އިސްރާއީލުގެ ޖުޑިޝަރީއަށް އެގައުމުގެ ބޮޑުވަޒީރު ނަތަންޔާހޫ ގެންނަވަން މަސައްކަތް ކުރަމުންދާ އިސްލާހުތާއި ދެކޮޅަށް އިސްރާއީލުގައި ކުރަމުން އައި މުޒާހިރާ ވަރުގަދަކޮށް، މުޅި އިސްރާއީލް ހުއްޓުމަކަށް އައިސްފިއެވެ.
އިސްރާއީލުގެ ތާރީޚުގައި އެންމެ ދިގު މުއްދަތަކަށް ބޮޑުވަޒީރުކަން ކުރައްވަމުން ގެންދަވާ، ނަތަންޔާހޫވަނީ، އެންމެ ފަހުން ބޮޑުވަޒީރުކަމަށް ވަޑައިގެންނެވުމަށްފަހު، އެގައުމުގެ ޖުޑިޝަރީ އިސްލާހު ކުރުމުގެ ނަމުގައި، ފަނޑިޔާރުން އައްޔަން ކުރުމާއި ވަކިކުރުމުގެ ބާރު އިސްރާއީލުގެ ގާނޫނުހަދާ މަޖިލީހަށް ނެގުމަށް، ގާނޫނަށް އިސްލާހު ގެނައުމުގެ މަސައްކަތް ފައްޓަވާފައެވެ.
އެހެންނަމަވެސް ނަތަންޔާހޫގެ މި އިސްލާހީ އެޖެންޑާއާއި ދެކޮޅަށް ފާއިތުވެދިޔަ ދެ މަހެއްހާ ދުވަހު އިސްރާއީލުގައި ކުރަމުން އައިސްފައިވާ މުޒާހިރާ ވަރުގަދަ ވެގެން ދިޔައީ، ނަތަންޔާހޫގެ ޕްލޭނާއި ދެކޮޅުހެދި އެގައުމުގެ ދިފާއީ ވަޒީރު މަގާމުން ދުރުކުރުމާއި ގުޅިގެންނެވެ.
ނަތަންޔާހޫގެ ޖުޑީޝަލް ރީފޯމަށް ފާޑުކިޔާ ފަރާތްތަކުން ބުނަމުންދަނީ މިއީ އެގައުމުގެ ޖުޑީޝަރީ ބަލިކަށިކޮށް، ނަތަންޔާހޫގެ މައްޗަށް ކުރެވިފައިވާ ކޮރަޕްޝަންގެ ދައުވާއިން ސަލާމަތްވުމަށް ގެންނަ އިސްލާހެއް ކަމުގައެވެ.
ނަތަންޔާހޫގެ ޕްލޭނާއި ދެކޮޅަށް އެންމެ ފުރަތަމަ މުޒާހިރާތައް ފަށާފައިވަނީ ފާއިތުވު ޖެނުއަރީމަހުގެ 14 ވަނަ ދުވަހުއެވެ. އެއަށްފަހު މި މުޒާހިރާތައް ކުރިޔަށް ގޮސްފައިވަނީ ކޮންމެ ހަފްތާއަކުވެސް ކުރިޔަށް ދާ ހަރަކާތެއްގެ ގޮތުގައެވެ.
އެއަށްފަހު މުޒާހިރާގައި ބައިވެރިވާ އިސްރާއީލުގެ ރައްޔިތުން ހާހުން އިތުރުވަމުން ގޮސް، އިސްރާއީލުގެ އެންމެ ބޮޑު މަދަނީ އިއްތިހާދުންވެސް މިހާރުވަނި މިމުޒާހިރާއަށް ތާއީދުކުރާކަން އިއުލާންކޮށް، މުޒާހިރާތަކާއި ގުޅުމަށް ނިންމާފައެވެ.
