ދައުލަތުގެ މީޑިއާއިން މިރޭ ދެއްކުމަށް ހަމަޖެހިފައި އޮތް ސްޓޭޓް ޓްރޭޑިންގ އޯގަނިޒޭޝަން (އެސްޓީއޯ)ގެ މެނޭޖިންގ ޑިރެކްޓަރ ހުސެއިން އަމްރު މުހައްމަދު ރަޝާދުގެ ޕްރޮގްރާމް ދެއްކުން ކުއްލިއަކަށް މަނާކުރުމާއި ގުޅިގެން ގިނަ ބައެއްގެ ފާޑުކިޔުން ދައުލަތުގެ މީޑިއާއަށް އަމާޒުވެއްޖެއެވެ.
އަމްރު ރެކޯޑުކުރި ޕްރޮގުރާމު މިރޭ 21:00ގައި ދައުލަތުގެ މީޑިއާގެ ނިއުސް ޗެނަލުން ދައްކާނެކަމަށް އެސްޓީއޯއިން ވަނީ މިއަދު ޓުވީޓުވެސްކޮށްފައެވެ. ނަމަވެސް ޕްރޮގުރާމު ދައްކަން އޮތް ވަގުތު ޖެހުނުއިރު ދެއްކީ ކުރީގައި ދައްކާފައި އޮތް ޕްރޮގުރާމެއްގެ ރެކޯޑިންއެެވެ. މައުލޫމާތު ލިބިފައިވާ ގޮތުގައި އަމްރުގެ ޕްރޮގުރާމު ހުއްޓުވީ ސީދާ ރައީސް އޮފީހުން އަންގައިގެންނެވެ. ރައީސް އޮފީހުގެ ތަރުޖަމާން މިއުވާން ވަނީ ޕީއެސްއެމް އަށް ވަޑައިގެން ޕްރޮގުރާމު ނުދައްކާކަން ކަށަވަރުވެސް ކޮށްފައިކަމަށް ބައެއް އޮންލައިން މީޑިއާތަކުގައި ބުނެފައިވެއެވެ.
ދައުލަތުގެ ކުންފުންޏެއްގެ އެމްޑީގެ މަޤާމުގައި ހުންނެވި ބޭފުޅެއްގެ ޕްރޮގުރާމު ކުއްލިއަކަށް ނުދައްކަން ނިންމި ނިންމުމާއި ގުޅިގެން ގިނަ ބައެއްގެ ފާޑުކިޔުން ވަނީ ދައުލަތުގެ މީޑިއާއަށް އަމާޒުވެފައެވެ. ޚާއްސަކޮށް ދައުލަތުގެ މީޑިއާއިން ސަރުކާރު ނޫން ބަޔަކަށް ފުރުސަތު ނުލިބޭކަމުގެ ޝަކުވާ ކުރަމުންދިޔަ ދަނޑިވަޅެއްގައި މިފަދަ ކަމެއް ދައުލަތުގެ މީޑިއާއިން ކުރުމުން ކިޔަމުންދާ ފާޑުކިޔުންތައް ވަނީ އިތުރުވެފައެވެ.
މިކަމަށް ފާޑު ކިޔައި، އިދިކޮޅު ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވީ މި ޕްރޮގުރާމު އޮތްކަން އެސްޓީއޯއިން ޓުވީޓް ކުރި ހިސާބުން ވަރަށް ބޮޑަށް އެސްޓީއޯއިން ރޯދައަށް ވެފައިވާ ތައްޔާރީތައް ބަލާލަން ބޭނުންވި ކަމަށެވެ. ނަމަވެސް ފަހުން އެގުނީ ޕްރޮގުރާމު ހުއްޓުވުމަށް ރައީސް އޮފީހުގެ ތަރުޖަމާނު ޕީއެސްއެމްއަށް ވަޑައިގެން ޕްރޮގުރާމު ހުއްޓުވިކަމަށެވެ. ދައުލަތުގެ މީޑިއާއިން މިހާ ޒިންމާދާރުކަން ކުޑަކޮށް މިކަން ކުރުމަކީ އެއްވެސް ހާލެއްގައި ބަލައި ގަނެވޭނެ ކަމެއް ނޫންކަމަށް ޝިޔާމް ވިދާޅުވިއެވެ.
ވަރަށް ބޮޑަށް އިންތިޒާރު ކުރިން މިޕްރޮގުރާމަށް. ރޯދަމަހު އެސް.ޓީ.އޯ ގެ ރޭވުންތެރިކަމުގެ ވާހަކަ އަޑުއަހާލަންހުރީ. ފަހުން އެނގުނީ ރައީސް އޮފީހުން ތަރުޖަމާނު ޕީ.އެ.އެސް.އެމް އަށް ވަޑައިގެން ޕްރޮގުރާމް ހުއްޓުވިކަން. އިމްތިޔާޒުގެ ޕްރޮގުރާމެއްވެސް ހުއްޓުވައިފި ކަމަށްވޭ.
