މިހާރު ހިނގަމުންދާ ވެރިކަމުގެ ދައުރުގެ ތެރޭގައި މިވެރިކަމާއި ހަވާލުވެ އޭރުގެ ކޯލިޝަން ބައިވެރިން އުންމީދުކުރި މިންވަރާއި ގާތަށްވެސް ގައުމުގެ ކަންކަން އިސްލާހުވެފައި ނުވާކަމަށް ސަރުކާރު ކޯލިޝަންގައި ހިމެނޭ އެމްއާރުއެމްގެ ރައީސް އަހުމަދު ފާރިސް މައުމޫން ވިދާޅުވެއްޖެއެވެ.

ކުރިއަށް އޮތް ރިޔާސީ އިންތިޚާބާއި، ރާއްޖޭގެ ރިޔާސީ މަސްރަހާއި ގުޅޭގޮތުން ކްލަބް ހައުސްގައި ރޭ ކުރިއަށްދިޔަ ޕްރޮގުރާމެއްގައި ފާރިސްވަނީ ސަރުކާރާއިމެދު ދެކޭގޮތް ތަފްސީލީ ގޮތެއްގައި ހާމަ ކުރައްވާފައެވެ. ފާރިސް ވިދާޅުވީ ރާއްޖޭގައި މީގެ ކުރިން އޮތް ވެރިކަން ގޯސްވެގެން އެވެރިކަން ބަދަލުކޮށް އޭރުގެ ސިޔާސީ ވެރިން އެއްބައިވެގެން އުފެއްދި ސަރުކާރަކީ ވަރަށް ގިނަ އުންމީދުތަކާއިއެކު އިންތިޚާބުވި ސަރުކާރެއްކަމަށެވެ.

މިސަރުކާރުން ވެރިކަމަށް އައީ އޭރުގެ ސަރުކާރުގައި ކޮރަޕްޝަނާއި، ސިޔާސީ ނުފޫޒާއި، ޖުޑީޝަރީއަތް އޮތް ބޭނުންފަދަ ނުރަނގަޅު އެތައްކަމެއް އިސްލާހު ކުރުމަށް ބޮޑެތި އުންމީދުތަކާއި އެކުގައިކަމަށެވެ. ނަމަވެސް މިދައުރުގައިވެސް ފެނިގެން މިދަނީ އެކަންކަން ތަކުރާރުވެ އެއްވެސް ހައްލެއް ނާންނަތަންކަމަށް ފާރިސް ވިދާޅުވިއެވެ. ފާރިސް ވިދާޅުވީ މިކަންކަން ހައްލު ކުރުމަށް ސަރުކާރުގައި އެކި ގޮތްގިތުން ސީދާ ގޮތުންނާއި ނުސީދާ ގޮތުންވެސް އެދިފައިވާނެކަމަށެވެ. އެކި ފަހަރު މަތީން ސީދާ ރައީސުލްޖުމްހޫރިއްޔާއަށްވެސް މިކަންކަމުގައި އެމްއާރުއެމްގެ ހުރި ކަންބޮޑުވުން ދެންނެވިފައިވާނެކަމަށެވެ.

އަޅުގަނޑުމެން ސަރުކާރު އުފެދުނުއިރު ހުރި ކަންކަން ޚާއްސަކޮށް، ދިވެހި ރައްޔިތުންގެ ހައްގުތައް ގެއްލިގެން ދިއުން. ސިޔާސީ ނުފޫޒު ހުރިހާ ކަންކަމެއްގެ މައްޗަށް ވަނުން. ކޮރަޕްޝަންގެ ކަންތައް ފުޅާވެފަ އޮތް މިންވަރު. އަދި ޖިނާއީ އަދުލުގެ ނިޒާމު ދޯދިޔާ ވެފަ އޮތްމިންވަރު. މިކަންކަމައި ބެހޭ ގޮތުން އަޅުގަނޑުމެން ދަންނަވާފައި ހުރި ކަންކަމަށް އެކަށީގެންވާވަރުގެ އިޖާބައެއް ނުލިބޭކަމަށް އަޅުގަނޑު ދަންނަވާނަން، ވަރަށް ސާފުކޮށް. އަދި އަޅުގަނޑުމެން އުންމީދުކޮށްގެން ތިބިވަރާއި ގާތަށްވެސް ޤައުމުގެ ކަންތައް އިސްލާހުވެފަ ނެތްކަމަށް ވަރަށް ހިތާމަޔާއިއެކީ އަޅުގަނޑު ދަންނަވަން.

