ރަޝިއާއިން ޓެކްޓިކަލް ނިއުކުލިއަރ ހަތިޔާރު (ހަނގުރާމައި ބޭނުން ކުރެވޭ ނިއުކުލިއަރ ހަތިޔާރު) އަވަށްޓެރި ބެލަރޫސްގައި ބެހެއްޓުމަށް ނިންމާފައިވާކަން ރަޝިއާގެ ރައީސް ރައީސް ލާޑިމިރު ޕުޓިން ހާމަ ކުރައްވައިފިއެވެ.
ރަޝިއާގެ ސްޓޭޓް މީޑިއާއިން ހާމަ ކޮށްފައިވާ ގޮތުގައި، ރަޝިއާގެ މި ނިންމުން "ނޮން-ޕްރޮލިފެރޭޝަން އެއްބަސްވުމާއި" ޚިލާފުނުވާނެ ކަމަށް ޕުޓިން ވަނީ ވިދާޅުވެފައެވެ. އަދި ރަޝިއާގެ ނިންމުން ޕުޓިން އަޅާ ކިޔުއްވާފައިވަނީ އެމެރިކާއިން އެގައުމުގެ ހަތިޔާރު ޔޫރަޕް ބައްރުގައި ގާއިމްކޮށްފައިވާވުމާ ކަމުގައިވެސް ރަޝިއާގެ ސްޓޭޓް މީޑިއާއިން ހާމަ ކޮށްފައި ވެއެވެ.
ރަޝިއާގެ ސްޓޭޓް މީޑިއާއިން އިތުރަށް ރިޕޯޓު ކޮށްފައިވާ ގޮތުގައ ބެރަރޫސްގައި ނިއުކުލިއަރ ހަތިޔާރު ބެހެއްޓި ކަމުގައިވި ނަމަވެސް، ހަތިޔާރުގެ ކޮންޓްރޯލް އެގައުމަށް ދޫކޮށެއް ނުލާނެއެވެ.
ރަޝިއާގެ މި ނިންމުމަށްފަހު އެމެރިކާއިން ބުނެފައިވަނީ، ރަޝިއާއިން ނިއުކުލިއަރ ހަތިޔާރުގެ ބޭނުން ކުރުމަށް ތައްޔާރުވަމުން ދާކަމުގައި އެގައުމުން ގަބޫލެއް ނުކުރެއެވެ.
އަހަރުމެންގެ ނިއުކުރިއަރ ސްޓަރޓެޖީއަށް އެއްވެސް ބަދަލެއް ގެންނަން ޖެހޭކަމަކަށް ނުދެކެވެ،" ޔޫއެސް ޑިފެންސް ޑިޕާޓްމަންޓުން ނެރެފައިވާ ބަޔާނެއްގައި ބުނެފައި ވެއެވެ.
"އަހަރެމެން މިތިބީ ނޭޓޯގެ ގައުމުތަކުގެ ސަލާމަތްތެރިކަން ކަށަވަރު ކޮށްދީގެން."
ހޮނިހިރު ދުވަހު ރަޝިއާގެ ޓީވީގައި ވާހަކަ ދައްކަވަމުން އެގައުމުގެ ރައީސް ޕުޓިންވަނީ، ބެލަރޫސްގެ ލީޑަރ އެލެގްޒެންޑަރ ލުކަޝެންކޯ ބެލަރޫސްގައި ޓެކްޓިކަލް ނިއުކުލިއަރ ހަތިޔާރު ބަހައްޓާ ދިނުމަށް އެދެމުންދާތާ ގިނަ ދުވަސްތަކެއް ވެފައިވާކަމަށް ވަނީ ވިދާޅުވެފައެވެ.
ޕުޓިން ވިދާޅުވި ގޮތުގައި، ބެލަރޫސްގައި ޓެކްޓިކަލް ނިއުކުލިއަރ ހަތިޔާރު ބެހެއްޓުމަށް ބޭނުންވާ ހުރިހާ ތައްޔާރީތަކެއް އަންނަ ޖުލައިމަހުގެ 1 ވަނަ ދުވަހުގެ ނިޔަލަށް ނިންމުމަށް ވަނީ ހަމަޖެހިފައެވެ.
ޕުޓިން ވިދާޅުވި ގޮތުގައި، ނިއުކުލިއަރ ހަތިޔާރު އުފުލުމުގެ ގާބިލްކަން ލިބިފައިވާ، ރަޝިއާގެ އިސްކަންދަރު ޓެކްޓިކަލް މިސައިލް ސިސްޓަމްތަކެއް މިހާރުވަނީ ބަލަރޫސްގައި ބެހެއްޓިފައެވެ. އެހެންނަމަވެސް ނިއުކުލިއަރ ހަތިޔާރު ބެލަރޫސްއަށް ގެންދާނެ ދުވަހެއް ޕުޓިން ހާމަ ކުރައްވާފައެއް ނުވެއެެވެ.
މިއީ، 1990 މެދުތެރެއަށްފަހު ރަޝިއާއިން އެގައުމުން ބޭރުގައި ނިއުކުލިއަރ ހަތިޔާރު ގާއިމްކުރާ ފުރަތަމަ ފަހަރެވެ.
ސޯވިއެޓް ޔޫނިއަން 1991 އަހަރު ރޫޅިގެން ދިޔައިރު، ސޯވިއެޓް ޔޫނިއަންގެ ނިއުކުލިއަރ ހަތިޔާރުތައް، އެ ޔޫނިއަންއިން މިނިވަންކަން ލިބުނު 4 ގައުމެއްގައި ހުއްޓެވެ. އެއީ ރަޝިއާ، ޔޫކުރެއިން، ބެލަރޫސް އަދި ކަޒަކިސްތާންއެވެ. އެހެންނަމަވެސް މިހުރިހާ ގައުމަކުންވެސް ވަނީ އެގައުމުތަކުގައި ހުރި ނިއުކުލިއަރ ހަތިޔާރުތައް 1996ގެ ނިޔަލަށް އަބުރާ ރަޝިއާއަށް ރައްދު ކޮށްދީ ނިންމާފައެވެ.
