ޖަޕާނުގެ ބޮޑުވަޒީރު ފުމިއޯ ކިޝިޑާ ޔޫކުރެއިންއަށް ވަޑައިގެންފިއެވެ. ކިޝިޑާ ޔޫކުރެއިންއަށް ވަޑައިގެންފައި މިވަނީ ކުރިން އެންގުމަކާނުލާ ކުރެއްވި ކުއްލި ދަތުރުފުޅެއްގެ ގޮތުގައެވެ.
ކިޝިޑާގެ މި ޒިޔާރަތުގައި ޔޫކުރެއިންގެ ރައީސް ޒެލެންސްކީއާ ބައްދަލުކުރައްވާ ދެގައުމުގެ ދެމެދުގައި ރަސްމީ ވާހަކަތައް ބާއްވަވާނެއެވެ. ކިޝީޑާ ޔޫކުރެއިންއަށް ވަޑައިގެންނެވުމާއެކު، އޭނާ ވެވަޑައިގެންފައިވަނީ، ޖީ-7ގެ ގައުމުތަކުގެ ތެރެއިން، ޔޫކުރެއިން ހަނގުރާމަ ފެށުނުފަހުން އެންމެފަހު އެގައުމަށް ވަޑައިގެންނެވި ލީޑަރު ކަމުގައެވެ.
ޖަޕާނުގެ ބޮޑުވަޒީރު ޔޫކުރެއިންއަށް ވަޑައިގެންފައިވަނީ އަންގާރަ ދުވަހުގެ ހަވީރުގެ ވަގުތެއްގައި، ރޭލުގައި ޕޮލޭންޑުންނެވެ. ބޮޑުވަޒީރަށް ޔޫކުރެއިންގެ ރެއިލްވޭ ސްޓޭޝަނުން މަރުހަބާ ވިދާޅުވެފައިވަނި ޔޫކުރެއިން ސަރުކާރުގެ އިސް އޮފިޝަލުންނެވެ.
ޔޫކުރެއިންއަށް ކުރައްވާ ދަތުރުފުޅުގައި އެގައުމުގެ ރައީސްއާއި ބައްދަލު ކުރެއްވުމުގެ ކުރިން ކިޝިޑާވަނީ ޔޫކުރެއިންގެ ވެރިރަށް ކީވްގެ ރަށްބޭރުގައި އޮންނަ ބުޗާ ސްޓޭޓުގައި ގަބުރުސްތާނަކަށް ޒިޔާރަތް ކޮށްފައެވެ. މިއީ ހަނގުރާމާގައި ރަޝިއާ ސިފައިން ގަތުލުއާންމު ހިންގާފައިވާކަމަށް ބުނާ ސިޓީއެކެވެ.
މިދަތުރުފުޅުގައި ޒެލެންސްކީއާ ބައްދަލު ކުރައްވާ، ޖަޕާން ޔޫކުރެއިންއާއެކީ އޮތްކަމުގެ ޔަގީންކަން ކިޝިޑާ ދެއްވާނެއެވެ. ޖަޕާނުންވަނީ ރަޝިއާއި ދެކޮޅަށް ހުޅަނގުގެ ގައުމުތަކުން އަޅާފައިވާ ދަތިކުރުމުގެ ފިޔަވަޅުތަކަށް ތާއީދުކޮށް ބައިވެރިވެސް ވެފައެވެ.
އަދި ޖަޕާނުންވަނީ، ހަނގުރާމާގައިގެ ހަތިޔާރުގެ ގޮތުގައި ނުހިމެނޭ ސާމާނުވެސް އެހީގެ ގޮތުގައި ޔޫކުރެއިންއަށް ފޯރުކޮށް ދީފައެވެ.
ކިޝިޑާ ޕޮލޭންޑަށް ވަޑައިގެންފައިވަނީ އިންޑިއާއަށް ޒިޔާރަތް ކުރެއްވުމަށް ފަހުއެވެ.
