އެމީހެއްގެ ޚަބަރު ގަބޫލު ނުކުރެވޭ، ނުވަތަ ލޮލުގެ ފެނުން ކޮށި މީހަކު ހަނދު ފެނިއްޖެ ކަމަށް ހެކިބަސް ދިންނަމަވެސް އެކަން ގަބޫލެއް ނުކުރެވޭނެއެވެ.
އެކެއްގެ ހެކިބަހުންވެސް ރަމަޟާން މަހުގެ ހަނދު ޘާބިތުވާނެއެވެ. އިބްނު ޢުމަރު ރަޟިޔަﷲ ޢަންހުގެ ކިބައިން ރިވާވެގެން ވެއެވެ. (تَرَاءَى النَّاسُ الْهِلالَ ، فَأَخْبَرْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ أَنِّي رَأَيْتُهُ ، فَصَامَ وَأَمَرَ النَّاسَ بِصِيَامِهِ ) މާނައަކީ: "މީސްތަކުން ހަނދު ހޯދަން އުޅެނިކޮށް، ތިމަންކަލޭގެފާނަށް ހަނދު ފެނިއްޖެ ކަމުގެ ޚަބަރު ކީރިތި ރަސޫލާ ޞައްލަﷲ ޢަލައިހި ވަސައްލަމަ އަށް ދިނީމެވެ. އެހިނދު އެކަލޭގެފާނު ރޯދަ ހިއްޕަވާ އަދި މީސްތަކުންނަށް ރޯދަ ހިފުމަށް އަމުރު ކުރެއްވިއެވެ."
ޔަގީން ކަމާއި އެކު ހަނދު ފެނިއްޖެނަމަ، އެކަމުގެ ޚަބަރު ކަމާއި ބެހޭ ފަރާތް ތަކަށް ދޭންވާނެއެވެ. ހަމައެފަދައިން ޝައްވާލް އާއި ޛުލްޙިއްޖާގެ ހަނދުވެސް މެއެވެ. ސަބަބަކީ އޭގެ މައްޗަށް ރޯދަ ހިފުމާއި ވީއްލުމާއި ޙައްޖު ބިނާވެފައިވާތީވެއެވެ. އެކަމަކާއި ނުލައި ވާޖިބު ކަމެއް ފުރިހަމަ ނުކުރެވޭ ކޮންމެ ކަމަކީ ވާޖިބެކެވެ.
