލިޝަންގެ ރިޔާސީ ކެނޑިޑޭޓަކީ ރައީސް ޔާމީން.ގައުމަށް ހެޔޮ އެދި ވަޑައިގަންނަވާ ބޭފުޅުން މިކޯލިޝަނާ ގުޅިވަޑައިގަންނަވާ.އެއީ ގައުމާ ރައްޔިތުންނަށް އެންމެ ފައިދާ ހުރި ގޮތް #RY2023
— Abdul Raheem Abdulla (@Banafsaa) April 3, 2023
އަދުރޭ މިހެން ވިދާޅުވެ ޓްވީޓުކުރެއްވީ ޖުމްހޫރީ ޕާޓީގެ ރިޔާސީ ކެންޑިޑޭޓް އަދި އެ ޕާޓީގެ ލީޑަރު ގާސިމް އިބްރާހީމް، ޕީޕީއެމް/ޕީއެންސީ ހިމެނޭ ގޮތަށް ފަސް ފަރާތަކަށް ޖުމްހޫރީ ޕާޓީއާއެކު ކޯލިޝަން ހެދުމަށް ދަޢުވަތު ފޮނުއްވިކަމަށް މީޑިއާގައި ރިޕޯޓުކޮށްފައިވަނިކޮށެވެ.
ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީއާއިއެކު ކޯލިޝަން ހެދުމަށް އިދިކޮޅު ޕީޕީއެމް ހިމެނޭހެން ހަތަރު ފަރާތަކަށް ދައުވަތު ދިނުމަށް އެޕާޓީން ވަނީ ނިންމާފައެވެ.
ޖުމްހޫރީ ޕާޓީން ވަނީ ރިޔާސީ އިންތިޚާބުގައި ވާދަކުރުމަށް ނިންމައި، އެޕާޓީން ވާދަކުރާނެ ކެނޑިޑޭޓަކީ އެޕާޓީގެ ލީޑަރު ޤާސިމް އިބްރާހިމް ކަމަށް ކަނޑައަޅާފައެވެ. އިންތިޚާބުގައި ވާދަކުރުމަށް ނިންމައި އެޕާޓީން ދަނީ ރައީސް ނަޝީދުގެ ފިކުރެއްގެ ދިރުމުގެ ފެކްޝަނާއިއެކު މެނިފެސްޓޯ އެކުލަވާލުމުގެ މަސައްކަތްވެސް ކުރަމުންނެވެ.
ޖުމްހޫރީ ޕާޓީގެ ލީޑަރު ގާސިމް ނިންމަވާފައި ވަނީ ޕީޕީއެމްގެ އިތުރުން ކުރީގެ ރައީސް މައުމޫން އަބްދުލްގައްޔޫމްގެ އެމްއާރުއެމާއި ދަނގެތި ދާއިރާގެ މެމްބަރު މުހައްމަދު ނާޒިމްގެ އެމްއެންޕީ އާއި ކުރީގެ ބަންޑާރަ ނައިބު ޑރ. މުހައްމަދު މުނައްވަރު އަދި ކުރީގެ ހޯމް މިނިސްޓަރު އުމަރު ނަސީރަށް ކޯލިޝަންގެ ދައުވަތު ދެއްވުމަށެވެ.
ގާސިމް މިއަދު ވަނީ އެ ބޭފުޅުންނަށް ފޮނުވާ ކޯލިޝަންގެ ދައުވަތުގެ ސިޓީގައި ސޮއިކުރައްވައިފައެވެ. އެކަމަކު، ސިޓީތައް ފޮނުއްވި ކަމެއް އަދި ކަށަވަރެއް ނޫނެވެ.
ޖުމްހޫރީ ޕާޓީން އިސްވެއޮވެ ހަދާ ކޯލިޝަނަކުން އިންތިޚާބުގައި ވާދަކުރުމަށް ނިންމައި، އެޕާޓީން ވަނީ ކެމްޕެއިންގެ އިސްކޮށް ހަރަކާތެރިވާ ބޭފުޅަކީ އަމީން އިބްރާހިމް ކަމަށްވެސް ކަނޑައަޅާފައެވެ.
ޤާސިމް ދައުވަތު ދެއްވި ޕާޓީތަކަށް ބަލާއިރު، ޕީޕީއެމްހގެ ރިޔާސީ ކެނޑިޑޭޓް ހުންނެވީ ޖަލުގައެވެ. އެމްއެންއެޕީން ގެންދަނީ ރިޔާސީ އިންތީޚާބުގައި ވާދަކުރަން ނިންމައި ކެމްޕެއިން ކުރަމުންނެވެ. އަދި ޑރ.މުނައްވަރުވެސް ވަނީ އެއްވެސް ކެނޑިޑޭޓެއްގެ ފަހަތަށް ނާރާނެކަމަށް ވިދާޅުވެފައެވެ. ރިޔާސީ އިންތިޚާބަކީ ވާދަވެރި އިންތިޚާބަކަށް ވެގެންދާނެކަމަށް ބެލެވޭއިރު، މިއިންތިޚާބުގައިި އެންމެ ބޮޑު ވާދަވެރިކަމެއް އޮތީ އިދިކޮޅު ޕީޕީއެމްއާއި، ރައީސް ޞާލިހާއި، ޤާސިމް އިބްރާހިމްގެ މެދުގައެވެ.
ރިޔާސީ އިންތިޚާބުގައި ރައީސް ޞާލިހާއިއެކު މިހާތަނަށް އަދާލަތާއި، އެމްޑީއޭއިން ވަނީ ކޯލިޝަން ހަދާފައެވެ. ރައީސް ޞާލިހު ވިދާޅުވެފައިިވަނީ ކުރިއަށް އޮތް ރިޔާސީ އިންތިޚާބު ފުރަތަމަ ބުރުން ކާމިޔާބު ކުރެވޭނެ ކަމުގެ ޔަގީންކަން އޮތްކަމަށެވެ.