އަދި މިއަދު އިސްރާއީލުގެ އެކި ސަރަހައްދުތަކަށް މުޒާހިރާ ފުޅާވެ، އެގައުމުގެ އެންމެ ބޮޑު ދެބަނދުރުގެ އޮޕަރޭޝަންތައްވެސް ވަނީ ހުއްޓުމަކަށް އައިސްފައެވެ. އަދި ވެރިރަށް ޓެލްއަވީވްގެ އެއަރޕޯޓު ހުއްޓުމަކަށް އައިސް، މޯލްތަކާއި ފުޑް ޗެއިންތައްވެސް ވަނީ ބަންދު ކޮށްފައެވެ.
ނަތަންޔާހޫގެ ޖުޑީޝަލް ރީޕޯމްއާއި ގުޅޭގޮތުން އެނާގެ ސަރުކާރުގެ ތެރޭގައިވެސް ވަނީ ވަރަށް ބޮޑަށް ޚިޔާލު ތަފާތުވެފައެވެ. މިގޮތުން، މި ޕްލޭނާއި ދެކޮޅުހެދި، އޭނާގެ ސަރުކާރުގެ ޑިފެންސް މިނިސްޓަރު މަގާމުން ދުރުކޮށްފައިވާއިރު، އޭނާގެ ކޯލިޝަން ސަރުކާރުގައި ހިމެނޭ ހައްދު ފަހަނައެޅި ވަޒީރެއް ކަމުގައިވާ، ދާޚިލީ ވަޒީރު ވިދާޅުވެފައިވަނީ، ރީފޯމް ޕްލޭން ހުއްޓުމަކަށް ގެނެސްފިނަމަ އޭނާ މަގާމުން އިސްތިއުފާ ދެއްވާނެ ކަމުގައެވެ.
ނަތަންޔާހޫ އިސްރާއީލުގެ ޖުޑިޝަރީއަށް ގެންނަވަން މަސައްކަތް ކުރައްވާ އިސްލާހުތަކުން އެގައުމުގެ ސުޕްރިމް ކޯޓަށް ލިބިފައިވާ ބާރުތައް ވަރަށް ބޮޑަށް އުނިވެގެން ދާނެއެވެ. މިގޮތުން މިއިސްލާހު ގެނެސްފިނަމަ، ގާނޫނުހަދާ މަޖިލީހުގެ ސިމްޕަލް މެޖޯރިޓީއަށް ސުޕްރީމްކޯޓުގެ ނިންމުންތަކަށް ބަދަލު ގެނައުމުގެ ބާރު ލިބިގެން ދާނެއެވެ. އެއީ 120 މެމްބަރުން ހިމެނޭ ގާނޫނުހަދާ މަޖިލިހުގެ 61 ވޯޓުންނެވެ.
މީގެ އިތުރުން މި އިސްލާހުތަކުން، އިސްރާއީލުގެ ސުޕްރީމް ކޯޓަށް ފަނޑިޔާރުން އައްޔަން ކުރާ ގޮތަށް ބޮޑެތި ބަދަލުތައް އައުމުގެ އިތުރުން، ކޯޓުތަކަށް ފަނޑިޔާރުން އައްޔަން ކުރުމުގެ ހުރިހާ ބާރެއް ލިބިގެން ދާނީ ސިޔާސީ ފަރާތްތަކަށެވެ.
ގިނަ ބަޔަކު ތުހުމަތު ކުރާ ގޮތުގައި، ނަތަންޔާހޫގެ މި ބަދަލުތަކަކީ، އޭނާގެ މައްޗަށް ކޮށްފައިވާ ކޮރަޕްޝަންގެ ދައުވާތަކުން ސަލާމަތްވުމަށް އޭނާ ގެންނަވަން މަސައްކަތް ކުރައްވާ ބަދަލުތަކެއް ކަމުގައެވެ. އެހެންނަމަވެސް މި ތުހުމަތުތަކަށް ނަތަންޔާހޫ އިންކާރު ކުރައްވައެވެ.
