ފާއިތުވި އެމްޑީޕީގެ ރިޔާސީ ޕްރައިމަރީ ވެގެންދިޔައީ އެ ޕާޓީގެ ސިޔާސީ ހަޔާތުގައިވެސް ބޭއްވުނު އެންމެ ވާދަވެރި އިންތިޚާބު ކަމުގައެވެ. އަދި މި އިންތިޚާބު ވާދަވެރި ވުމުގެ އިތުރުން، ޚާއްސަވެގެންދިޔަ އަނެއް ސަބަބަކީ، މިއިންތިޚާބަކީ ރާއްޖޭގައި އޮތް އެންމެ ދޮށީ އެއް ޕާޓީކަމުގައިވާ، ނަމުން ޑިމޮކްރަޓިކް ވުމުގެ އިތުރުން، ޑިމޮކްރަސީގެ ސިފަތަށްވެސް އެންމެ ބޮޑަށް އަށަގެންފައި އޮތް އެމްޑީޕީގެ އެތެރޭގައި، ގިނަބަޔަކަށް ކުރިން އުއްމީދު ކުރެވިފައި ނުވާ އެތައްކަމެއް ތަމްސީލްވެގެން ދިޔަ އިންތިޚާބަކަށް ވެގެން ގޮސްފައިވާތީވެސް މެއެވެ.
މިގޮތުން، މިއިންތިޚާބުގައި ޕާޓީގެ އެންމެ އިސް ދެ ލީޑަރުން ވާދަކޮށްފައިވާއިރު، އިންތިޚާބު ވެގެންދިޔައީ ރައީސް ސާިލހާއި ރައީސް މުހައްމަދު ނަޝީދުގެ "ފަހު ތަޅާލުމަށް" ކަމުގައިވެސް ދެންނެވިދާނެއެވެ. ވަރަށްވެސް ވާދަވެރިކޮށް، ހަމައެއާއެކު ޑިމޮކްރަސީގެ ހަމަތައްވެސް ފަހަނައަޅާ ގޮސް، ރައީސް ސާލިހަށްވުރެ ބޮޑަށް ނަޝީދުގެ ފަރާތުން އިންޒާރުތައް ދިނުމާއި، ޒާތީގޮތުން ފާޑު ކިޔުމާއި އެތަކެއް ދިމާކުރުމެއްވެސް ތަމްސީލު ވެގެންދިޔަ މި އިންތިޚާބަށް ނިމުންއައީ ނަޝީދުގެ މައްޗަށް ރައީސް ސާލިހު ކާމިޔާބު ހޯއްދަވައިގެންނެވެ.
އެހެންނަމަވެސް، ރައީސް ސާލިހަށް މި އިންތިޚާބުގައި ލިބިވަޑައިގެންނެވި ކާމިޔާބިއަށްވުރެ ބޮޑަށް މިއަދު ގިނަ ބައެއްގެ ސަމާލުކަން ހުއްޓެމުން ދަނީ، ރައީސް ސާލިހާއި ދެކޮޅަށް ނަޝީދު ކުރެއްވި ކެމްޕޭނާއި، ކެމްޕޭންގައި ދެއްކެވި ވާހަކަތަކާއި ވީ ވައުދުތައް މިއަދު ބިލާހަކަށްވެ، އަމިއްލަފުޅު ޕާޓީއާއި ދެކޮޅަށް ކުރައްވަމުން ގެންދަވާ ސިޔާސީ މަސައްކަތްތަކަށެވެ.
ނަޝީދު މުޅި ރިޔާސީ ކެމްޕޭންގަވެސް އަދި އޭގެ ކުރިންވެސް ދައްކަވަމުން ގެންދެވި ވާހަކައަކީ، މިހާރު ރާއްޖޭގައި އޮތް ވެރިކަމުގެ ނިޒާމު ކަމުނުދާކަމުގެ ވާހަކަ ތަކެވެ. މިހާރު އޮތް ރިޔާސީ ނިޒާމް ފެއިލްވެއްޖެ ކަމުގެ ވާހަކަތަކެވެ.
އަދި އޭގެ އިތުރުން، "ޓްރާންސިޝަނަލް ޕޮލިޓިކްސް" (ވިޔަފާރީގެ އުސޫލުން ސިޔާސީ ހަރަކާތް ހިންގުން) އެއީ ގައުމަށް އޮތް އެންމެ ބޮޑު ނުރައްކާ ކަމުގައި ވިދާޅުވެ، ކޯލިޝަން ހަދާ، ވަޒީފާތައް ގާތް މީހުންނަށް ބަހާ، ގައުމުގެ މުއްސަދިކަމުން ބައި އަޅައިގެން، ކޮންމެ ރިޔާސީ އިންތިޚާބަކަށް އަމާޒުކޮށް ހަދާ ކޯލިޝަންތަކާއި ދެކޮޅުކަން ނަޝީދުވަނީ، ފާއިތުވި ރިޔާސީ ޕްރައިމަރީގައި ވަރަށްވެސް ރަގަޅަށް ހާމަ ކޮށްދެއްވައި އެމަގުން ކެމްޕޭން ކުރައްވާފައެވެ.
