ރިޔާސީ އިންތިހާބު މޮނީޓާކުރަން ބޭނުންވާ ބޭރުގެ ޖަމިއްޔާތަކުން އެކަމަށް އެދި ހުށަހެޅުމަށް އިލެކްޝަންސް ކޮމިޝަނުން ހުޅުވާލައިފިއެވެ.
އިލެކްޝަންސް ކޮމިޝަނުން މިއަދު ކުރި އިއުލާނެއްގައިވަނީ ރިޔާސީ އިންތިޚާބު މޮނީޓާކުރަން ބޭނުންވާ ބޭރުގެ އޮބްޒާވަރުންނާއި މޮނީޓަރުން އެކަމަށް އެދި އީމެއިލް މެދުވެރިކޮށް ޖުލައި 25 ގެ ކުރިން އެ ކޮމިޝަނަށް ހުށަހަޅަން ޖެހޭނެ ކަމަށެވެ.
ބޭރުގެ އޮބްޒާވަރުންނާއި މޮނީޓަރުންނަށް ވެވެނީ އުމުރުން 18 އަހަރު ފުރިފައިވުމާ އެކު ބޭރުގެ ޖަމާއަތެއްގެ މަންދޫބަކަށްވުމެވެ. އަދި އެއްވެސް ކެންޑިޑޭޓަކަށް ތާއީދު ނުކުރުމަކީ ވެސް ޝަރުތެކެވެ.
ރިޔާސީ އިންތިހާބު ބޭއްވުމަށް އިލެކްޝަންސް ކޮމިޝަނުން ދަނީ ތައްޔާރީތައްވަމުންނެވެ. އެގޮތުން އެކަމަށް ބޭނުންވާ މުވައްޒަފުން ނަގައި، ތަމްރީނު ކުރުމުގެ މަސައްކަތް މިހާރު ވަނީ ފަށައިފައެވެ. އަދި އިންތިހާބު ކުރިއަށްދާއިރު އިލެކްޝަންސް ކޮމިޝަނުގެ މައި މަރުކަޒަކީ ދަރުބާރުގެ ކަމަށް ވެސް ވަނީ ކަނޑައަޅައިފައެވެ.
މިފަހަރުގެ ރިޔާސީ އިންތިހާބުގައި 280،000 މީހުންނަށް ވޯޓުލުމުގެ ހައްގު ލިބޭއިރު އިލެކްޝަންސް ކޮމިޝަނުން ބުނީ ގާތްގަނޑަކަށް 600 ވޯޓުފޮށި ބަހައްޓާނެ ކަމަށެވެ. ރިޔާސީ އިންތިހާބު ބޭއްވުމަށްޓަކައި ބަޖެޓުކޮށްފައި ވަނީ 90 މިލިއަން ރުފިޔާއެވެ. ނަމަވެސް ދެ ވަނަ ބުރަކަޖަށްދާންޖެހިއްޖެ ނަމަ 120 މިލިއަން ރުފިޔާ ހަރަދުވާނެ ކަމަށް އިލެކްޝަންސް ކޮމިޝަނުން ވަނީ އަންދާޒާކޮށްފައެވެ.
މިއަހަރުގެ ރިޔާސީ އިންތިޚާބު އަންނަ ސެޕްޓެމްބަރު މަހުގެ 9 ވަނަ ދުވަހު ބާއްވާނެއެވެ.