– ޝިޔާމް ވިދާޅުވިއެވެ.
ވަރަށް ބޮޑަށް އިންތިޒާރު ކުރިން މިޕްރޮގުރާމަށް. ރޯދަމަހު އެސް.ޓީ.އޯ ގެ ރޭވުންތެރިކަމުގެ ވާހަކަ އަޑުއަހާލަންހުރީ. ފަހުން އެނގުނީ ރައީސް އޮފީހުން @MvSpokesperson ޕީ.އެ.އެސް.އެމް އަށް ވަޑައިގެން ޕްރޮގުރާމް ހުއްޓުވިކަން. @Imthiyazfahmy ގެ ޕްރޮގުރާމެއްވެސް ހުއްޓުވައިފިކަމަށްވޭ. https://t.co/mTvNxMnPZI
— Ahmed Shiyam (@Shiyamaldives) March 25, 2023
ޝިޔާމްގެ އިތުރުން އެމްޑީޕީގެ ޕާލިމަންޓްރީ ގްރޫޕްގެ ލީޑަރު، މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވީ މިއީ މިވެރިކަން ނިންމަން ޖެހޭކަަން ޔަގީންވާ އެއްސަބަބު ކަމަށެވެ. ދައުލަތުގެ މީޑިއާއަށް އަތްބާނައިގެން ކަންކަން ކުރުމަކީ އަބަދުވެސް ވެރިކަން ބަލިކަށިވަމުންދާއިރު ފެންނަ މަންޒަރެއްކަމަށް އާޒިމް ވިދާޅުވިއެވެ.
ރައީސް އޮފީހުން އަންގައިފި ތި ޕްރޮގުރާމު މިރޭ ޕީއެސްއެމްއިން ނުދައްކަން. ދައުލަތުގެ މީޑިއާގެ ހާލަތު. މިވެރިކަން ނިންމަންޖެހޭކަން ޔަގީން.
– އަލީ އާޒިމް ވިދާޅުވިއެވެ.
Raees ofeehun @presidencymv angaifi thi program mirey @psmnewsmv nudhehkumah. Dhaulathuge media ge haalathu. Miverikan ninmanjeheykan yageen. https://t.co/P3E80RpITW
— 𝐀𝐥𝐢 𝐀𝐳𝐢𝐦 (@aliaazim) March 25, 2023
އާޒިމްގެ އިތުރުން ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދުވެސް ވަނީ މިއީ ސަރުކާރު ބަލިކަށިވަމުންދާ ކަމުގެ ރީތި މިސާލެއްކަމަށް ވިދާޅުވެފައެވެ.
ފުދޭވަރަކަށް ބަލިކަށިވީމާ ކުރާ ބާވަތުގެ ކަންކަން.
– ވައްޑެ ވިދާޅުވިއެވެ.
ފުދޭވަރަކަށް ބަލިކަށިވީމާ ކުރާ ބާވަތުގެ ކަންކަން. https://t.co/tEASq8auMd
— Waddey (@waddey_) March 25, 2023
ރައީސް ޔާމީންގެ ވެރިކަމުގައި ދައުލަތުގެ މީޑިއާއިން ހަމަހަމަ ފުރުސަތު ނުދޭކަމަށް އޭރު އެންމެ ބާރަށް ވަކާލާތު ކުރި ފަރާތްތަކުން މިހާރު ވެރިކަމުގައި ތިބެ ދައުލަތުގެ މީޑިއާގެ ތެރެއަށް އިންތިހާއަށް ނުފޫޒު ވައްދައި، ރައީސް ޞާލިހު ނޫން މީހަކު ދެއްކުން މަނާކޮށްފައިވާކަމަށްވެސް ސޯޝަލް މީޑިއާގައި ކޮމަންޓް ކުރި ބައެއް ބޭފުޅުން ވިދާޅުވެފައެވެ. އަމްރުއަކީ ރައީސް ނަޝީދަށް ތާއީދު ކުރާ ބޭފުޅަކަށް ވާއިރު، އަމްރު ގެންގޮސް ޕްރޮގުރާމް ރެކޯޑުކުރިއިރު، ދައުލަތުގެ މީޑިއާ ހިންގަން ތިބީ ކޮން ފެކްޝަނެއްގެ ބޭފުޅުނެއް ކަމާއިމެދުވެސް ބައެއް ފަރާތްތަކުން ވަނީ ސުވާލު އުފައްދާފައެވެ.
ކުރިއަށް އޮތް ރިޔާސީ އިންތިޚާބުގެ ދުވަސް ވަރަށް ވުމުން ދައުލަތުގެ މީޑިއާއިން ހަމަހަމަ ފުރުސަތު ދޭންޖެހޭކަމަށް އިދިކޮޅު ފަރާތްތަކުން ދަނީ ބުނަމުންނެވެ.