ރައީސް ސާލިހުގެ ވެރިކަމުގެ ފުރަތަމަ ދޮޅު އަހަރު ފާއިތުވެގެން ދިއުމަށްފަހު، ނަޝީދު މަސައްކަތް ކުރައްވަމުން ގެންދަވާފައިވަނީ، މިހާރު އޮތް ސަރުކާރު ހިންގާ ކޯލިޝަންވެސް ރޫޅާލެއްވުމަށެވެ. އަދި ފާއިތުވި ރިޔާސީ ޕްރައިމަރީގެ ނަޝީދު ކެމްޕޭން ކުރައްވާފައިވަނީ ރިޔާސީ އިންތިޚާބުގެ ފުރަތަމަ ބުރުގައި އެއްވެސް ޕާޓީއަކާއެކު ކޯލިޝަން ހެދުމާއި ދެކޮޅަށް ވަކާލާތު ކުރައްވަމުންނެވެ.
މިގޮތުން، ރިޔާސީ އިންތިޚާބުގެ ފުތަމަ ބުރުގައި ހަދާ ކޯލިޝަންތައް ނަޝީދު ސިފަ ކުރައްވާފައިވަނީ، އެއީ ގައުމުގެ މުއްސަދިކަމުން މަހުޖަނުންނަށް ބައިއެޅުމަށް ހަދާ ޑީލްތަކެއްގެ ގޮތުގައެވެ. އެއީ ވިޔަފާރީގެ އުސޫލުން ހިންގާ ސިޔާސީ ހަރަކާތެއްގެ ގޮތުގައެވެ.
އަދި ރިޔާސީ އިންތިޚާބުގެ ފުރަތަމަ ބުރުގައި ވަކިވަކިން ވާދަކޮށްގެން މެނުވީ އެއްވެސް ސިޔާސީ ލީޑަރެއްގެ ސިޔާސީ ހަކަތަ، ނުވަތަ އޮތް ތާއީދެއް ވަޒަން ނުކުރެއްވޭނެކަމަށްވެސް ވިދާޅުވެ، ނަޝީދު ވިދާޅުވަމުން ގެންދެވީ، ރިޔާސީ އިންތިޚާބުގެ ފުރަތަމަ ބުރަށް ކޯލިޝަން ހެދުމަކީ، އޭގެ ޒާތުގައި ކުރަން ހެޔޮވާވަރުގެ ކަމެއްވެސް ނުމެ ނޫން ކަމުގައެވެ.
ޕްރައިމަރީން ބަލިވި ހިސާބުން ފެއްޓެވީ ޖޭޕީއާއެކީ ކޯލިޝަން ހެދުމުގެ މަސައްކަތް!
އެމްޑީޕީގެ ވާދަވެރި ރިޔާސީ ޕްރައިމަރީގައި ރައީސް ސާލިހާއި ވާދަކޮށް، ނަޝީދަށް ހޯއްދެވުނީ އެންމެ %38 ގެ ނަތީޖާއެކެވެ. އެއީ އެމްޑީޕީގެ އެންމެ 15،000 މެމްބަރުންގެ ވޯޓެވެ. ރިޔާސީ ޕްރައިމަރީގެ ބޮޑު ބައްޔަށްފަހު ނަޝީދު ވިދާޅުވެފައިވަނީ އިންތިޚާބުން ބަލިވީ އެޕާޓީގެ 30،000 މެމްބަރުން ޕާޓީގެ ދަފްތަރުން އުނިކުރުމުން ކަމަށާއި، ޕްރައިމަރީގެ ކާމިޔާބީއާއެކީވެސް ރައީސް ސާލިހަށް ރިޔާސީ އިންތިޚާބު ކާމިޔާބު ނުކުރެއްވޭނެ ކަމުގައެވެ.
އެއަށްފަހު ނަޝީދުވަނީ ފިކުރެއްގެ ދިރުން އެއީ އެމްޑީޕީގެ އެތެރޭގައި ހިންގާ ވަކި ސިޔާސީ ހަރަކާތެއްކަން އިއުލާންކޮށް، ކުރިޔަށް އޮތް ރިޔާސީ އިންތިޚާބުގައި ރައީސް ސާލިހަށް ތާއީދު ނުކުރައްވާނޭކަން ރަސްމީކޮށް އިއުލާންވެސް ކުރައްވާފައެވެ.
