މިސަރުކާރު ގެންނަން އެންމެ ބުރަ މަސައްކަތްކުރި އެކަކީ އެމްޑީޕީގެ ނައިބް ރައީސް މުހައްމަދު ޝިފާޒު ކަމަށާއި، މިއަދު ސަރުކާރުން އޭނާ ވަކި ކުރުމަކުން ކަންބޮޑުނުވުމަށް ރައީސް ނަޝީދު ޝިފާޒަށް ދަންނަވައިފިއެވެ.
ރައީސުލްޖުމްހޫރިއްޔާގެ އޮފީހުގެ މިނިސްޓަރުކަމުގެ މަޤާމުގައި ހުންނެވި ޝިފާޒް އެ މަޤާމުން ވަކިކުރައްވީ މިއަދުގެ ވަގުތެއްގައެވެ. ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވެރިކަމަށް ވަޑައިގަތުމަށްފަހު އެންމެ ފުރަތަމަ ސިޔާސީ މަޤާމަކަށް އައްޔަންކުރެއްވި އެއް ބޭފުޅަކީ ޝިފާޒެވެ. ރައީސުލްޖުމްހޫރިއްޔާގެ އޮފީހުގެ މިނިސްޓަރުކަމުގެ މަޤާމަށް ޝިފާޒް އައްޔަންކުރައްވާފައި ވަނީ 2018 ވަނަ އަހަރުގެ ނޮވެމްބަރު 22 ވަނަ ދުވަހުއެވެ.
ޝިފާޒު މަޤާމުން ވަކި ކުރުމާއި ގުޅިގެން ރައީސް ނަޝީދު ވިދާޅުވީ މިސަރުކާރު ވެރިކަމަށް ގެނައުމަށް އެންމެ ބޮޑަށް މަސައްކަތް ކުރި އެކަކީ ޝިފާޒު ކަމަށެވެ. މިއަދު މަޤާމުން ވަކި ކުރުމުން އެކަމާއި އެއްގޮތަކަށްވެސް ކަންބޮޑުނުވުމަށް ނަޝީދު ވަނީ ދަންނަވާފައެވެ. އަދި މުސްތަގުބަލް އޮތީ ވަރަށް އުޖާލާކޮށް ކަމަށްވެސް ނަޝީދު ވިދާޅުވިއެވެ.
އެމްޑީޕީގެ ނައިބް ރައީސް މުހައްމަދު ޝީފާޒު އެއްގޮތަކަށްވެސް ކަންބޮޑުވެ ނުލައްވާތި. ޝިފާޒަށް ވުރެއް ބޮޑަށް މިސަރުކާރު ގެނައުމަށް ޤުރުބާންވީ ވަކި އެހެން މީހެއް ނުހުންނާނެ. މާތް ރަސްކަލާންގެ އިރާދަފުޅުން މުސްތަގުބަލް އޮތީ އުޖާލާކޮށް.
– ރައީސް ނަޝީދު ވިދާޅުވިއެވެ.
މިދިޔަ ޖެނުއަރީ މަހު ބޭއްވި އެމްޑީޕީގެ ރިޔާސީ ޕްރައިމެރީއަށްފަހު ޕާޓީގެ ތެރޭގައި ހިޔާލު ތަފާތުވުންތައް ވަނީ އުފެދިފައެވެ. އެމްޑީޕީގެ ރައީސް މުހައްމަދު ނަޝީދާއި ވާދަކުރައްވާ ރިޔާސީ ޕްރައިމެރީ ބޮޑު ތަފާތަކުން ކާމިޔާބު ކުރެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހެވެ.
އެމްޑީޕީގެ ރިޔާސީ ކެނޑިޑޭޓަށް ތާއިދުނުކޮށް ހިންގާ ހަރަކާތުގައި އެންމެ އިސްކޮށް މަސައްކަތް ކުރައްވާ އެއް ބޭފުޅަކީ ޝިފާޒެވެ. ރައީސް އޮފީހުގެ މަޤާމެއްގައި ހުންނަވައިގެން އެޕާޓީގެ އުސޫލްތަކާއި ހިލާފަށް މަސައްކަތް ކުރައްވަމުން ގެންދަވާތީ އެމްޑީޕީގެ ރައީސް ޞާލިހަށް ތާއީދުކުރާ މެމްބަރުންގެ ފާޑުކިޔުންތައް ޝިފާޒަށް ވަނީ އަމާޒުވެފައެވެ.
