އަނުޝްކާ ޝަރްމާ އޭނާގެ ފުރަތަމަ ދަރިފުޅަށް ބަލިވެ އިންތާ 7 މަސްވަނީއެވެ. އަދި އަންނަ ޖެނުއަރީ މަހު ވިހާނެއެވެ.
ބަނޑު ބޮޑު ވުމުން ފިލްމީ ދާއިރާގެ މަސައްކަތްތަކާއި ދުރުވެ މި ފަހުން "އިންޑިއަން ޕްރެމިއާ ލީގު" ގައި އޭނާގެ ފިރިމީހާ ވިރާޓް ކޯލީ ކްރިކެޓް ކުޅޭތަނަށް ދުބާއީއަށް ގޮސް ސަޕޯޓް ކޮށްފައިވެއެވެ. އަދި މުމްބާއީއަށް އެނބުރި އައިސް، އޭނާ ސޮއިކޮށްފައިވާ ބައެއް ބްރޭންޑްތަކުގެ ޝޫޓިންތަކަށް "މާ ބަނޑާއިއެކު" ދިޔަތަންވެސް ފެނިގެން ގޮސްފައިވެއެވެ.
View this post on Instagram
އަނުޝްކާ ބުނީ ވިހެއުމަށް ފަހު ވީހާވެސް އަވަހަކަށް މަސައްކަތައް ނުކުންނަން ބޭނުންވާ ކަމަށެވެ. އެއީ އެކްޓިންގއަށް އޮތް ލޮތްބެއްގެ ސަބަބުން ކަމަށް އަނުޝްކާ ބުންޏެވެ. އެކްޓުކުރުމަކީ ވަރަށް އުފާވާ ކަމެއްކަމަށާއި، އެކްޓިންގ އެއީ އޭނާ ދިރި ހުރިހާ ހިނދަކު ކުރާނެ ކަމެއް ކަމަށްވެސް ބުނެފައިވެއެވެ.
މަސައްކަތާއި އެއްވަރަށް ދަރިފުޅަށްވެސް ވަގުތު ދެވޭނެ ކަމަށާއި އެއީ އެކަން އޮންނަން ޖެހޭ ގޮތް ކަމަށްވެސް ބުނެފައިވެއެވެ. ގޭގެ މަަސައްކަތާއި ދަރިފުޅު ބެލުމާއި އެކްޓިންގ އަށް ވަގުތު ދިނުމަށް ސިސްޓަމެއް ތައްޔާރުކުރަމުން ދާކަމަށް އަނުޝްކާ ބުންޏެވެ.
އޭނާގެ ކުރިއަށް ހުރި ފިލްމު ތަކުގެ ތެރޭގައި "ކަނެޑާ" އަަދި " ޕާނީ" ފަދަ ފިލްމުތަށް ފާހަގަކޮށްލެވެއެވެ. ވިހެއުމަށް ފަހު ފުރަތަމަ މަސައްކަތް ކުރާނެ ކަމަށް ބެލެވެނީ "ކަނެޑާ" ގައެވެ. އޭނާ އެންމެ ފަހުން ފެނިގެން ދިޔައީ ޝާހްރުކް ޚާނާއި ކެޓްރީނާ އާއިއެކު ފިލްމު "ޒީރޯ" އިންނެވެ.
