ސަރާ އަލީ ހާންގެ ފުރަތަމަ ފިލްމާއި ބެހޭގޮތުން އޭނާގެ ބޮޑުދައިތަ ސޯހާ އަލީ ޚާން އާއި ސުވާލުކުރުމުން ބުނީ ސާރާ އަކީ ވަރަށް ހުނަރުވެރި ކުއްޖެއްކަމާއި އަދި އޭނާއަށް ފިލްމް "ކެދާރްނާތު"ގެ ޕްރޮމޯ ވަރަށް ކަމުދިޔަ ކަމަށެވެ. އަދި އެފިލްމުގައި ސާރާގެ މަސައްކަތްވެސް އޭނާއަށް ވަރަށް ކަމުދިޔަ ކަމަށް ބުނެފައިވެއެވެ.
ސާރާއަށް ދޭނެ ނަސޭޭތަކީ ކޮބައިތޯ އެހުމުން ސޯހާ އަލީ ޚާން ބުނީ ސާރާ އަކީ ހުނަރުވެރި މޮޅު ކުއްޖެއް ކަމަށާއި އޭނާއަށް ދޭނެ ނަސޭހަތެއް ނެތް ކަމަށެވެ. އަދި ސާރާ އޭނަގެ ގޮތުގައި އަމިއްލައަށް ކުރިއަށްދާ ދިއުން ފާހަގަ ކުރެވޭ ކަމަށް ސޯހާ ބުންޏެވެ. ސާރާގެ ދެވަނަ ފިލްމު "ސިމްބާ"ގެ ޑައިރެކްޓަރ ރޯހިތު ޝެއްޓީވެސް މީގެކުރިން ބުނެފައި ވަނީ ސާރާ އަކީ އޭނަގެ އަމިއްލަ މަސައްކަތުން ކުރިއަށްދާ ކުއްޖެއް ކަމަށެވެ. ފިލްމީ ތަރިންގެ ބޮޑު ޚާންދާނަކަށް އުފަން ވިޔަސް އާއިލާގެ އެއްވެސް މީހެއްްގެ އެހީ އަކާއި ނުލާ އޭނާ މަސައްކަތްތައް ހޯދަން ދަނީވެސް އަމިއްލައަށް ކަމަށް ރޯހިތު ބުންޏެވެ.
ސާރާގެ ބޮޑުދައިތަ ސޯހާ އަލީ ޚާންގެ އިތުރުން ބައްޕަ ސައިފް އަލީ ޚާނާއި މާމަ ޝަރްމީލާ ޓެގޯރް، މަންމަ އަމްރިތާ ސިންގް އަދި ދޮންމަންމަ ކަރީނާ ކަޕޫރަކީ އިންޑިއާގެ ފިލްމު އިނޑަސްޓްރީގައި ނަންވިދާ ތަރިންނެވެ.
ފިލްމީ ކެރިއަރުގައި ސޯހާ އަކީ މާބޮޑު ކަމީޔާބީ އެއް ލިބުނު ތަރިއެއް ނޫނެވެ. ސޯހާ ގެ އެންމެ ފާހަގަ ކޮށްލެވޭ ފިލްމްއަކީ 2006 ވަނަ އަހަރުގެ ފިލްމު "ރަންގްދެ ބަސަންތީ" އެވެ. މިހާރު ސޯހާގެ ފިލްމްތައް ބެލުންތެރިންނަށް ފެންނަނީ ވަރަށް މަދުންނެވެ. އެގޮތުން އެންމެ ފަހުން ސޯހާ އަލީ ޚާން ބެލުންތެރިންނަށް ފެނިގެން ގޮސްފައި 2018 ވަނަ އަހަރު " ސާހިބް، ބީވީ އޯރް ގޭންގްސަޓަރ 3″ އިންނެވެ.
ސާރާ މިހާރު ފާހަގަވަނީ ގިނަ ބެލުންތެރިންގެ މެދުގައި މަގުބޫލު ތަރިއެއްގެ ގޮތުގައެވެ. "ކޭދާރްނާތު" އިން 2018 ވަނަ އަހަރު ފިލްމީ ދުނިޔެއަށް ނުކުމެ ސާރާ ދަނީ ބެލުންތެރިންގެ ހިތުން ޖާގަ ހޯދަމުންނެވެ. ސާރާ ގެ ކުރިއަށް އޮތް ފިލްމަކީ "ކޫލީ ނަމްބަރު ވަން" އެވެ.
