އެސްޓީއޯގައި ހުސައިން އަމްރު އަދާކުރައްވަމުން ގެންދެވި މަގާމުތަކުން ވަކިކުރަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ދާދި ދެންމެ ނިންމައިފިއެވެ.

ސަރުކާރުން ޕީސީބީ އަށް ފޮނުވާފައި ވަނީ އަމްރު އެސްޓީއޯގައި އަދާކުރައްވަމުން ގެންދަވާ މެނޭޖިން ޑިރެކްޓަރުކަމުގެ އިތުރުން ބޯޑު ޑިރެކްޓަރު ކަމުންނާއި ސީއީއޯ ކަމުން ވެސް ވަކިކޮށް ދިނުމަށް އެދިއެވެ. ސަރުކާރުން އެދުނު ގޮތަށް އަމްރު މަގާމުން ވަކިކޮށް، އެމަގާމަށް އިތުރު މީހަކު އައްޔަން ކުރެވެންދެން އެސްޓީއޯގެ ހިންގުން ވަގުތީ ގޮތުން އެ ކުންފުނީގެ ސީއެފްއޯ މުހައްމަދު ނިޒާމް އާއި ހަވާލު ކުރަން ޕީސީބީން ވަނީ ނިންމާފައެވެ.

އޭނާ އެ މަގާމުތަކަށް ޕީސީބީން އައްޔަންކުރީ ނޮވެމްބަރު 18، 2018 ގައެވެ. އަމްރު މަގާމުން ވަކިކޮށް މެނޭޖިން ޑިރެކްޓަރު އައްޔަން ކުރެވެން ދެން އެސްޓީއޯގެ ހިންގުން ވަގުތީ ގޮތުން ހަވާލުކުރަން ޕީސީބީން ނިންމާފައިވަނީ އެ ކުންފުނީގެ ސީއެފްއޯ މުހައްމަދު ނިޒާމުއާއެވެ.

އަމްރު ވަކި ކުރަން ޕީސީބީން ނިންމާފައިވާއިރު، ރޭ އޭނާ ބައިވެރިވެވަޑައިގަންނަވަން އޮތް ދައުލަތުގެ މީޑިއާ، ޕީއެސްއެމްގެ ޕްރޮގްރާމެއް ވެސް ވަނީ ކެންސަލް ކޮށްފައެވެ. ނަޝީދުގެ ފެކްޝަން މެމްބަރުން ވިދާޅުވާ ގޮތުގައި އެ ބައްދަލުވުން ކެންސަލް ކުރީ ރައީސް އޮފީހުން އަންގައިގެންނެވެ.

އެމްޑީޕީގެ ރިޔާސީ މެނިފެސްޓޯ އާއި ސަރުކާރުގެ ސިޔާސަތުތައް އެކުލަވާލުމުގައި މުހިންމު ދައުރެއް އަދާކުރެއްވި އަމްރު އެސްޓީއޯ އިން ވަކި ކުރީ މިދިޔަ ޖެނުއަރީގައި ބޭއްވި އެމްޑީޕީގެ ރިޔާސީ ކެމްޕޭނުން ފެށިގެން ރައްޔިތުންގެ މަޖިލިހުގެ ރައީސް މުހައްމަދު ނަޝީދު ފެކްޝަންގައި އުޅުއްވަމުން ގެންދަވަނިކޮށެވެ. އެމްޑީޕީގެ ރިޔާސީ ޕްރައިމަރީގައި އަމްރު ތާއީދު ކުރެއްވީ ވެސް ނަޝީދަށެވެ. ޕްރައިމަރީން ނަޝީދަށް ލިބިވަޑައިގެންނެވި ނާކާމީޔާބީ އަށް ފަހު ވެސް އަމްރު ހުންނެވީ ނަޝީދުގެ ފަޅީގައެވެ. އެމްޑީޕީގެ ތެރެއިން ނަޝީދު ހިންގަވާ "ފިކުރެއްގެ ދިރުން" ހަރަކާތަށް ވެސް އަމްރުގެ ތާއީދު ވަނީ ލިބިވަޑައިގެންފައެވެ.

ރައީސް އޮފީހުން ވިދާޅުވީ ސަރުކާރު ކުންފުނިތަކުގެ ހިންގުމަށް އަބަދުވެސް ބަދަލުތައް ގެންނަ ކަމަށާއި އަމްރު މަޤާމުން ވަކިކުރަން ނިންމާފައިވަނީ އެފަދަ ބަދަލެއްގެ ތެރެއިންކަމަށެވެ.