– ފާރިސް ވިދާޅުވިއެވެ.

ސިޔާސީ ގޮތުން ޤައުމުގެ އޮތް ހާލަތާއިމެދު ކަންބޮޑުވުން ފާޅުކޮށް ފާރިސް ވިދާޅުވީ ރާއްޖޭގެ ދަރަނި އިންތިހާށް ބޮޑުވެ ދަރަނި ދެއްކުމުގައިވެސް ގޮންހުން ހުރިކަމަށެވެ. ސަރުކާރުގެ ކުންފުނިތަކަކީ މިއަދު ސިޔާސީ ބާރުވެރިކަން ހިފެހެއްޓުމަށް ވަކި ބަޔަކަށް ވަޒީފާދޭ ތަންތަނަށް ވެފައިވާކަމަށެވެ. ކުންފުނިތަކަކީ ސަރުކާރުން ސަބްސިޑައިޒްކޮށްގެން ހިންގާ ތަންތަނަށް ވާއިރު ކުންފުނިތަކަށް އެކަށީގެން ނުވާ އަދަދަށް މުވައްޒިފުން ނަގައިގެން ހަމައެކަނި ސިޔާސީ މަޤުސަދު ހާސިލް ކުރުމަކީ ބަލަިއ ގަނެވޭނެ ކަމެއް ނޫންކަމަށް ފާރިސް ވިދާޅުވިއެވެ.

ދައުލަތުގެ ޚަރަދު ކުޑަކުރުމަށްޓަކައި މިހާރުވެސް ދައުލަތުން ކުރަންޖެހޭ ޚަރަދުތަކާއި ކުރަން ނުޖެހޭ ޚަރަދުތައް ހާމަވެ އެގެންޖެހޭކަމަށް ފާރިސް ވިދާޅުވިއެވެ. ދަރަނިކުޑަ ކުރެވޭނީވެސް ނަގަންޖެހޭ ރިސްކުތައް ނަގައި އެކަން ކުރަން މަސައްކަތް ކޮށްގެންކަމަށާއި، ހަމައެކަނި ވެރިކަން ކޮށްލުމުގެ ނިޔަތުގައި އެހާލަތަށް ގެންނަ ބަދަލުތަކަކީ އޭގައިން ޤައުމަށް މާބޮޑު މަންފާތަކެއް ކުރާނެ ކަމެއް ނޫންކަމަށްވެސް ފާރިސް ވިދާޅުވިއެވެ.

ރާއްޖޭގައި ވައްކަމާއި، މަސްތުވާތަކެތީގެ މައްސަލަވެސް މިއަދު ކަންބޮޑުވާންޖެހޭ ދަރަޖައަށް އޮތްކަމަށް ފާރިސް ވިދާޅުވިއެވެ. މިކަންކަން ހައްލު ކުރުމަށް ހެޔޮ ނިޔަތުގައި މަސައްކަތް ކުރަންޖެހޭކަމަށްވެސް އޭނާ ވިދާޅުވިއެވެ. އަދި އެމްއާރުއެމްއިން މިހާރު ކުރަމުންދާ މަސައްކަތްތައް ނިމޭއިރު، އަދި އެކުލަވާލާ ސިޔާސަތުތަކުގައި ޤައުމުގައި ހުރި މިފަދަ ކަންކަން ހައްލު ކުރާނެ ގޮތާއި އެކަންކަމަށް ބަދަލު ގެނުވޭނެ ސިޔާސަތުތައް އެކުލަވާލަިއ ރައްޔިތުންނާއި ހަމައަށް ގެންނާނެކަމަށް އޭނާ ވިދާޅުވިއެވެ.

ކުރިއަށް އޮތް ރިޔާސީ އިންތިޚާބުގައި ވާދަކުރައްވުމުގެ ވިސްނުމެއް ގެންގުޅުއްވަންތޯ ކުރެވުނު ސުވާލުގައި ފާރިސް ވިދާޅުވީ އެކަން ނިންމާނީ އެމްއާރުއެމްގެ މެމްބަރުން ކަމަށެވެ. މިހާރު ކުރަމުންދާ މަސައްކަތް ނިމި އެމްއާރުއެމްއިން ނިންމާ ގޮތެއްގެ މަތީން ޕާޓީން ކުރިއަށް ދާނެކަމަށް ފާރިސް ވިދާޅުވިއެވެ.