މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އެއާޕޯޓް އިމަޖެންސީ ސާވިސަސް އޮޕަރޭޝަނަށް ބޭނުންވާ ހުނަރުވެރި އަދި ގާބިލް ފަޔާ ވެހިކަލް އޮޕަރޭޓަރުން އުފެއްދުމަށް އަމާޒުކޮށްގެން ކުރިއަށް ގެންދިޔަ ލީޑިން ފަޔާ ފައިޓާ ކޯހުގެ 13 ވަނަ ބެޗް ނިންމާލައިފި އެވެ.
މިކަމަށްޓަކައި އެއަރޕޯޓުގައި އިއްޔެ އޮތް ރަސްމިއްޔާތު ޝަރަފްވެރިކޮށްދެއްވީ ޑެޕިއުޓީ ޗީފް ހިމަން ރިސޯސަސް އޮފިސަރ، ގުރައިޝާ އިސްމާއީލްއެވެ. އަދި ކާޑެއްދޫ އެއަރޕޯޓުގެ ޖެނެރަލް މެނޭޖަރ އަހުމަދު ހަބީބާއި އެމް.އޭ.ސީ.އެލްގެ އެއަރޕޯޓް އެމަރޖެންސީ ސަރވިސްގެ އިސްބޭފުޅުން ބައިވެރިވެވަޑައިގެންނެވިއެވެ.
ފަސް ހަފްތާގެ މުއްދަތައް ކުރިއަށް ގެންދިޔަ މި ކޯހަކީ އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އާއި ނޭޝަނަލް ފަޔާ ޕްރޮޓެކްޝަން އެސޯސިއޭޝަން (އެންއެފްޕީއޭ) ގެ މިންގަނޑުތަކާއި މޯލްޑިވްސް ސިވިލް އޭވިއޭޝަން އޮތޯރިޓީ (އެމްސީއޭއޭ)ގެ އުސޫލުތަކާއި އެއްގޮތްވާ ގޮތުގެ މަތިން ކުރިއަށް ގެންދިޔަ ކޯހެކެވެ. އަދި މިކޯހުގައި ކިޔަވައިދެއްވާފައިވަނީ އެމް.ސީ.އޭ.އޭގެ ސެޓިފައިޑް ޓްރެއިނަރުންނެވެ.
އެމްއޭސީއެމްއިން ހާމަކޮށްފައިވާ ގޮތުގައި، ޖުމްލަ 19 ފަޔަރމަނުން މި ތަމްރީން ޕްރޮގްރާމްވަނީ ފުރިހަމަކޮށްފައެވެ. އޭގެ ތެރޭގައި ހިމެނެނީ އެމްއޭސީއެލްގެ އެއަރޕޯޓް ފަޔަރ އެންޑް ރެސްކިއު ސަރވިސަސްގެ 17 ފަޔަރމަނުންނާއި ކާޑެއްދޫ އެއަރޕޯޓުގެ 2 ފަޔަރމަނުންނެވެ. މި ކޯހުގައި އެއަރޕޯޓް އިމަރޖެންސީ ސަރވިސަސް އޮޕަރޭޝަނަށް ބޭނުންވާ ފަޔަރ ވެހިކަލް ތައް އެކަށީގެންވާ ގޮތެއްގައި އޮޕަރޭޓްކުރާނެ ގޮތުގެ ތިއޮރިޓިކަލް އަދި ޕްރެކްޓިކަލް ސެޝަންތައް ވަނީ ކުރިއަށް ގެންގޮސްފައެވެ.
އެމްއޭސީއެލްއިން ބުނެފައިވަނީ، އެކުންފުނީގެ ކަސްޓަމަރުންނާއި ސްޓޭކްހޯލްޑަރުންނަށް ހާއްސަ ތަމްރީނާއި ހިދުމަތްތައް ފޯރުކޮށްދިނުމަށް މަސައްކަތް ކުރަމުން އަންނަ ކަމުގައެވެ. މިގޮތުން އެންމެ ފަހުން ހިންގި ކޯހަކީ ކާޑެއްދޫ އެއާޕޯޓާއި ގުޅިގެން ކުރިއަށް ގެންދިޔަ ކޯހެއްކަމަށްވެސް އެމްއޭސީއެލްއިން ބުނެފައި ވެއެވެ. އަދި ފެންވަރު ރަނގަޅު ތަމްރީނުތަކެއް ފޯރުކޮށްދިނުމަށް އެކުންފުނިން ކުރާ މަސައްކަތުގެ ސަބަބުން އެއާޕޯޓުގެ އޮޕަރޭޝަންތަކުގައި ސަލާމަތާއި ރައްކާތެރިކަމުގެ އެންމެ މަތީ މިންގަނޑުތައް ދެމެހެއްޓޭނެކަން ކަށަވަރުވެގެންދާނެކަންވެސް އެކުންފުނިން ފާހަގަ ކޮށްފައި ވެއެވެ.
އެމްއޭސީއެލްއިން ބުނެފައިވަނީ އެކުންފުނިން ހިންގި ލީޑިން ފަޔާމޭން ކޯހަކީ އެއާޕޯޓުގެ އޮޕަރޭޝަންތަކުގެ ސަލާމަތާއި ރައްކާތެރިކަން ކަށަވަރުކުރުމަށް އެޅުނު މުހިންމު ފިޔަވަޅެއްކަމުގައެވެ.
އޭވިއޭޝަން އިންޑަސްޓްރީގެ އެކިދާއިރާތަކަށް އިތުރުވަމުންދާ ޑިމާންޑްތަކަށް އެމްއޭސީއެލް އިން ހާއްސަ ތަމްރީނާއި ހިދުމަތްތައް ދަނީ ފޯރުކޮށްދެމުންނެވެ.
