ދައުލަތުގެ މީޑިއާއިން މިރޭ ދެއްކުމަށް ހަމަޖެހިފައި އޮތް ސްޓޭޓް ޓްރޭޑިންގ އޯގަނިޒޭޝަން (އެސްޓީއޯ)ގެ މެނޭޖިންގ ޑިރެކްޓަރ ހުސެއިން އަމްރު މުހައްމަދު ރަޝާދުގެ ޕްރޮގްރާމް ދެއްކުން މަނާކޮށްފިއެވެ.
ދައުލަތުގެ މީޑިއާގެ ޚަބަރާއި މައުލޫމާތު ގެނެސްދޭ "ޕީއެސްއެމް ނިއުސް" އިން ގެނެސްދޭ މިރޭ ދެއްކުމަށް ހަމަޖެހިފައިވާ ރާއްޖެ މިއަދު ޕްރޮގުރާމު ރެކޯޑު ކޮށްފައިވަނީ މިއަދު ހެނދުނެވެ. މި ޕްރޮގުރާމަކީ ރަމަޟާންމަހަށް އެސްޓީއޯއިން ވެފައިވާ ތައްޔާރީތަކާއި ގުޅޭގޮތުން ގެނެސްދިން ޕްރޮގުރާމެއްކަމަށް އެނގިފައިވެއެވެ.
ސަރުކާރު ބަންދު ދުވަހަކަށް މިއަދު ވީނަމަވެސް ދައުލަތުގެ މީޑިއާއިން އެދުމުން މިމައުލޫމާތުތައް ހިއްސާ ކުރުމަށް އަމްރު ވަނީ ވަޑައިގެން އެއްގަޑިއިރުގެ ޕްރޮގުރާމް ރެކޯޑުކޮށްފައެވެ. ޕްރޮގުރާމް ރެކޯޑު ކުރިތާ ގިނަ އިރުތަކެއް ނުވެ، އެޕްރޮގުރާމު މިރޭ 21:00ގައި ދައުލަތުގެ މީޑިއާގެ ނިއުސް ޗެނަލުން ދައްކާނެކަމަށް އެސްޓީއޯއިން ވަނީ ޓުވީޓުވެސްކޮށްފައެވެ.
Our CEO and MD, @HusenAmr will be going live on @psmnewsmv #RaajjeMiadhu program tonight at 21:00hrs. #StayTuned 😄#MySTO pic.twitter.com/VPgide9zAd
— STO (@stoplc) March 25, 2023
ޕްރޮގުރާމް ދައްކަން އޮތް ގަޑިއަށް ޕްރޮގުރާމް ނުދައްކައި ދައްކާފައިވަނީ އެހެން ރެއެއްގެ ދައްކާފައި އޮތް ޕްރޮގުރާމެކެވެ. މައުލޫމާތު ލިބިފައިވާ ގޮތުގައި އަމްރުގެ ޕްރޮގުރާމު ހުއްޓުވީ ސީދާ ރައީސް އޮފީހުން އަންގައިގެންނެވެ. ރައީސް އޮފީހުގެ ތަރުޖަމާން މިއުވާން ވަނީ ޕީއެސްއެމް އަށް ވަޑައިގެން ޕްރޮގުރާމު ނުދައްކާކަން ކަށަވަރުވެސް ކޮށްފައިކަމަށް ބައެއް އޮންލައިން މީޑިއާތަކުގައި ބުނެފައިވެއެވެ.
އަމްރުއަކީ ރައީސް ނަޝީދުގެ ފިކުރެއްގެ ދިރުމަށް ތާއީދުކުރާ ބޭފުޅެކެވެ. އަދި ފިކުރެއްގެ ދިރުމުން ކުރިއަށް އޮތް ރިޔާސީ އިންތިޚާބުގައި ކޯލިޝަން ހެދުމުގެ މަޝަވްރާގައިވެސް އިސްކޮށް ހަރަކާތްތެރިވަނީ އަމްރުއެވެ.
