އަމިއްލަ ދަރިފުޅަށް އަނިޔާކޮށް މަރާލުމުގެ ކުށުގެ ދައުވާ އުފުލާފައިވާ އާފިޔާ މުޙައްމަދުގެ މައްޗަށް ކުރާ ދައުވާގެ ހުކުމް މާދަމާ އިއްވަން ކްރިމިނަލް ކޯޓުން ނިންމައިފިއެވެ.
2015 ވަނަ އަހަރުގެ ޖެނުއަރީމަހުގެ ތެރޭގައި ވ.ރަކީދޫގައި އާފިޔާގެ އަމިއްލަ ދަރިފުޅު، ޢުމުރުން 3 އަހަރުގެ މުހައްމަދު އިބްތިހާލަށް އެކި ދުވަސްތަކުގެމަތިން އަނިޔާކޮށް މަރާލި މައްސަލާގައި އޭނާގެ މައްޗަށް ދައުލަތުން އުފުލާފައިވަނީ އަމުރަށް ނުކިޔަމަންތެރިވުމުގެ ދައުވާއާއި ގަސްތުގައި ކުއްޖަކު މެރުމުގެ ދައުވާއެވެ.
އެދައުވާތަކަށް އާފިޔާ ކުރިން އެއްބަސްވިއެވެ. ނަމަވެސް ފަހުން އޭނާ ވަނީ އެ ދަޢުވާތަކަށް އިންކާރުކޮށްފައެވެ. މިމައްސަލައިގެ އަޑުއެހުންތައް ކްރިމިނަލް ކޯޓްގައި ނިންމާލާފައިވަނީ މިއަހަރުގެ ފެބުރުއަރީ މަހުގެ ތެރޭގައެވެ. އަދި އެމައްސަލައިގެ ޙުކުމް އިއްވުން ތަޢާވަލުކޮށްފައިވަނީ މާދަމާ މެންދުރު ފަހު 14:00 އަށެވެ.
އާފޔާ ވަނީ ޝަރީޢަތުގައި އިބްތިހާލު މަރާލިގޮތް ތަފްސީލްކޮށް ކިޔާދީފައެވެ. އާފިޔާ، އޭނާގެ މައްޗަށް ތުހްމަތުކުރާ ކުށްތަކަށް އިއުތިރާފުވެފައި ފަހުން އެ އިއުތިރާފު އަނބުރާ ގެންގޮސްފައި ވަނީ، އެ ދައުވާތަކަށް އޭނާ އެއްބަސްވީ ބިރުދެއްކުމުންކަމަށް ބުނެއެވެެ.
އިބްތިހާލުގެ މަރުގެ މައްސަލާގައި ޖެންޑަރ މިނިސްތްރީގެ ބައެއް މުވައްޒަފުންގެ މައްޗަށްވެސް ދައުލަތުން ދައުވާ އުފުލިއެވެ. އެމިނިސްޓްރީން އިބްތިހާލުގެ މައްސަލާގައި އިހުމާލުވެފައިވާކަމަށް ބުނެ އުފުލި ބައެއް ދައުވާތައް ކުރިއަށް ނުގެންދެވޭނެކަން ކޯޓުން ކަނޑައަޅާފައިވެއެވެ.
އާފިޔާގެ އިތުރު 2 ދަރިން ތިބޭއިރު، އެކުދިންނާ އިބްތިޙާލްއާ ތަފާތުކުރާކަން ޝަރީޢަތުގައި ނަގާފައިވާ ހެކިންގެ ހެކިބަހުންނާއ، އެރަށުގެ ބައެއް މީހުންގެ ވާހަކަތަކުން އެނގެއެވެ.
ކޮމެންޓު ފޮނުވާ