ޖުމުހޫރީ ޕާޓީގެ ދައިރާ ރައީސުން އިންތިޚާބު ކުރުމަށް ނިންމާ، ދައިރާ ރައީސްގެ މަގާމަށް ކުރިމަތި ލުމަށް ފުރުސަތު ހުޅުވާލައިފިއެވެ. މިގޮތުން ޖޭޕީން ނިންމާފައިވަނީ، ރައްޔިތުންގެ މަޖިލިސް އެކުލެވިގެންވާ 87 އިދާރީ ދާއިރާއަށް ވެސް ރައީސުން ހޮވުމަށެވެ.
ޖޭޕީން ކުރި އިއުލާނެއްގައި ބުނެފައިވަނީ އިދާރީ ދާއިރާތަކުގެ ދާއިރާ ރައީސް ކަމަށް ކުރިމަތިލުމަށް ޝައުގުވެރިވާ އެޕާޓީގެ މެންބަރުން އޭޕްރީލް 20 ދުވަހުގެ މެންދުރުފަހު 03:00 ގެ ކުރިން އެކަމަށް އެދޭ ފޯމް ފުރުމަށްފަހު ޕާޓީގެ ނަމްބަރު 7478414 އަށް ވަޓްސްއެޕް ކޮށްދިނުން އެދޭކަމަށެވެ.
މީގެ އިތުރުން، ފޯމާއި އަދި ފޯމާއިއެކު ހުށަހަޅަން ޖެހޭ ތަކެތި އެޕާޓީގެ ހެޑްކްއާޓާރ މ.ކްނޫޒް އަށް ވެސް ހުށަހެޅޭނެ ކަމަށްވެސް އިއުލާންގައި ބުނެފައިވެއެވެ.
ދާއިރާ ރައީސުން އިންތިޚާބު ކުރުމުގެ ކަންކަން ބެލެހެއްޓުމަށް މިއަދު އެޕާޓީންވަނީ ޚާއްސަ ކޮމިޓީއެއްވެސް އެކުލަވާލާފައެވެ. އެކޮމިޓީގެ ޗެއަރއަކަށް އައްޔަން ކޮށްފައިވަނީ ޖުމްހޫރީ ޕާޓީ (ޖޭޕީ) ގެ ލީޑަރު ގާސިމް އިބްރާހިމްގެ ސްޕެޝަލް އެންވޯއީ އިލްހަމް އަހުމަދުއެވެ.
މި ކޮމިޓީގައި ހިމެނޭ މެމްބަރުންނަކީ:
- ސެކްރެޓަރީ ޖެނެރަލް އަލީ އާރިފް
- ލީޑަރުގެ ސްޕެޝަލް އެޑްވައިޒަރު އަހުމަދު ނިހާން ޙުސައިން މަނިކު
- ލީޑަރުގެ އެޑްވައިޒަރު އަބްދުالله އަހުމަދު
- ލީޑަރުގެ ސްޕެޝަލް އެޑްވައިޒަރު އަބްދުالله ނަވާޒް
- ލީޑަރުގެ ސްޕެޝަލް އެޑްވައިޒަރު އަޒްލީން އަޙުމަދު
- ލީޑަރުގެ އެޑްވައިޒަރު އިގްބާލް އާދަމް
- ލީޑަރުގެ އެޑްވައިޒަރު ހަސަން މުޣުނީ
- ޑެޕިއުޓީ ލީޑަރު އަހުމަދު ސައުދު
- ސުލޫކީ ކޮމެޓީގެ ޗެއާ ޙުސައިން ޝަހުދީ
- ޖޭޕީ ޒުވާނުންގެ ލީގުގެ ރައީސް ޢަބްދުالله ޔާމީން ރަޝީދު
ޖުމުހޫރީ ޕާޓީން މިހާރު ދަނީ ކުރިޔަށް އޮތް ރިޔާސީ އިންތިޚާބަށް ތައްޔާރު ވަމުންނެވެ. އަދި ޕާޓީގެ ޓިކެޓްގައި ރިޔާސީ އިންތިޚާބުގައި ވާދަކުރަން ބޭނުންވާ ފަރާތްތަކަށް މިމަހުގެ 30 ވަނަ ދުވަހުގެ ނިޔަލަށް ވަނީ ފުރުސަތު ހުޅުވާލާފައެވެ.