އެހެންނަމަވެސް، ރިޔާސީ އިންތިޚާބުގެ ފުރަތަމަ ބުރުގައި ކޯލިޝަން ހަދާ، ގައުމުގެ މުއްސަދިކަމުން މަހުޖަނުންނަށް ބައި އަޅަމުން ދާކަމުގެ ޝަކުވާ ކުރައްވަމުން ގެންދެވި، ނަޝީދު ރިޔާސީ އިންތިޚާބުގައި ވަކީން ވާދަ ކުރެއްވުމުގެ ބަދަލުގައި، މިހާރު ފައްޓަވާފައިވާ މަސައްކަތަކީ، ރިޔާސީ އިންތިޚާބުގައި ވާދަކުރައްވާނޭކަން އިއުލާން ކޮށްފައިވާ ޖުމުހޫރީ ޕާޓީއާއެކީ ކޯލިޝަން ހެދުމުގެ މަސައްކަތްތަކެވެ.
މިގޮތުން، އެކީގައި މެނިފެސްޓޯ އެކުލަވާލާ، ޖުމުހޫރީ ޕާޓީއާއެކީ އިންތިޚާބުގައި ވާދުރުމުގެ މަޝްވަރާތަށް ކުރިޔަށް ގެންގޮސް، ދެބައިމީހުން އެކީގައި އުފައްދާ ސަރުކާރެއްގައި ބައި ބަހާނޭ ގޮތްތަކާ ގުޅޭ ގޮތުގެ މަޝްވަރާތައް ނަޝީދު މިހާރުވަނީ ޖުމުހޫރީ ޕާޓީއާއެކީ ފައްޓަވާފައެވެ.
މިގޮތުން ޖުމުހޫރީ ޕާޓީއާއެކީ ނަޝީދުގެ "ފިކުރެއްގެ ދިރުން" ސިޔާސީ ހަރަކާތުން ބޭއްވި ބައްދަލުވުމަށްފަހު ނޫސްވެރިންނަށް މައުލޫމާތު ދެއްވަމުން، ރައްޔިތުންގެ މަޖިލިހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެފައިވަނީ، ޖުމުހޫރީ ޕާޓީއާއެކީ މިހާރު ކުރިޔަށް ދަނީ އެކީގައި މަސައްކަތްކުރުމަށް ބޭނުންވާ ސިޔާސަތުތައް އެކުލަވާލުމުގެ މަސައްކަތް ކަމުގައެވެ.
އެއީ ރިޔާސީ އިންތިޚާބުގެ ފުރަތަމަ ބުރުގައި ފިކުރެއްގެ ދިރުމާއި ޖުމުހޫރީ ޕާޓީ އެއް ކޯލިޝަނެއްގައި ވާދަކުރުމަށް ބޭނުންވާ ސިޔާސަތުތަކެވެ. އެކީގައި މަސައްކަތްކޮށް، އެއް ކޯލިޝަނެއްގައި ތިބެ، އިންތިޚާބު ކާމިޔާބު ކުރެވިއްޖެ ނަމަ، ސަރުކާރެއް އެކުލަވާލާނޭ ގޮތުގެ ވާހަކަތަކެވެ.
ކީހާ ޅެން ފަރިއްސަށް!
ނަޝީދުގެ ފިކުރެއްގެ ދިރުން ސިޔާސީ ހަރަކާތުގެ ފަރާތުން ޖުމުހޫރީ ޕާޓީއާއެކީ މިހާރު ކުރިޔަށް ގެންދާ މަޝްވަރާތަކުން ކަށަވަރުވެ ޔަގީންވާއޮތް އެއް ހަގީގަތަކީ، ރިޔާސީ އިންތިޚާބުގައި ތާއީދު ކުރެއްވުމަށް ނަޝީދު މިހާރު ނިންމަވާފައިވަނީ ޖުމުހޫރީ ޕާޓީގެ ލީޑަރު ގާސިމް އިބުރާހިމްއަށް ކަމަށެވެ.
