ރިޔާސީ އިންތިޚާބު ރައީސް އިބްރާހީމް މުހައްމަދު ޞާލިޙަށް އެއްބުރުން ކާމިޔާބުކޮށްދެވޭނެކަމުގެ ފުރިހަމަ ޔަގީންކަން އޮތްކަމަށް އެމްޑީޕީއާއެކު ކޯލިޝަން ހަދަން ނިންމައިފައިވާ މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ލީޑަރު އަހްމަދު ސިޔާމް މުހައްމަދު މިއަދު ވިދާޅުވެއްޖެއެވެ.
މުލިއާގޭގައި އޮތް ބައްދަލުވުމަށް ފަހު ބޭއްވި ޕްރެސް ކޮންފަރެންސްގައި ސިޔާމް ވިދާޅުވީ ރައީސް ސޯލިހާ އެކީގައި ކޯލިޝަން ހަދަން ނިންމެވީ ވޭތުވެދިޔަ އަހަރުތަކުގައި ފެނުނު ހުރިހާ ވެރިކަމަކަށް ބަލާ އިރު، އެންމެ އަމާންކަމާއި އަދުލުވެރިކަމާއި އެއްވެސް ބިރުވެރި ކަމެއް ނެތި ރައްޔިތުންނަށް އުޅެވުނީ މި ވެރިކަމުގައި ކަމަށްވާތީ ކަމަށެވެ.
ކޯވިޑް-19 ގެ ވަބާގެ އެންމެ ބޮޑަށް ޖެހިގެން އައި ދުވަސް ވަރު ވެސް އެކަން ހައްލުކޮށް އިގްތިސާދު ހަމައަކަށް ގެނައުމަށް ރައީސް ކުރެއްވި މަސައްކަތް ދުނިޔޭގެ ހުރިހާ ގައުމުތަކުން ފާހަގަ ކުރާ ކަމަށާއި އެ ގައުމުތަކުން ދައްކަނީ ރާއްޖޭގެ ރައްޔިތުން ކޮވިޑުން ސަލާމަތްވި ގޮތް ކަމަށް ސިޔާމް ވިދާޅުވިއެވެ.
ސިޔާމް ވިދާޅުވީ ރައީސް ޞާލިހަށް ތާއީދުކޮށް އެމްޑީޕީއާއެކު ހަދާ ކޯލިޝަން ކާމިޔާބުވެދާނެ ކަމާމެދު ޝައްކުނުކުރައްވާ ކަމަށެވެ.
އަޅުގަނޑުމެން އިރާދަކުރެއްވިއްޔާ ހަަމަ ފުރަތަމަ ބުރުން، އިރާދަކުރެއްވިޔާ އިބްރާހީމް މުހައްމަދު ޞާލިހު ދިވެހި ރާއްޖޭގެ ވެރިކަމަށް އިރާދަކުރެއްވިއްޔާ އަޅުގަނޑުމެން ގެންނާނަން. އެ ކަމުގެ ޔަގީންކަން އަަޅުގަނޑުމެންނަށް އެބައޮތް.
– ސިޔާމް ވިދާޅުވިއެވެ.
ރައީސާއެކު ކޯލިޝަން ހަދަން ނިންމެވި ސަބަބު ހާމަކުރައްވަމުން ސިޔާމް ވިދާޅުވީ، ފާއިތުވި 25 އަހަރުގެ ތެރޭ އޭނާއަށް ފެނިވަޑައިގަތް ވެރިކަންތަކުގެ ތެރެއިން އެންމެ އަދުލުވެރި އަމާން ވެރިކަމެއް އެކި ގޮންޖެހުންތަކާއެކު ކުރެއްވި ބޭފުޅަކީ ރައީސް ޞާލިޙު ކަމަށެވެ. ރިޔާސީ އިންތިހާބު އެމްޑީޕީން ކާމިޔާބު ކުރާނީ އެއް ބުރުން ކަމަށް މިދިޔަ މަހުގެ 17 ވަނަ ދުވަހު ރައީސް ސޯލިހް ވެސް ވަނީ ވިދާޅުވެފައެވެ.