ރިޔާސީ އިންތިޚާބެއްގެ ފުރަތަމަ ބުރުގައި ކޯލިޝަން ހަދައިގެން ގައުމު ފޮތި ފޮތި ކޮށްގެން ނުވާނެކަމަށް ވިދާޅުވި ނަޝީދު މިހާރު އަވަދިނެތި އުޅުއްވަމުން ގެންދަވަނީ، ރިޔާސީ އިންތިޚާބުގެ ފުރަތަމަ ބުރަށް ގާސިމް އިބުރާހިމްއާއެކީ ކޯލިޝަން އެކުލަވާލުމުގެ މަސައްކަތުގައެވެ. ރިޔާސީ ނިޒާމް ކަމު ނުދާކަމަށާއި، އެއީ ފެއިލްވެފައި އޮތް ނިޒާމެއްކަމަށް ވިދާޅުވެ، އެ ނިޒާމުގައި ކޯލިޝަން ނުހެދޭނެކަމަށް ވިދާޅުވި ނަޝީދަށް އެ ނިޒާމުގެ ތެރެއިންވެސް ކޯލިޝަންތައް އެކުލަވާލޭނޭ ގޮތްތައްވެސް މިހާރު ހޯދިއްޖެއެވެ.
ކޮންމެ ރިޔާސީ އިންތިޚާބެއްގައިވެސް، ގައުމު ފޮތިފޮތިކޮށް، ގައުމުގެ މުއްސަނދިކަމުން މަހުޖަނުންނަށް ބައި އަޅަމުންދާކަމަށް ވިދާޅުވި ނަޝީދަށް، ވެރިކަމަށް ވަޑައިގެންނެވޭނެ އެހެން މަގެއް ފެނިވަޑައި ނުގަތުމުން، މަހުޖަނުންނާއެކީ މަޝްވަރާކޮށް، ގައުމުގެ މުއްސަނދިކަމުން ބައި އަޅާ ބައިބެހުންވެސް ވަރިހަމަ ވީއެވެ.
"ޓްރާންސިޝަނަލް ޕޮލިޓިކްސް" (ވިޔަފާރޫގެ އުސޫލުން ސިޔާސީ ހަރަކާތް) ހިންގައިގެން ނުވާނެކަމަށް ވިދާޅުވަމުން ގެންދިއެއްކަމުން، އެއުސޫލުން ސިޔާސީ ހަރަކާތް ހިންގުންވެސް މިއަދު ވަރިހަމަ ވެއްޖެއެވެ. ތިމާގެ އަމިއްލަ މަސްލަހަތު ހިމާޔަތް ކުރާން ޖެހުމުން، އެއަކުން ގައުމަށް ލިބޭނެ ގެއްލުމެއް މިއަދަކު ނެތެވެ.
ވެރިކަމަށް ވަޑައިގެންނެވޭނެ އެހެން މަގެއް ފެނިވަޑައި ނުގަތުމުން، ގައުމު ފޮތިފޮތިވެސް ކޮއްލަންވީއެވެ. ވިޔަފާރީގެ އުސޫލުން ސިޔާސީ ހަރަކާތްވެސް ހިންގާން ވީއެވެ. މަހުޖަނުންނާ ބައިއަތު ހިފާ، ކޭކު ފަޅާންވީ ގޮތްތަކާ ބެހޭގޮތުން މަޝްވަރާވެސް ކުރާންވީއެވެ. ކީހާ ޅެން ފަރިއްސައްވެ، ވަރިހަމަވީއެވެ.
އެހެންނަމަވެސް، ވަކީން ޚާއްސަކޮށް ރިޔާސީ އިންތިޚާބެއް ބޯމަތިވެގެން އަންނައިރު މިއީ ހަގީގަތުގައި ގައުމުގެ ރައްޔިތުން ވިސްނާ ފިކުރު ހިންގާންވީ ބޮޑު މައްސަލައެއްކަމުގައި ދަންނަވާން ޖެހެއެވެ. ބަހާއި އަމަލާ ދިމާވާ ސިޔާސީ ވެރީންނަކީ ކޮބައިކަން ރައްޔިތުން ދެނެގަންނަން އެބަޖެހެއެވެ. ސިޔާސީ ލީޑަރުންގެ ހިތްތަކުގައި ގައުމަށް އިޚްލާސްތެރިކަން އޮތީ ކިހާ މިންވަރަކަށްތޯ ވަޒަން ކުރާން ޖެހެއެވެ.
މިއުސޫލުން އެއްވެސް ކަމަކާމެދު ހުޅުވިފައިވާ ސިކުނޑިއަކުން ނުވިސްނާ، ސިޔާސީ ލީޑަރުންނަށް ކަނު ލޯބި ދީ، އައްޔަކަސް އަނދިރިއަކަސް ވާނޭ އެއްވަރޭބުނެ، ރައްޔިތުން ވޯޓު ދީފިނަމަ، ތިމާމެން އަމިއްލައަށް އެ ވެއްޓިގަންނަނީ ފުން އަދަވަޅަކަށް ކަމީ ކަށަވަރުވެ ޔަގީންވާން އޮތް ކަމެކެވެ.
